Read Central Bicolano 1 Maccabees 1 Bible Online

1 Maccabees 1 - Central Bicolano bible

1 Maccabees 1

¹An kasaysayan na ini nagpopoon kan si Alejandro, na aking lalaki ni Felipe nin Macedonia, nagmartsa hale sa Macedonia tanganing salakayon si Dario, an hade nin Persia saka Media. Pinadakula ni Alejandro an Imperyo nin Grecia kan daogon niya si Dario dangan kuahon an trono kaini.

²Nakilaban si Alejandro sa dakul na gera, sinakop an pinapusog na mga syudad asin ginadan an mga hade kan rehiyon.

³Sa pagpadagos niya pasiring sa mga poro kan daga, sinamsaman niya an dakul na nasyon, dangan kan masakop na niya an kinaban, nagin mapalangkaw siya saka mapaabaw-abaw.

⁴Nagtipon siya nin sarong makosog na hukbo, kaya nasakop niya an mga nasyon asin an mga pamayo kaini, dangan an lambang saro napiritan na magbayad nin buhis saiya.

⁵Kan doseng taon na si Alejandro bilang emperador, naghelang siya asin namatean niya na harani na an saiyang kagadanan. Kaya inapod niya an saiyang mga heneral, ginagalangan na mga tawo, na kasarabay niyang nagdakula, dangan binaranga sa sainda an saiyang imperyo.

⁶

⁷

⁸Pagkagadan niya, an saiyang mga heneral iyo na an mga namayo,

⁹asin an lambang saro sainda nagtukaw bilang hade sa sadiri niyang teritoryo. An mga kapagarakian kan mga hadeng ini naghade man nin halawig na panahon, asin nagdara nin dakulang kasakitan sa kinaban.

¹⁰Saro sa mga guminikan sa mga opisyal ni Alejandro iyo an maraot na si Antioco Epifanes, na aking lalaki ni Hadeng Antioco an Ikatolo kan Siria. Si Antioco Epifanes nagin sarong bihag sa Roma bago siya nagin hade nin Siria kan taon 137.

¹¹Kan panahon na iyan, igwa nin nagtunga sa Israel na sarong grupo nin mga maraot na Judio, na mayo nin paggalang sa Katogonan asin nandagka nin dakul na tawo na mag-iba sainda. Nagsarabi sinda, “Makipagtipan kita sa mga pagano, nin huli ta poon kan magsiblag kita sainda, dakul na kasakitan an nag-abot sato.”

¹²Naoyonan nin dakul na tawo an pahayag nindang ini,

¹³asin nagkapira sa sainda an nagduman tolos sa hade dangan naghagad na tugotan sindang magsunod kan kaugalean kan mga pagano.

¹⁴Nagtugdok sinda nin sarong dakulang istadyum sa Jerusalem sosog nanggad sa kaugalean kan mga pagano.

¹⁵Nagpaoperar sinda tanganing mahale an tanda kan pagserkomsisyona sainda. Binayaan ninda an banal na tipan, nagpoon na makiiba sa mga pagano saka naggibo nin gabos na karatan.

¹⁶Kan pusog na an kahadean ni Antioco, nagdesisyon siyang salakayon an Egipto dangan paghadean ini pati na an Siria.

¹⁷Sinalakay niya an Egipto sa paagi nin dakul na barko kaiba an sarong makosog na hukbo, sagkod mga karwahe, mga elepante, asin mga nagbabaklay na mga solados.

¹⁸Kan magsalakay siya, suminibog si Hadeng Tolome nin Egipto, dangan duminulag. Kadakul na soldados ni Hadeng Tolome an nagkagaradan.

¹⁹Nasakop ni Antioco an pinapusog na mga syudad nin Egipto asin sinamsaman niya an bilog na daga.

²⁰Kan taon 143, pakatapos na masakop an Egipto, nagmartsa si Antioco kaiba an sarong dakulang hukbo pasiring sa daga nin Israel asin sa syudad nin Jerusalem.

