Read Central Bicolano 1 Maccabees 15 Bible Online

1 Maccabees 15 - Central Bicolano bible

1 Maccabees 15

¹Hale sa mga isla sa Grecia, ipinadara ni Antioco na aking lalaki ni Hadeng Demetrio an surat na ini para ki Simon na Halangkaw na Padi saka gobernador kan mga Judio asin para sa bilog na nasyon:

²“Hale ki Hadeng Antioco para ki Simon, an Halangkaw na Padi saka gobernador, asin para sa nasyon kan mga Judio, an sakong pangongomusta.

³Siring sa aram mo, an kahadean kan samong mga ginikanan sinakop nin mga parapasaluib. Nagmawot akong bawion iyan tanganing ikabalik an dating kadakulaan kaiyan, asin nagtipon na ako nin sarong dakulang hukbong tinandanan dangan nag-andam nin mga barkong panggera.

⁴Nagplano akong salakayon an daga asin labanan an mga tawong nanraot kan dakul na syudad sa sakong kahadean.

⁵“Kaya ngunyan, pinapatotoohan ko an gabos na pagpalibre saindo sa mga buhis saka mga babayadan siring sa ginibo kan mga hade na nagkaerenot sako.

⁶Tinutugotan ko kamong maggibo kan sadiri nindong kwarta para sa saindong nasyon.

⁷Dai magbabayad nin buhis an Jerusalem saka an Templo. Magdadanay na sadiri nindo an mga armas na ginibo nindo asin an mga depensa na itinugdok nindo dangan pinag-eerokan ngunyan.

⁸Laen pa kaiyan, dai na sisingilon an gabos na utang nindo sa kaban nin yaman kan palasyo o an magigin utang nindo sa maabot na panahon.

⁹Kun mabawi ko na an sakong kahadean, itatao nyamo saimo, sa Templo saka sa bilog na nasyon nindo an dakulang kaomawan, tanganing an saindong kamurawayan magin hayag sa bilog na kinaban.”

¹⁰Kan taon 174, sinalakay ni Antioco an daga kan saiyang mga ginikanan. An kadaklan kan mga soldados nag-apil saiya, kaya dikit na sana an natadang kaapil ni Trifo.

¹¹Kan si Trifo lamagon nin Antioco, duminulag siya pasiring sa syudad nin Dor na nasa tampi kan dagat,

¹²huli ta aram niyang masakit an saiyang kamugtakan huli ta binayaan na siya kan saiyang mga soldados.

¹³Kaya sinalakay ni Antioco an Dor kaiba an syento beynte mil na ekspertong mga soldados saka otso mil na nakakabayong mga soldados.

¹⁴Nagsalakay man an saiyang mga barkong panggera, asin napalibotan niya an syudad, kaya mayo nin siisay man na nakalaog o nakaluwas sa syudad.

¹⁵Kan panahon na iyan, nag-abot sa Jerusalem hale sa Roma si Numenio saka an saiyang mga pag-iriba, dara ining surat para sa nagkapirang hade saka mga nasyon:

¹⁶“Hale ki Lucio, na konsul kan mga Romano, para ki Hadeng Tolome, an sakong pangongomusta.

¹⁷Nag-abot samo an mga sinugo kan mga Judio tanganing bagohon an dati nyamong tipan nin pakipagkatood saka pakipag-alyansa. Sinugo sinda ni Simon na Halangkaw na Padi asin kan banwaan nin mga Judio,

¹⁸dangan dara ninda bilang regalo an sarong bulawan na kalasag na kabangang tonelada an gabat.

¹⁹Kaya nagdesisyon kaming suratan an nagkapirang mga hade saka mga banwa na dai pagkulogan an mga Judio sa ano man na paagi. Dai sinda dapat na makigera sa mga Judio o magtabang sa mga nagsalakay sainda.

²⁰Nagdesisyon kaming akoon an kalasag dangan tabangan sinda.

²¹Kaya kun igwa nin mga traydor na makadulag sa Judea dangan magpaili diyan saindo, itao nindo siya ki Simon na Halangkaw na Padi, tanganing mapadusahan niya sosog sa Katogonan kan mga Judio.”

²²An parehong surat ipinadara man ni Lucio ki Hadeng Demetrio, ki Attalo, ki Ariarates saka ki Arsaces.

