Read Central Bicolano 1 Maccabees 4 Bible Online

1 Maccabees 4 - Central Bicolano bible

1 Maccabees 4

¹Ipinag-iba ni Gorgias an singko mil na naglalakaw na mga soldados asin sangribo sa pinakaekspertong mga nakakabayo, dangan nagluwas sinda sa saindang kampo sa banggi,

²kaiba an mga lalaking hale sa mga bantayan sa Jerusalem bilang mga giya. Nagplano siya nin biglang pagsalakay sa hukbo kan mga Judio.

³Alagad an planong ini naaraman ni Judas, kaya nagluwas siya kaiba an saiyang mga tawohan dangan sinalakay ninda an hukbo kan hade na nasa Emmaus,

⁴mantang harayo pa sa kampo si Gorgias asin an hukbo kaini.

⁵Kan makaabot an mga ini sa kampo ni Judas pagkabanggi, mayo sindang nanumpongan na tawo duman. Naghona sindang nagdulag si Judas asin an mga tawohan kaini, kaya naghanap sinda sa kabubuldan.

⁶Pagbanaag kan aldaw, nagtunga si Judas sa kapatagan kaiba an tres mil na soldados, maski kulang sinda nin armas.

⁷Nahiling ninda an dakulang hukbo kan mga pagano, na gabos eksperto saka armado, asin igwang katabang na mga nakakabayong soldados.

⁸Alagad sinabihan ni Judas an saiyang mga tawohan, “Dai kamo matakot sa kadakulaan kan saindang hukbo asin dai kamo matakot kun magsalakay sinda.

⁹Giromdoma nindo kun paanong nakaligtas an satong mga ginikanan duman sa Dagat na Pula, kan linamag sinda kan hade nin Egipto kaiba an saiyang hukbo!

¹⁰Ngunyan mamibi kita sa Kagurangnan na maherakan niya kita. Mamibi kita na giromdomon niya an saiyang tipan sa satong mga ginikanan asin ronoton niya an satong mga kaiwal pagsalakay nyato ngunyan.

¹¹Dangan maaaraman kan mga pagano na igwa nin Dios na nagtatabang asin nagliligtas sa Israel.”

¹²Kan nahiling kan mga pagano na nag-aandam para sa gera si Judas asin an saiyang mga tawohan,

¹³nagluwas sinda sa kampo tanganing makilaban. Dangan pinatanog ni Judas asin kan saiyang mga tawohan an saindang trompeta

¹⁴saka nagsalakay. Nadaog sa ralaban an mga pagano asin nagdurulag pasiring sa kapatagan,

¹⁵alagad an mga nakilaban gabos nagkagaradan. Linamag kan mga Israelita an saindang mga kaiwal sagkod sa Gezer, sa kapantayan nin Idumea, asin sa mga banwa nin Asdod saka Jamnia. Maabot sa tolong ribo na mga kaiwal an nagadan kan mga Israelita.

¹⁶Pagbalik ni Judas saka kan saiyang hukbo hale sa paglamag kan mga kaiwal,

¹⁷sinabihan niya an saiyang mga tawohan, “Dai ngona kamo manamsam, huli ta igwa pa kita nin laban. Si Gorgias saka an saiyang mga tawohan yaon sa haraning mga kabubuldan. Kaya mag-andam kita sa pakilaban. Pakatapos kaiyan, kuahon nindo an gusto nindong samsamon.”

¹⁸

¹⁹Nakakatapos pa sana si Judas sa pagtaram kan magtunga sa kabubuldan an sarong grupo nin mga kaiwal.

²⁰Nahiling kan grupong ini na napadulag an saindang hukbo; an aso na nag-iitaas hale sa kampo nagpapahayag na sinulo an saindang kampo.

²¹Pakahiling kaini, nagkatarakot sinda, asin kan mahiling ninda sa kapatagan an hukbo ni Judas na andam sa pakilaban,

²²nagdurulag sinda pasiring sa Filistea.

