Read Central Bicolano 1 Maccabees 3 Bible Online

1 Maccabees 3 - Central Bicolano bible

1 Maccabees 3

¹Si Judas Maccabeo iyo an nagsalihid sa saiyang ama na si Mattatias.

²Tinabangan siya kan mga tugang niya asin kan mga maimbod na parasunod kan saiyang ama. Maogma nindang ipinadagos an pakigera nin Israel.

³Orog na dakulang kamurawayan an itinao ni Judas sa saiyang banwaan. Garo siya higante kun sulot niya an gubing na pakigera. Kinua niya an saiyang mga armas asin nakigera; dinepensahan niya an kampo huli kan saiyang espada.

⁴Garo siya sarong maringis na leon na nag-uungal na nagsasalakay.

⁵Hinanap niya asin linamag an mga naglapas kan Katogonan, asin sinulo niya an gabos na nag-api kan saiyang banwaan.

⁶Sa takot saiya, nagsiribog an mga tawong dai nagmimidbid kan togon; an gabos na maraot nagkariribong. Huli kan saiyang ginibo, nagpadagos an katalingkasan.

⁷Ginibo niyang mapait an buhay nin dakul na hade, alagad dinarahan niya nin kaogmahan an banwaan nin Israel. Oomawon mi siya sagkod pa man huli kan saiyang ginibohan.

⁸Linibot niya an mga banwa nin Judea, asin ginadan an bakong diosnon na mga tawo. Hinale sa Israel an makuring kasakitan.

⁹An saiyang kabantogan nakalakop sa mga poro kan daga, mantang tinipon niya an gabos na hinomaan nin kagadanan.

¹⁰Alagad nagtipon si Apollonio nin sarong hukbo nin mga pagano, kabilang an sarong dakulang grupong hale sa Samaria tanganing salakayon an banwaan nin Israel.

¹¹Kan maaraman ini ni Judas, nagmartsa siya sa pakigera, dinaog an hukbong idto asin ginadan si Apollonio. Dakul na pagano an nagadan, asin an iba nagdurolag.

¹²Kan matipon an mga sinamsam, kinua ni Judas an espada ni Apollonio dangan iyo idto an ginamit niya sa gera sagkod sa aldaw na siya magadan.

¹³Nadangog ni Seron, an heneral kan hukbo nin Siria, na nagtipon si Judas nin sarong dakulang hukbo, kaiba an mga makosog saka maimbod na mga lalaki na gabos andam na lumaban sa pamamayo niya.

¹⁴Nagsaboot si Seron, “Magigin bantog an ngaran ko sa bilog na imperyo kun madaog ko si Judas asin an saiyang mga tawohan na habong gumalang sa pagboot kan hade.”

¹⁵Dangan nag-iba saiya an sarong makosog na hukbo nin bakong diosnon na mga lalaki na boot magtabang saiya sa pagbalos sa mga Israelita.

¹⁶Kan makaabot siya sa agihan sa Bet-horon, nagluwas si Judas kaiba an sarong sadit na grupo nin mga soldados sa pagsabat ki Seron.

¹⁷Kan mahiling kan mga tawohan ni Judas an hukbo na masalakay sainda, naghapot sinda, “Paanong makalaban an sadit nyatong hukbo sa dakulang hukbong iyan? Laen pa kaiyan, pagal kita gabos asin dai nagkakan sa bilog na aldaw!”

¹⁸Nagsimbag si Judas, “Bakong dipisil para sa sadit na hukbo na daogon an sarong dakulang hukbo. Para sa Kagurangnan, mayo nin kalaenan kun ikaligtas kita nin dakul o dikit na tawo.

¹⁹An kapangganahan sa gera dai minadepende sa kadakulaan nin hukbo, kundi sa kapangyarihan nin Kagurangnan.

²⁰An satong mga kaiwal minadatong sa dakulang kapaabaw-abawan asin kadahasan tanganing gadanon kita, an satong mga agom saka mga aki, asin tanganing samsaman kita.

²¹Alagad nakikilaban kita para sa satong buhay asin para sa satong relihiyon.

