Read Central Bicolano 1 Maccabees 16 Bible Online

1 Maccabees 16 - Central Bicolano bible

1 Maccabees 16

¹Naghale sa Gezer si Juan na aking lalaki ni Simon dangan inosip sa ama an ginibo ni Cendebeo.

²Sinabihan ni Simon si Juan saka si Judas, an duwa niyang matuang aking lalaki, “An gabos sa pamilya nin sakong ama, an sakong mga tugang na lalaki saka ako nakilaban sa mga gera nin Israel sa bilog nyamong pagkabuhay, asin kadaklan na beses na ikinaligtas nyamo an Israel.

³Gurang na ako ngunyan, alagad salamat sa Dios, dakula na kamo. Dapat na kamo an magsalihid sako asin sa sakong tugang sa pakilaban para sa satong nasyon. Asin ibahan logod kamo nin Dios.”

⁴Dangan nagtipon si Juan nin sarong hukbo nin beynte mil na naglalakaw saka nakakabayong mga soldados asin nagmartsa sinda laban ki Cendebeo. Duman sinda nagpabanggi sa Modein.

⁵Pagkaagang amay, nagduman sinda sa kapatagan. Sinabat sinda duman nin sarong dakulang hukbo nin mga naglalakaw saka nakakabayong mga soldados, alagad igwa nin salog sa pagultanan kan duwang hukbo.

⁶Nag-andam si Juan asin an saiyang hukbo sa pakikipaglaban saka inatubang an mga kaiwal, alagad kan mahiling ni Juan na takot an saiyang mga soldados sa pagbalyo sa salog, nag-enot siyang magbalyo. Kan mahiling ini kan saiyang mga tawohan, nagsurunod sinda saiya.

⁷Binanga ni Juan an saiyang hukbo asin ibinugtak an nakakabayong mga soldados sa tahaw kan naglalakaw na mga soldados, huli ta dakul an nakakabayong mga soldados kan mga kaiwal.

⁸Pinatanog an mga trompeta para sa pagsalakay, asin nadaog si Cendebeo saka an saiyang hukbo; dakul an nagadan sainda. An natada nagbaralik sa saindang bantayan sa Kedron.

⁹Nalugadan si Judas sa ralaban, alagad padagos na linamag kan tugang niyang si Juan an mga kaiwal sagkod sa Kedron, na hinirahay ni Cendebeo.

¹⁰An mga nagdurulag na soldados nagpasiring sa mga tore sa kaomahan nin Asdod, asin sinulo ni Juan an syudad. Kan aldaw na idto, duwang ribong mga soldados kan kaiwal an nagadan; ligtas na nagpuli si Juan sa Judea.

¹¹Ibinugtak ni Simon na Halangkaw na Padi si Tolome na aking lalaki ni Abubo bilang gobernador kan Kapatagan nin Jerico. Mayaman nin marahay si Tolome,

¹²huli ta manugang siya ni Simon.

¹³Alagad nagin mapaabaw-abaw siya asin nagmawot siyang sakopon an nasyon. Kaya nagplano siyang gadanon si Simon asin an saiyang mga aking lalaki.

¹⁴Dinalaw ni Simon kaiba an mga aki niyang lalaki na si Mattatias saka si Judas an mga banwa tanganing mahiling an mga pangangaipo duman. Nag-abot sinda sa Jerico kan bulan nin Sebat, an ikaonseng bulan, kan taon 177.

¹⁵Pinadagos sinda ni Tolome sa sarong sadit na bantayan na inaapod Dok, na saiyang itinugdok. Igwa siya nin plano na gadanon an duwa kaining aking lalaki. Nagtao siya nin sarong dakulang bangkete para sainda, alagad nagtago siya nin mga tawohan duman sa bantayan.

¹⁶Kan burat na si Simon saka an saiyang mga aki, nagruluwas si Tolome asin an saiyang mga tawohan na may darang mga espada. Nagduman sinda sa lugar nin bangkete, asin ginadan si Simon, an duwa niyang aking lalaki, asin an nagkapira sa saiyang mga sorogoon.

¹⁷Sa paggibo kan kapasaluiban na ini, an karahayan binalosan ni Tolome nin karatan.

¹⁸Dangan nagsurat si Tolome nin sarong pahayag kan ginibo niya asin ipinadara idto sa hade. Sa surat, naghagad siya na padarahan siya nin mga soldados tanganing tabangan siya, asin tanganing itao saiya an mga syudad sagkod an nasyon.

¹⁹Sinuratan niya an mga opisyal kan hukbo sa pag-alok sainda na mag-apil saiya dangan tinugaan niya sinda nin mga plata, bulawan asin mga regalo. Dangan nagsugo siya nin nagkapira sa saiyang mga tawohan na magduman sa Gezer tanganing gadanon si Juan,

²⁰asin an iba tanganing sakopon an Jerusalem sagkod an bulod kan Templo.

²¹Alagad igwa nin sarong nagdalagan asin naenot sa mga tawohan ni Tolome sa pagduman sa Gezer. Inosip niya ki Juan na ginadan an saiyang ama saka mga tugang na lalaki asin na nagsugo nin mga soldados si Tolome tanganing gadanon siya.

²²Natakot nin marahay si Juan pakadangog kan baretang ini, alagad huli ta pinatanidan na siya, nadakop niya dangan ginadan an mga lalaking sinugo tanganing gadanon siya.

²³An iba pang mga ginibo ni Juan magpoon kan magin kasalihid siya kan saiyang ama: an mga pakipaggera niya, an kaisogan na saiyang ginibo, an paghirahay niya kan mga kudal sagkod an iba pa niyang mga ginibo,

²⁴gabos nasusurat sa mga cronica kan saiyang pamamayo bilang Halangkaw na Padi.