²¹Sa saiyang kapaabaw-abawan, linaog niya an Templo asin kinua an bulawan na altar, an kandelero patin an gabos na kasangkapan kaini,

²²an lamesa para sa tinapay na idinolot sa Kagurangnan, an mga kalis saka mga mangko, an mga bugtakan nin baga na gibo sa bulawan, an kurtina asin an mga korona. Tinangkas man niya an gabos na bulawan na dekorasyon sa atubangan kan Templo

²³asin dinara an mga plata saka mga bulawan sagkod an mga bagay na mahalaga, pati na an gabos na kayamanan na nasasaray duman.

²⁴Dangan dinara niya ini gabos sa saiyang nasyon. Ginadan man niya an dakul na tawo asin ipinaghambog niya ini.

²⁵Nagkaigwa nin dakulang pagmondo sa daga nin Israel.

²⁶An mga pamayo saka mga lider nag-agrangay sa kamondoan. An mga hoben na lalaki saka babae nanruluya. Nawara an kagayonan kan samong kababaehan.

²⁷An lambang nobyo nag-awit nin sarong panambitan, asin an lambang nobya mamondong nagtukaw sa laog kan saiyang kwarto.

²⁸An gabos nyamong namamanwaan napano nin kasosopgan, asin an samong daga nagtakig para sainda.

²⁹Pakalihis nin duwang taon, nagpadara si Antioco nin sarong dakulang hukbo hale sa Misia pasiring sa mga banwa nin Judea. Pakalaog sa Jerusalem kan mga soldados,

³⁰nagtaram sa mga tawo an saindang pamayo, na nagsagin-sagin na makikipagtipan nin katoninongan; nagtubod saiya an mga tawo asin nadaya sinda. Dangan hidali niyang sinalakay an syudad, sinakop ini asin ginadan an dakul na tawo.

³¹Sinamsaman niya an syudad, sinulo asin rinumpag an mga edipisyo saka mga kudal.

³²Dinara niya asin kan saiyang hukbo an mga babae saka an mga aki bilang bihag asin kinurua ninda an mga baka.

³³Dangan si Antioco asin an saiyang hukbo nagtugdok nin haralangkaw na mga kudal asin makokosog na mga tore sa amihan na parte kan Templo, asin ginibo ninda ining sarong bantayan.

³⁴Binugtakan ninda ini nin traydor na mga Judio bilang mga bantay.

³⁵Nagdara man sinda duman nin mga armas saka mga kagamitan asin duman sinaray an gabos na sinamsam ninda sa Jerusalem. An bantayan na ini nagin sarong dakulang homa laban sa syudad.

³⁶An bantayan sarong homa laban sa Templo, sarong danay saka maraot na kaiwal nin Israel.

³⁷Pinabulos kan kaiwal an inosenteng dugo sa palibot kan altar; dinigtaan ninda an Banal na Lugar.

³⁸Sa katakotan nagdurulag an mga taga Jerusalem, asin an syudad nagin erokan nin mga dayuhan. An Jerusalem nagin dayuhan para sa sadiri niyang mga namamanwaan, na napiritan na maghale sa syudad.

³⁹An saiyang Templo nagin mamondo arog sa kalangtadan; an saiyang mga pyesta nagin mga aldaw nin kamondoan, an saiyang mga Sabbath nagin kasosopgan, an saiyang onra nagin sarong ngingisihan.

⁴⁰An kasosopgan niya arog kadakula kan dati niyang kamurawayan, asin an saiyang kaogmahan nagin makuring kamondoan.

⁴¹Dangan nagpaluwas si Antioco nin sarong dekreto sa gabos na nasyon sa saiyang imperyo na nagboboot sainda na bayaan an sadiri nindang mga kaugalean asin magin saro sanang banwaan. An dekretong ini kinuyog kan gabos na pagano siring man kan dakul na mga Israelita. Maogmang inako kan dakul na Israelita an paganong relihiyon kan hade. Nagdolot sinda nin sakripisyo sa mga dios-dios, asin dai na ninda inotob an Sabbath.

