Read Central Bicolano 1 Maccabees 13 Bible Online

1 Maccabees 13 - Central Bicolano bible

1 Maccabees 13

¹Naaraman ni Simon na nagtipon nin sarong dakulang hukbo si Trifo tanganing salakayon asin raoton an daga nin Judea.

²Nahiling niya na an baretang ini nagdara nin takot asin ribong sa mga tawo, kaya nagtukad siya sa Jerusalem, tinipon an mga tawo,

³asin hiningowang pakosogon an boot ninda. Nagsabi siya, “Aram nindo kun gurano kadakulang mga bagay an ginibo kan pamilya nin sakong ama, kan ginibo ko asin kan sakong mga tugang para sa Katogonan ni Moises saka para sa Templo. Aram man nindo an mga gera saka mga kasakitan na inagihan nyamo.

⁴Nagadan an gabos kong tugang sa pakilaban para sa satong Katogonan, para sa satong Templo, para sa satong nasyon, asin ako na sana an natatada.

⁵Alagad dai man logod pagsabihon na hiningowa kong iligtas an sakong buhay sa panahon nin kasakitan. Dai ko ibinibilang an sakong sadiri na mas marahay ki sa sakong mga tugang.

⁶Maski magtiripon an gabos na nasyon na anggot sato tanganing tunawon kita, makikilaban ako para sa satong nasyon, para sa Templo asin para sa saindong mga agom saka mga aki.”

⁷An mga tataramon na ini nakapakosog tolos kan boot kan mga tawo,

⁸asin nagsimbag sinda sa makosog na tingog, “Ika na ngunyan an samong lider na kasalihid kan mga tugang mong si Judas saka si Jonathan.

⁹Pangenotan mo kami sa gera asin gigibohon mi an anoman na hagadon mo.”

¹⁰Kaya tinipon ni Simon an gabos na soldados dangan hinidali an pagtapos kan trabaho sa mga kudal nin Jerusalem, asin pinakosog niya an depensa kaini.

¹¹Sinugo niya sa Jope si Jonathan na aking lalaki ni Absalom kaiba an sarong dakulang hukbo. Pinahale kan Jonathan na ini an mga tawo duman dangan sinakop an banwa.

¹²Naghale sa Tolemaida si Trifo kaiba an sarong dakulang hukbo tanganing salakayon an Judea. Ipinag-iba niya bilang bihag si Jonathan na tugang ni Simon.

¹³Nagkampo si Simon sa Adida, na kahampang kan kapatagan.

¹⁴Kan naaraman ni Trifo na nagin kasalihid si Simon kan tugang niyang si Jonathan, dangan andam ini sa pag-atubang saiya sa gera, pinadarahan niya ini nin mensahe na nagsasabi:

¹⁵“Ibinilanggo nyamo an tugang mong si Jonathan huli ta mantang siya pa an may katongdan, dai siya nagbayad kan saiyang mga utang sa kaban nin yaman kan palasyo.

¹⁶Alagad tatalingkasan mi siya kun magbayad ka sako nin tolong ribong kilo nin plata dangan ipadara mo an duwa niyang aking lalaki bilang garantiya na dai siya marebelde samo kun talingkas na siya.”

¹⁷Maski aram ni Simon na linalansi siya, ipinadara niya an kwarta asin an duwang aking lalaki, huli ta habo niyang mapaanggot an mga Judio.

¹⁸Natakot siya na tibaad ngapit magsabi an mga Judio na ginadan si Jonathan huli ta habo niyang ipadara an kwarta saka an mga aking lalaki.

¹⁹Kaya kinuyog niya an pagboot ni Trifo, alagad dai kaini inotob an saiyang panuga asin dai pinatalingkas si Jonathan.

²⁰Dangan pinadagos ni Trifo an plano niyang pagsalakay saka pagraot sa daga. Linibot niya ini sa pag-agi sa dalan pasiring sa Adora. Alagad padagos man na naghiro si Simon saka an saiyang hukbo asin inatubang ninda ni Trifo maski saen ini magduman.

²¹An mga soldados kan kaiwal padagos an pagpadara nin mga sugo ki Trifo sa pagsadol saiya na magduman sainda asin darahan sinda nin pagkakan.

²²Inandam ni Trifo sa pagsalakay an mga nakakabayo niyang soldados, alagad nagkaigwa nin makosog na pag-uran nin yelo kan bangging idto, kaya dai siya nakatukad sa kabubuldan. Kaya nagsibog siya asin nagduman sa Gilead.

²³Kan harani na siya sa Baskama, ipinagadan niya si Jonathan asin duman ilinubong.

²⁴Dangan nagbirik si Trifo asin nagpuli sa sadiri niyang daga.

²⁵Sinugo ni Simon an nagkapira niyang tawohan na kuahon an bangkay kan saiyang tugang na si Jonathan saka darahon sa Modein, tanganing ilubong sa banwa nin saindang mga ginikanan.

²⁶Nanambitan an bilog na Israel sa pagkagadan ni Jonathan, asin pinagmondoan ninda siya sa haloy na panahon.

²⁷Sa ibabaw kan lulubngan kan saiyang ama saka mga tugang, nagtugdok si Simon nin sarong halangkaw na monumento tanganing mahiling maski sa harayong lugar. Patos idto nin pinakinang na mga gapo sa atubangan saka sa likod.

²⁸Nagtugdok siya nin pitong piramidang magkataraed para sa saiyang ama, para sa saiyang ina, asin para sa apat niyang tugang na lalaki.