²²Sa pagsalakay nyato, roronoton nin Kagurangnan an satong mga kaiwal kaya dai kamo matakot sainda.”

²³Pakatapos na magtaram si Judas, hidaling sinalakay niya saka kan saiyang mga tawohan si Seron asin an hukbo kaini. Rinonot ni Judas asin kan saiyang mga tawohan an saindang kaiwal.

²⁴Linamag ninda an mga ini poon sa palugsot na agihan nin Bet-horon sagkod sa kapantayan asin ginadan ninda an maabot sa otso syentos na kaiwal. An mga nakaligtas nakadulag pasiring sa Filistea.

²⁵Pakatapos kaini, an mga pagano saen man na lugar nagkatarakot ki Judas asin sa saiyang mga tugang.

²⁶An kabantogan ni Judas nakaabot sa pandangog ni Hadeng Antioco. Si Judas asin an saiyang mga kapangganahan iyo an pinag-orolayan kan mga namamanwaan nin lambang nasyon.

²⁷Kan nadangog ni Antioco an nangyari, naanggot siya nin makuri. Pinagbotan niya an gabos na hukbo sa saiyang imperyo na magtiripon bilang sarong dakulang hukbo.

²⁸Hale sa sarayan kan saiyang kayamanan, an saiyang mga soldados tinawan niya nin sweldo na para sa sarong taon, asin pinagbotan sinda na mag-andam sa biglang pangyayari.

²⁹Dangan nahiling niya na ubos na an saiyang kayamanan. Dikit an naglaog na kwarta hale sa mga buhis huli kan karibokan saka kasakitan na dinara niya sa kinaban kan haleon niya an mga katogonan na dati nang sinusunod kan enot pang panahon.

³⁰Mas dakul magtao nin mga regalo si Antioco ki sa nagkaerenot na mga hade, alagad ngunyan nahandal siya na tibaad dai na niya mapadagos ini asin mayo na siyang magagasto—nangyari na ini nin saro o duwang beses kaidto.

³¹Grabe an saiyang kahandalan; alagad nagdesisyon siyang magduman sa Persia, maghagad nin buhis sa mga probinsya duman dangan magbalik na dara an dakul na kwarta.

³²Ibinugtak niya si Lisias, sarong mahalagang tawo na nagkamit kan titulong “Kadugo kan Hade,” bilang gobernador na mamamahala kan mga palakaw kan hade magpoon sa Salog nin Eufrates sagkod sa pagdolonan nin Egipto.

³³Si Lisias ginibo man kan hade na paraataman kan aki niyang lalaki na si Antioco an Ikalima, sagkod na siya magbalik.

³⁴Si Lisias ginibo niyang parapamahala kan gabos niyang elepante asin kan kabanga kan saiyang hukbo, dangan tinaraman niya kan gabos na boot niyang mangyari, orog na an dapit sa mga nag-eerok sa Juda asin sa Jerusalem.

³⁵Pinagbotan si Lisias na magpadara nin sarong hukbo laban sa mga Judio sa Jerusalem, tanganing rumpagon an saindang kapangyarihan asin gadanon sinda, tanganing dai na lamang sinda magiromdoman.

³⁶Pinagbotan siyang kuahon an saindang daga asin itao sa mga dayuhan, na boot mag-erok sa lugar na idto.

³⁷Kaiba an kabanga kan saiyang hukbo, naghale an hade sa Antiokia, an saiyang pangenot na syudad, kan taon 147. Binalyo niya an Salog nin Eufrates asin linagbas niya an Mesopotamia.

³⁸Pinili ni Lisias si Nicanor, si Gorgias asin si Tolome, na aking lalaki ni Dorimenes, bilang mga pamayo kan hukbo; may kakayahan an tolong ini, na nagkamit kan titulong “Katood kan Hade.”

³⁹Ginibo niya sindang pamayo nin kwarenta mil na naglalakaw na mga soldados asin syete mil na mga nakakabayo, dangan pinagbotan niya sindang salakayon asin ronoton an daga nin Judea, sosog sa pagboot kan Hade.

⁴⁰Nagmartsa an tolong ini kaiba an bilog nindang hukbo, asin kan nakaabot sinda sa kapantayan na harani sa Emmaus, duman sinda nagkampo.

