Read Central Bicolano 1 Maccabees 14 Bible Online

1 Maccabees 14 - Central Bicolano bible

1 Maccabees 14

¹Kan taon 172, tinipon ni Hadeng Demetrio an Ikaduwa an saiyang hukbo dangan nagduman sa Media sa paghagad nin tabang tanganing labanan si Trifo.

²Kan maaraman ni Arsaces an Ikaanom, an hade nin Persia saka Media, na naglaog sa teritoryo niya si Demetrio, sinugo niya an saro sa mga pamayo kan saiyang hukbo kaiba an sarong grupo nin mga soldados tanganing dakopon na buhay si Demetrio.

³Sinalakay ninda asin dinaog an hukbo ni Demetrio, dinakop si Demetrio dangan dinara ki Hadeng Arsaces, na iyo an nagbilanggo saiya.

⁴Matoninong an daga nin Judea mantang buhay pa si Simon. Sa bilog na panahon nin saiyang paghahade, ginamit niya an saiyang katongdan para sa karahayan kan banwaan, asin nawilihan siya ninda bilang saindang lider.

⁵Nadagdagan an saiyang kabantogan kan masakop niya an bantayan nin Jope asin bukasan niya an dalan pasiring sa mga isla nin Grecia.

⁶Bako sanang pinadakula niya an teritoryo kan saiyang nasyon asin napasairarom sa saiyang kapangyarihan an bilog na daga,

⁷kundi ipinuli pa niya an dakul na bilanggo sa gera asin nasakop niya an Gezer, an Bet-zur, saka an bantayan sa Jerusalem. Lininigan niya an bantayan, asin mayo nin nagkontra saiya.

⁸Matoninong na nagtrabaho sa saindang mga oma an mga Judio; namunga an daga asin an mga kahoy.

⁹An mga gurang nagturukaw sa mga plasa kan syudad dangan nag-orolay manongod kan darakulang mga bagay na nangyari sainda, mantang an mga hoben nagsurolot kan magagayon na mga gubing na sa gera.

¹⁰An mga syudad tinawan ni Simon nin pagkakan saka mga armas para sa depensa. Nakalakop sa mga poro kan daga an saiyang kabantogan.

¹¹Dinarahan niya nin katoninongan an daga, asin nagin dakula an kaogmahan nin Israel.

¹²An lambang saro namuhay na matoninong sa limpoy kan saiyang mga ubasan saka mga kahoy nin higera, asin mayo nin nagpatakot sainda.

¹³Kan panahon na idto, nagkadaraog an mga kaiwal na hade asin mayo na nin natadang makikilaban sa mga Judio.

¹⁴Tinabangan ni Simon an gabos na dukha sa saiyang banwaan, asin bilang pag-otob sa Katogonan ni Moises, hinarale niya an gabos na tawong maraot saka dai nagmimidbid sa katogonan.

¹⁵Pinagayon niya an Templo asin dinagdagan niya an mga kagamitan para sa pagsamba.

¹⁶Kan an bareta kan pagkagadan ni Jonathan nakaabot sa Roma saka sa Esparta, nagdara idto nin dakulang kamondoan.

¹⁷Kan naaraman kan mga taga Esparta na si Simon iyo an nagsalihid sa saiyang tugang bilang Halangkaw na Padi, dangan sakop na niya an nasyon saka an mga syudad kaini,

¹⁸inukit ninda sa mga tinablang bronse an tipan nin pakipagkatood na ginibo ninda sa mga tugang niyang si Judas saka si Jonathan, dangan ipinadara an mga idto ki Simon.

¹⁹Binasa an mga idto sa katiriponan sa Jerusalem.

²⁰Iyo ini an kopya kan surat na ipinadara kan mga taga Esparta: “Hale sa banwaan nin Esparta saka sa saindang mga pamayo para ki Simon an Halangkaw na Padi, para sa mga lider asin mga padi kan mga Judio saka para sa gabos niyang tugang na Judio, an samong pangongomusta.

²¹An mga sinugo nindo samo nagbareta kan saindong kaomawan saka kabantogan. An pagdalaw ninda nagdara samo nin kaogmahan.

²²Itinala nyamo sa mga libro kan banwa an mga sinabi ninda samo, na iyo an mga minasunod: ‘Nag-atubang samo si Numenio na aking lalaki ni Antioco saka si Antipater na aking lalaki ni Jason, mga sugo kan mga Judio, tanganing bagohon an tipan nin pakipagkatood sa samo.

²³Maogmang inako sinda kan mga tawo asin tinawan nin dakulang onra. Itinala sa mga libro kan banwa an saindang sinabi tanganing magkaigwa nin kopya an mga taga Esparta. An sarong kopya kan itinalang ini ginibo para ki Simon, an Halangkaw na Padi.’”

²⁴Pakatapos kaini, sinugo ni Simon si Numenio sa Roma dara bilang regalo an sarong dakulang bulawan na kalasag na kabangang tonelada an timbang, tanganing pahalagahan an pakipag-alyansa kan mga Judio sa mga Romano.

²⁵Kan nadangog ini gabos kan mga tawo, naghinarapotan sinda, “Paano nyato mapapasalamatan si Simon saka an saiyang mga aki?

²⁶Siya, an saiyang mga tugang, saka an bilog na pamilya kan saiyang ama nagin mga pusog na tore para sa satong nasyon. Linabanan ninda an satong mga kaiwal asin tinawan nin katalingkasan an nasyon.” Kaya inukit ninda ini sa mga tinablang bronse dangan ibinugtak sa mga harigi sa Bukid nin Sion.