²⁹Sa likodan kan mga piramida, guminibo siya nin mga haralangkaw na harigi na gabos inukitan. An ibang mga inukit mga gubing para sa gera, mantang an iba mga barko. Saro idtong monumento kan saindang mga kapangganahan, na pwedeng mahiling nin mga nagsasakay sa dagat.

³⁰Yaon pa ngunyan an lulubngan na itinugdok niya sa Modein.

³¹Kan panahon na iyan, ginadan ni Trifo an hoben na hadeng si Antioco an Ikaanom,

³²dangan sinakop an saiyang kahadean sa Siria. An dagang idto dinarahan niya nin dakulang kasakitan.

³³Hinirahay ni Simon an mga bantayan sa Judea asin pinalibotan nin kudal. Nagtugdok siya nin haralangkaw na mga tore, pusog na mga kudal, mga trangkahan na igwa nin mga barat, dangan nagsaray nin pagkakan sa mga bantayan.

³⁴Nagpadara siya nin mga sugo ki Hadeng Demetrio an Ikaduwa tanganing hagadon na dai na pabayadon nin buhis an daga, huli ta mayo nang ibang ginibo si Trifo kundi habonan sinda.

³⁵Ipinadara ni Hadeng Demetrio an surat na ini bilang simbag:

³⁶“Hale ki Hadeng Demetrio para sa Halangkaw na Padi na si Simon, na katood kan mga hade, para sa nasyon nin mga Judio asin para sa saindang mga lider, an sakong pangongomusta.

³⁷Nakaabot sako an bulawan na korona saka bulawan na sanga nin palma na ipinadara mo, asin andam ako na makipagtipan nin katoninongan sa saimo saka sa pagboot sa sakong mga opisyal na dai na kamo pabayadon nin buhis.

³⁸Pinapahalagahan mi an dating tipan asin magdadanay na sadiri nindo an mga bantayan na itinugdok nindo.

³⁹Pinapatawad ko kamo kan dai nindo pag-otob kan tipan sagkod ngunyan, asin dai ko na kamo papabayadon kan espesyal na buhis na dapat pa nindong bayadan sagkod kan iba pang mga buhis na nakolekta sagkod ngunyan sa Jerusalem.

⁴⁰An gabos na Judio na maninigong mag-ayon sa paglingkod sa hukbo kan hade pwedeng magpalista. Magkaigwa kita nin katoninongan.”

⁴¹Kaya kan taon 170, nahale sa mga Judio an sakal kan nang-aaping mga pagano.

⁴²Nagpoon nang bugtakan nin petsa kan mga tawo an saindang mga dokumento saka mga tipan sa mga tataramon na ini: “Kan enot na taon ni Simon, an dakulang Halangkaw na Padi, an pamayo saka lider kan mga Judio.”

⁴³Kan panahon na idto, sinalakay ni Simon an Gezer asin pinalibotan niya ini kan saiyang hukbo. Naggibo siya nin sarong platapormang panlaom, pinatindog niya sa kudal kan banwa, sinalakay an saro sa mga tore asin sinakop.

⁴⁴Dangan an mga tawohan na nasa platapormang panlaom hidaling nagduruman sa banwa asin huli kaini nagkaigwa nin dakulang kariribokan.

⁴⁵Ginirisi kan tawo sa banwa, kan saindang mga agom saka mga aki an saindang mga gubing dangan nagsarakat sinda sa ibabaw kan kudal kan banwa. Sa makosog na tingog naghagad sinda ki Simon nin pakipagtipan.

⁴⁶“Maherak ka samo,” an sabi ninda. “Dai mo kami pagpadusahan kan maninigo samo!”

⁴⁷Kaya nakipagtipan si Simon sainda asin inontok an ralaban. Pinahale niya sa banwa an mga tawo dangan lininigan niya an mga harong huli ta igwa duman nin mga dios-dios. Kan magibo na idto, naglaog sa banwa si Simon saka an saiyang mga tawohan, na nag-aawit nin mga himno saka mga awit nin pag-omaw.

⁴⁸Hinarale niya an gabos na nakadigta sa banwa asin pinaerokan niya sa mga tawo na magsusunod kan lambang pagboot na napapalaman sa Katogonan ni Moises. Pinakosog niya an mga depensa kan banwa dangan nagtugdok duman nin sarong palasyo para saiya.

⁴⁹An mga lalaki sa bantayan sa Jerusalem dai na tinugotan na maghale sa pagbakal o pagpabakal nin anoman. Nagtios sinda nin makuring gutom asin dakul sainda an nagadan ta mayong kakanon.

⁵⁰Sa kahuri-hurihi, naghagad sinda nin pakipagtipan ki Simon. Nag-oyon siya, pinaharale sinda sa bantayan dangan lininigan idto.

⁵¹Kan ikabeynte y tres na aldaw kan ikaduwang bulan, kan taon 171, nagkaigwa nin dakulang selebrasyon sa syudad, huli ta natapos na an mangirhat na homa na ini sa kaligtasan nin Israel. Naglaog sa bantayan si Simon saka an saiyang mga tawohan, na nag-aawit nin mga himno nin pag-omaw saka pasasalamat, mantang dara an mga sanga nin palma saka nagtutugtog nin mga arpa, mga gimbal asin mga lira.

⁵²Nagpaluwas nin sarong dekreto si Simon na an aldaw na idto dapat na maogmang selebraron taon-taon. Pinakosog niya an mga depensa kan bulod kan Templo sa kabtang na atubang sa bantayan, dangan duman siya nagkampo sagkod an saiyang mga tawohan.

⁵³Dakula na si Juan na aking lalaki ni Simon, kaya ginibo niya si Juan na pamayo kan bilog na hukbo, asin duman ini nagkampo sa Gezer.