⁴¹Inapilan sinda nin sarong hukbo na hale sa Idumea asin Filistea. Nabaretaan kan mga negosyante sa rehiyon na idto an kosog kan hukbo, kaya nagduruman sinda sa kampo na may darang kwarta asin mga kadena, sa paglaom na makabakal nin mga Judiong oripon.

⁴²Nahiling ni Judas asin kan saiyang mga tugang na nagin orog na dipisil an saindang kamugtakan, huli ta an mga dayuhan na hukbo nagkampo na sa laog kan saindang mga pagdolonan. Naaraman man ninda na nagboot an hade na ronoton nanggad an banwaan.

⁴³Kaya nagdesisyon sindang hirahayon an raot na nasyon asin makilaban para sa saindang banwaan saka para sa Templo.

⁴⁴Dangan an bilog na komunidad nagtiripon sa pag-andam para sa gera asin sa pagpamibi tanganing maherakan nin Dios.

⁴⁵An Jerusalem arog na sa kalangtadan na mayo nin tawo; mayong nagluwas na namamanwaan o naglaog sa syudad. An banal na Templo dinigtaan kan mga dayuhan, asin an mga bantayan nasakop kan mga pagano; kaya nahale an kaogmahan sa banwaan nin Israel, asin dai na nadangog an tanog kan plawta saka arpa.

⁴⁶Dangan nagtiripon si Judas saka an saiyang mga tawohan asin nagmartsa pasiring sa Mizpa, kahampang kan Jerusalem, huli ta dating igwa kaidto duman nin lugar na pinagsasambahan an banwaan nin Israel.

⁴⁷Nag-ayuno sinda kan aldaw na idto, naggubing nin sako, nagbugtak nin abo sa saindang mga payo asin ginisi an saindang mga gubing.

⁴⁸Sa siring na kamugtakan, minahapot an mga pagano sa saindang mga dios-dios, alagad an mga Israelita minabukas kan libro nin Katogonan tanganing makihumapot sa Dios.

⁴⁹Dinara ninda an mga gubing kan mga padi, an mga enot na bunga kan saindang mga tinanom asin an mga himoloan, dangan pinalaog ninda an nagkapirang Nazireo na nakatapos na kan saindang panuga.

⁵⁰An bilog na komunidad namibi, “Kagurangnan, ano an gigibohon mi sa mga bagay na ini? Saen mi ini dadarahon,

⁵¹ngunyan na tinimaktimakan saka dinigtaan na kan mga pagano an saimong banal na Templo, asin nagmomondo sa sopog an saimong mga padi?

⁵²Nag-abot an mga pagano sa pagsalakay asin paggadan samo. Aram mo an pinaplano ninda!

⁵³Kun dai mo kami tabangan, paano mi sinda malalabanan?”

⁵⁴Dangan pinatanog ninda an mga trompeta asin nagkurahaw sinda nin makosog.

⁵⁵Pakatapos kaini, pinaggrupo-grupo ni Judas an saiyang mga tawohan sa manangribo, mananggatos, maningkwenta asin manampolo, saka nagbugtak siya nin lider sa lambang grupo.

⁵⁶Dangan, sa pagsunod sa Katogonan, pinapuruli niya an mga bago pa sanang kasalon, an mga nakapagpatugdok pa sana kan saindang harong, an mga nakakatanom pa sana sa saindang mga ubasan patin an mga maluya an boot.

⁵⁷Pakatapos, nagmartsa an hukbo asin nagkampo sa habagat na parte nin Emmaus,

⁵⁸saen nagtaram sainda si Judas, “Andama nindo an sadiri sa pakigera saka magmaisog kamo! Sa agang amay, magin andam kamo sa pakilaban sa mga paganong ini na nagkasararo sa pagsalakay saka pagronot sato asin sa satong Templo.

⁵⁹Mas marahay pa sato an magadan na nakikilaban ki sa magmasid sana mantang rinaraot an satong nasyon asin an satong Templo.

⁶⁰Alagad gigibohon nin Kagurangnan an boot niya.”