²³Dangan nagbalik si Judas tanganing samsaman an kampo kan kaiwal; dakul na bulawan saka plata, mga telang kolor asul asin purpura saka iba pang mga kayamanan an saiyang nakua.

²⁴Pagbalik kan mga Judio sa saindang kampo, nag-arawit sinda nin sarong himno: “An Kagurangnan maninigong omawon; an saiyang pagkaherak nagdadanay sagkod lamang.”

²⁵An aldaw na idto nagdara nin dakulang kapangganahan sa banwaan nin Israel.

²⁶Nagduruman ki Lisias an mga paganong nakadulag asin inosip saiya an gabos na nangyari.

²⁷Kan madangog ni Lisias na nadaog sa gera an saiyang hukbo napangalas siya asin nanluya an boot huli ta dai nadaog an Israel, siring sa pagboot kan hade.

²⁸Kan sunod na taon, nagtipon si Lisias nin sarong hukbo nin mga sesenta mil na ekspertong mga soldados asin limang ribong nakakabayong mga soldados, sa pagmawot na madaog an mga Judio.

²⁹Nagmartsa sinda pasiring sa Idumea dangan nagkampo sa Bet-zur. Sinabat sinda ni Judas kaiba an sampolong ribong soldados.

³⁰Kan nahiling ni Judas na makosog nin marahay an saindang mga kaiwal, namibi siya, “Omawon ka, O Paraligtas nin Israel. Inontok mo an pagsalakay kan higante huli sa kamot ni David na saimong sorogoon, asin tinugotan mong daogon ni Jonathan na aki ni Saul asin kan paradara niya nin armas an bilog na hukbo kan mga Filisteo.

³¹Sa siring na paagi, tugotan mo ngunyan an banwaan nin Israel na daogon an samong mga kaiwal. Sopoga sinda, maski nagsasarig sinda sa saindang hukbo.

³²Giboha sindang mga matalaw; tunawa an mapangahas nindang kosog; patakiga sinda sa pag-isip kan maabot nindang pagkadaog.

³³Namomotan asin sinasamba mi ika; kaya tugotan mong magadan mi an samong mga kaiwal, tanganing makapag-awit kami kan saimong mga kaomawan.”

³⁴Nagpoon an ralaban, asin sa hampangan na ralaban, mga limang ribong tawohan ni Lisias an nagadan.

³⁵Kan nahiling ni Lisias na nadadaog an saiyang hukbo, asin kan nahiling niya an kaisogan ni Judas saka kan mga tawohan kaini, na nagpahiling na andam sindang mabuhay o magadan na igwa nin onra, nagdulag siya dangan nagbalik sa Antiokia. Nagtipon siya duman nin nagpapatandan na mga soldados asin nagplanong magbalik giraray sa Judea kaiba an sarong mas dakulang hukbo.

³⁶Nagtaram si Judas asin an saiyang mga tugang, “Ngunyan na nadaog na an satong mga kaiwal, magduman kita sa Jerusalem tanganing linigan an Templo asin konsagrahon giraray iyan.”

³⁷Kaya nagtiripon an bilog na hukbo asin nagtukad sa Bukid nin Sion.

³⁸Naabotan ninda na mayo nin laog an Templo, nadigtaan an altar, sulo an mga trangkahan, garo kadlagan nin doot an mga patyo, asin rumpag an mga kwarto kan mga padi.

³⁹Kaya ginisi ninda an saindang mga gubing, nagmondo nin makuri asin nagbugtak nin abo sa saindang mga payo.

⁴⁰Nagduko sinda sagkod na makaduta sa daga an saindang lalawogon, asin kan patanogon na an mga trompeta, an lambang saro nag-agrangay sa Kagurangnan.

⁴¹Dangan pinagbotan ni Judas an nagkapira sa saiyang mga soldados na salakayon an mga lalaki sa bantayan, mantang linilinigan niya an Templo.