⁴²

⁴³

⁴⁴Nagpadara man nin mga sugo an hade sa Jerusalem asin sa gabos na banwa nin Judea, dara an pagboot na dapat sunodon kan mga tawo an mga kaugalean na dayuhan para sa sainda.

⁴⁵Pinagbotan niya sinda na dai magdolot nin mga tinutong na atang sa Templo, mga dolot na pagkakan o mga dolot na arak. Pinagbotan man niya sinda na lapason an mga Sabbath saka mga pyesta.

⁴⁶Pinagbotan man sinda na digtaan an Templo asin an mga banal na bagay na yaon duman.

⁴⁷Pinagbotan sindang magtugdok nin mga paganong altar saka mga templo dangan magsakripisyo nin mga orig saka mga maating hayop.

⁴⁸Ipinangalad sainda an pagserkomsisyon kan saindang mga aking lalaki. Ginibo sindang makauuyam sa paagi kan gabos na bagay na maati saka nakakadigta,

⁴⁹tanganing malingawan ninda an Katogonan na itinao nin Kagurangnan ki Moises dangan lapason ninda an mga pagboot kaiyan.

⁵⁰Kagadanan an nagin padusa sa kiisay man na dai magsunod sa pagboot kan hade.

⁵¹Ini an nagin pagboot kan hade sa bilog niyang imperyo. Laen pa kaiyan, nagtalaan pa siya nin mga opisyal na mabantay sa mga banwaan, asin pinagbotan niya an lambang banwa sa Judea na magdolot nin mga paganong sakripisyo.

⁵²Dakul sa mga Judio an andam na nagbaya kan Katogonan asin nagsunod sa mga opisyal. Dinigtaan ninda an daga huli kan saindang mga karatan,

⁵³asin an maraot nindang mga gawe iyo an nagsubol sa maimbod na mga Israelita na magdulag saka magtago saen man na lugar.

⁵⁴Kan ikakinseng aldaw kan bulan nin Kislev kan taon 145, pinatindog ni Hadeng Antioco an “Makangingirhat na Katakotan” sa altar kan Templo, asin pinatugdok man an mga paganong altar sa mga banwa sa Judea.

⁵⁵Mga paganong sakripisyo an idinolot sa atubangan kan mga harong asin sa mga tinampo.

⁵⁶An mga libro kan Katogonan na nanumpongan ninda saindang ginirisi saka sinurulo,

⁵⁷asin an siisay man na nakuahan nin kopya kan banal na kasuratan o nagkuyog kan Katogonan ginadan sa pagboot kan hade.

⁵⁸Bulan-bulan, ginamit kan mga tampalasan na ini an saindang kapangyarihan laban sa mga Israelita na nadakop sa mga banwa.

⁵⁹Kan ikabeynte y singkong aldaw kan bulan, an mga tampalasan na ini nagdolot nin mga sakripisyo sa paganong altar na itinugdok sa ibabaw kan altar kan Templo.

⁶⁰Sosog sa pagboot kan hade, ginadan an mga ina na nagtugot na serkomsisyonon an saindang mga aki.

⁶¹An mga aking sinerkomsisyon binitay sa liog. Ginadan man an saindang mga pamilya sagkod an mga nagserkomsisyon kan saindang mga aki.

⁶²Alagad dakul sa mga Israelita an nagsuhay sa pagboot kan hade asin nagsayumang magkakan kan mga maating pagkakan.

⁶³Pinagmarahay pa nindang magadan ki sa maglapas kan banal na tipan saka magkakan nin maating kakanon—asin dakul mananggad sainda an nagadan.

⁶⁴Sa kaanggotan, pinasakitan nin Dios an Israel.