²⁷Ini an inukit ninda: “Kan ikadyes y otsong aldaw kan bulan nin Elul kan taon 172, na iyo an ikatolong taon ni Simon, an Halangkaw na Padi,

²⁸sa sarong dakulang pagtiripon nin mga padi, mga tawo, mga opisyal saka mga lider kan nasyon, ipinahayag samo an mga minasunod:

²⁹Kadaklan na beses, kan igwa nin gera sa satong nasyon, ibinugtak ni Simon na aking lalaki ni Mattatias, sarong padi sa pamilya ni Jehoiarib, saka kan saiyang mga tugang, an saindang buhay sa pag-alaman tanganing labanan an mga kaiwal para sa satong nasyon, satong Templo saka satong Katogonan. Dinarahan ninda nin dakulang kamurawayan an satong nasyon.

³⁰Pinangagin saro ni Jonathan an satong nasyon asin nagin siyang Halangkaw na Padi bago siya nagadan.

³¹An mga kaiwal kan mga Judio nagplanong salakayon an daga asin digtaan an Templo.

³²Dangan namayo si Simon asin nakilaban para sa saiyang nasyon. Naggasto siya nin dakul na kwartang sadiri niya para sa armas saka para sa sweldo kan mga kaayon sa hukbo kan nasyon.

³³Pinapusog niya an mga banwa nin Judea, orog na an Bet-zur sa poro, saen dating namumugtak an mga armas kan mga kaiwal. Nagbugtak siya duman nin mga soldados.

³⁴Pinapusog niya an pantalan nin Jope asin an syudad nin Gezer sa poro nin Asdod, na dating sakop kan mga kaiwal na soldados. Duman niya pinaerok an mga Judio asin itinao niya sa mga banwa an gabos na kaipuhan kan mga tawo.

³⁵Kan mahiling kan mga tawo an pagkamoot ni Simon sa nasyon asin kun paano niya tinawan iyan nin kamurawayan, ginibo ninda siyang lider asin Halangkaw na Padi. Ginibo ninda ini huli kan gabos na ginibo niya sa pagpahiling nin kaimbodan asin huli ta nagin matanos siya saka sa anoman na paagi hiningowa niyang darahan nin kamurawayan an saiyang nasyon.

³⁶“Sa irarom kan saiyang pamamayo, napahale sa daga an mga pagano. An mga kaiwal na soldados napahale sa amihan na kabtang kan Templo. Duman nagtugdok nin bantayan an mga kaiwal, asin hale duman linalaog ninda dangan dinidigtaan an banal na Templo.

³⁷Pinaerok ni Simon sa bantayan an mga Judio, pinapusog idto para sa depensa kan daga asin kan syudad nin Jerusalem, dangan orog na pinahalangkaw an mga kudal kan syudad.

³⁸Huli kaini, ginibo siyang Halangkaw na Padi ni Hadeng Demetrio,

³⁹dangan tinawan nin ngaran na “Katood kan Hade,” asin nin dakulang onra.

⁴⁰Ginibo ini ni Demetrio huli ta naaraman niyang an mga Judio inaapod kan mga Romano na mga katood ninda, kaalyansa saka tugang, dangan tinawan nin dakulang onra kan akoon ninda an mga sinugo ni Simon.

⁴¹“Kaya ikinaoogma kan mga Judio saka kan saindang kapadian na si Simon asin an saiyang mga kapagarakian iyo an saindang mga lider dangan mga Halangkaw na Padi, sagkod na magtunga an sarong tunay na propeta.

⁴²Si Simon iyo an mamamahala kan saindang daga, an mangangataman kan Templo saka an magigin pamayo kan hukbo. Siya an mamamahala kan mga kaipuhan kan hukbo, kan mga patrabaho sa pagpapusog kan depensa saka mga trabaho sa banwa.

⁴³Kaipuhan kuyogon siya kan mga tawo sa gabos na bagay. An gabos na dokumento gigibohon sa saiyang ngaran. Igwa siya nin deretso na maggubing nin sa hade kaiba an hebilyang bulawan na ibinubugtak sa abaga.

⁴⁴“Mayo nin siisay man, padi man o ordinaryong tawo, na magkakaigwa nin deretso sosog sa katogonan sa pagpawara nin kahulogan sa arin man sa mga desisyon na ini, sa pagribay o sa pagbago kan arin man sa mga pagboot ni Simon, o sa pag-apod nin anoman na pagtiripon na dai niya itinutugot, o sa paggubing nin sa hade kaiba an hebilyang bulawan na ibinubugtak sa abaga.

⁴⁵An siisay man na magsalungat o dai magpahalaga kan mga pagboot na ini maako nin padusa.

⁴⁶“Nagkasararo an mga tawo sa pagtao ki Simon kan deretso na maggibo nin anoman sosog sa mga pagboot na ini.

⁴⁷Inako ni Simon an pagigin lider: Halangkaw na Padi, pamayo kan mga hukbo saka gobernador kan mga Judio saka mga padi.”

⁴⁸Napagkaoroyonan na an pahayag na ini iukit sa tinablang bronse dangan ibugtak sa sarong hayag na lugar sa laog kan Templo

⁴⁹asin na ibugtak sa kaban nin yaman kan Templo an mga kopya kaini, tanganing pwedeng mahiling ni Simon saka kan saiyang mga aki.