⁴²Nagpili siya nin nagkapirang padi na maninigo asin dayupot sa Katogonan.

⁴³Lininigan ninda an Templo saka hinarale an mga gapong nadigtaan dangan ibinugtak an mga iyan sa sarong bakong malinig na lugar.

⁴⁴Nag-orolay sinda kun ano an gigibohon sa altar para sa tinutong na atang, na dinigtaan

⁴⁵kan mga pagano, asin nagdesisyon sindang rumpagon idto, tanganing dai idto magtindog bilang sarong giromdomon kan saindang kasosopgan. Kaya rinumpag ninda an altar

⁴⁶asin an mga gapo ibinugtak ngona ninda sa sarong tamang lugar sa bulod kan Templo, sagkod na magtunga an sarong propeta na mataram kun ano an dapat gibohon sa mga gapong idto.

⁴⁷Dangan nagkua sinda nin mga gapong dai pa sinapsapan, sosog sa ipinagboboot kan Katogonan ni Moises, asin nagtugdok sinda nin bagong altar na arog kan daan na altar.

⁴⁸Hinirahay ninda an Templo, an laog saka an luwas, asin kinonsagra an mga patyo.

⁴⁹Naggibo sinda nin bagong mga kagamitan, saka dinara sa Templo an kandelero, an altar nin insenso sagkod an lamesa para sa mga tinapay.

⁵⁰Nagtutong sinda nin insenso sa altar saka pinagkotan an mga ilawan sa kandelero, asin nagkaigwa nin ilaw sa Templo!

⁵¹An mga tinapay ibinugtak ninda sa lamesa asin ikinabit an mga kurtina. Sa siring na paagi natapos ninda an gabos na trabaho.

⁵²An ikabeynte y singkong aldaw kan ikasiyam na bulan, an bulan nin Kislev, kan taon 148 iyo an anibersaryo kan ginibong pagdigta kan mga pagano sa Templo. Sa aldaw na idto, sarong sakripisyo an idinolot sa bagong altar sosog sa Katogonan ni Moises. Kinonsagra an bagong altar asin inawit an mga awit sa tanog nin mga arpa, mga plawta saka mga gimbal.

⁵³

⁵⁴

⁵⁵Nagduko an gabos na tawo sagkod na makaduta sa daga an saindang mga lalawogon dangan nagsamba saka nag-omaw sa Kagurangnan na nagtao sainda nin kapangganahan.

⁵⁶Sa laog nin walong aldaw pinagselebrar ninda an pagkonsagra giraray kan altar. Sa dakulang kaogmahan nagdara sinda nin mga tinutong na atang saka nagdolot nin mga dolot para sa katoninongan asin mga dolot nin pasasalamat.

⁵⁷An atubangan kan Templo sinamnohan ninda nin mga bulawan na korona saka mga kalasag, hinirahay ninda an mga trangkahan sagkod an mga kwarto kan mga padi, dangan binugtakan ninda nin mga pintoan.

⁵⁸Ngunyan na nahale na kan mga Judio an kasosopgan na dinara kan mga pagano, nagkaigwa sinda nin dakulang selebrasyon.

⁵⁹Dangan nagdesisyon si Judas, an saiyang mga tugang asin an bilog na komunidad nin Israel na an pagkonsagra giraray kan altar dapat na selebraron na may kaogmahan saka kagayagayahan sa laog nin walong aldaw taon-taon, magpoon sa ikabeynte y singkong aldaw kan bulan nin Kislev.

⁶⁰Dangan nagtugdok sinda nin haralangkaw na kudal saka makosog na mga tore sa palibot kan Bukid nin Sion, tanganing dai na nanggad iyan malaog, matimaktimakan asin madigtaan kan mga pagano.

⁶¹Nagbugtak duman si Judas nin sarong grupo nin mga soldados na mabantay sa Templo. Pinapusog man niya an banwa nin Bet-zur, tanganing an banwaan nin Israel magkaigwa nin sarong bantayan na nakaatubang sa Idumea.