²³Nagpadara man siya sa mga lugar na ini: Sampsames, Esparta, Delos, Mindos, Sicyon, Caria, Samos, Panfilia, Licia, Halicarnasso, Rodas, Faselis, Cos, Side, Arado, Gortina, Nido, Chipre, saka Cirene.

²⁴Pinadarahan man niya nin kopya si Simon, an Halangkaw na Padi.

²⁵Sinalakay giraray ni Hadeng Antioco an Dor, asin daing ontok an ginibo niyang pagsalakay. Nagtugdok siya nin mga platapormang panlaom, asin huli kan saiyang barikada, dai nakaluwas o nakalaog si Trifo saka an saiyang mga tawohan.

²⁶Nagpadara si Simon nin duwang ribong ekspertong mga soldados tanganing tabangan si Antioco, siring man nin bulawan, plata patin dakul na kagamitan sa gera.

²⁷Alagad sinayumahan idto ni Antioco, pinawaraan nin halaga an gabos na pinagkaoyonan ninda ni Simon, asin nagin siyang kaiwal kaini.

²⁸Dangan sinugo ni Antioco an sinasarigan niyang opisyal na si Atenobio tanganing makipag-olay ki Simon. Sinabihan ni Atenobio si Simon, “Sakop mo an Jope, an Gezer asin an bantayan nin Jerusalem, mga syudad na kabilang sa sakong kahadean.

²⁹Rinaot mo an mga rehiyon na idto asin dinarahan mo nin dakulang kasakitan an daga. Sinakop mo an dakul na lugar sa sakong kahadean.

³⁰Kaipuhan ibalik mo sako ngunyan an mga syudad na sinakop mo, dangan itao mo sako an kwartang buhis na kinua mo sa mga lugar na sinakop mo sa luwas kan teritoryo nin Judea.

³¹Kun habo mong gibohon ini, kaipuhan magbayad ka nin kinse mil kilos nin plata, dangan dagdagan mo pa nin kinse mil kilos nin plata bilang kabayadan kan mga nagkararaot sagkod kan mga nawarang buhis. Kun magsayuma ka na gibohon an arin man kaini, gegerahon mi ika.”

³²Kan nagduman sa Jerusalem si Atenobio dangan nahiling niya an kamurawayan kan palasyo ni Simon, an bulawan saka plata sa lugar nin bangkete, dangan an dakul na kayamanan, nagngalas siya. Itinao niya ki Simon an mensahe kan hade,

³³asin nagsimbag si Simon, “Dai pa lamang kami nagkua nin daga sa ibang nasyon o nagkua nin anoman na pagsadiri nin iba. Binawi sana nyamo an pagsadiri na minana mi sa samong mga ginikanan, an daga na kaidto kinua samo kan samong mga kaiwal sa salang paagi.

³⁴Ngunyan na igwa kami nin oportunidad, kinukua nyamo an pamana kan samong mga ginikanan.

³⁵Manongod sa Jope saka Gezer na hinahagad nindo, matao kami saindo nin tres mil kilos nin plata, maski ngani dakulang karatan an ginibo sa samong nasyon kan mga nag-eerok sa mga syudad na idto.” Dai nagsimbag nin anoman si Atenobio,

³⁶kundi anggot na nagbalik sa hade. Kan ibareta niya sa hade an sinabi ni Simon, dangan inosip an kamurawayan kan palasyo ni Simon sagkod an gabos niyang nahiling, naanggot nin orog an hade.

³⁷Kan panahon na iyan, naglunad si Trifo sa barko asin nagdulag pasiring sa banwa nin Ortosia.

³⁸Dangan ibinugtak ni Hadeng Antioco si Cendebeo bilang pamayo kan mga lugar sa tampi kan dagat, tinawan nin mga soldados na naglalakaw saka mga nakakabayo,

³⁹asin pinagbotan na magkampo sa atubangan nin Judea. Pinagbotan man niya si Cendebeo na hirahayon an banwa nin Kedron asin papusogon an mga trangkahan, tanganing makalaban siya sa mga Judio. Padagos man na linamag kan hade si Trifo.

⁴⁰Nag-abot si Cendebeo sa Jamnia dangan pinonan an pagpaanggot sa mga Judio sa paagi nin pagsalakay sa Judea, pagdakop nin mga tawo asin paggadan sainda.

⁴¹Hinirahay niya an Kedron dangan nagbugtak siya duman nin mga naglalakaw saka mga nakakabayong mga soldados, tanganing pwede nindang salakayon asin bantayan an mga tinampo nin Judea, sosog sa pagboot kan hade.