Read Central Bicolano 1 Maccabees 6 Bible Online

1 Maccabees 6 - Central Bicolano bible

1 Maccabees 6

¹Kan nag-agi sa Mesopotamia si Hadeng Antioco an Ikaapat, nadangog niya an manongod sa sarong syudad nin Persia na an ngaran Elimais, na bantog huli kan mga kayamanan na plata saka bulawan.

²Mayaman nin marahay an templo, na igwa nin mga bulawan na kalasag, mga pantahob sa daghan saka mga armas na iwinalat duman ni Alejandro, na aki ni Hadeng Felipe nin Macedonia, na iyo an enot na naghade sa Imperyong Griyego.

³Nagduman si Antioco dangan naghingowang sakopon an syudad asin samsaman, alagad dai niya nagibo iyan huli ta naaraman kan mga namamanwaan duman an saiyang plano,

⁴Dangan linabanan ninda siya. Sa dakulang kamondoan nagdulag si Antioco asin nagbalik sa Babilonia.

⁵Sa Persia, nakaabot saiya an sarong sugo na dara an bareta na nadaog an mga hukbo na ipinadara niya sa Judea.

⁶Napiritan si Lisias saka an saiyang makosog na hukbo na magdulag sa mga Judio, na kuminusog huli sa dagdag na armas, mga kagamitan saka mga sinamsam hale sa nadaog na mga hukbo.

⁷Rinumpag kan mga Judio an inaapod na “An Mangirhat na Katakotan” na pinatindog ni Antioco sa ibabaw kan altar sa Jerusalem. An Templo binugtakan man kan mga Judio nin haralangkaw na mga kudal, arog kaidto, asin sinakop ninda saka pinapusog an banwa nin Bet-zur, saro sa mga banwa kan hade.

⁸Kan madangog kan hade an baretang ini, namongnan siya asin tinakigan nin makuri. Naghigda siya sa makuring kamondoan, huli ta an nangyari salungat nanggad sa saiyang minawot.

⁹Naghelang siya sa laog nin halawig na panahon huli sa makuring kamondoan, sagkod na namatean niya na magagadan na siya.

¹⁰Kaya inapod niya an saiyang mga katood dangan sinabihan, “Dai ako nangangatorog asin nagagabatan an puso ko huli sa kahandalan.

¹¹Hinapot ko an sakong sadiri kun tano ta nangyayari sako an kasakitan na ini, mantang nagin maboot man ako saka namomotan mantang ako iyo pa an naghahade.

¹²Alagad nagiromdoman ko an mga karatan na ginibo ko sa Jerusalem, kan kuahon ko an mga kagamitan na gibo sa plata saka bulawan sa Templo, asin kan naghingowa akong gadanon an mga taga Judea maski mayo man nin dahelan.

¹³Aram ko na ini an dahelan kan mga karatan na nag-abot sako, asin magagadan ako sa dakulang kamondoan digdi sa dayuhan na dagang ini.”

¹⁴Dangan inapod niya si Felipe, saro sa mga katood niya, asin ginibo niya ining parapamahala kan bilog niyang imperyo.

¹⁵Itinao niya ki Felipe an saiyang korona, gubing saka an opisyal na singsing, asin tinawan niya nin kapangyarihan na tukdoan an aki niyang si Antioco an Ikalima, saka andamon ini sa pagigin hade.

¹⁶Nagadan si Hadeng Antioco duman kan taon 149.

¹⁷Kan naaraman ni Lisias na gadan na an hade, ginibo niyang hade an hoben pang si Antioco bilang kasalihid kan saiyang ama. Pinadakula niya si Antioco asin nginaranan niya ining Eupator.

¹⁸Kan panahon na iyan, an mga Israelita, na nag-eerok sa palibot kan Templo, napapalibotan kan mga kaiwal na nasa bantayan sa Jerusalem. Hiningowa kan mga kaiwal na mapasakitan an mga Israelita asin matabangan an mga pagano.

¹⁹Kaya nagdesisyon si Judas na ronoton sinda asin inapod niya an gabos na tawo tanganing salakayon an bantayan.

²⁰Nagtiripon sinda dangan sinalakay an bantayan kan taon 150. Naggamit sinda nin mga platapormang panlaom asin iba pang mga kagamitan sa gera.

²¹Alagad nakadulag an iba na yaon sa bantayan, asin nag-iba sainda an nagkapirang bakong diosnon na mga Israelita. Nagduruman sinda sa hade asin nagsarabi,

²²“Sagkod nuarin ka maghahalat bago ka magbalos huli sa ginibo sa satong mga kahimanwa?

²³Maogma kaming naglingkod sa saimong ama, namuhay sosog sa sinabi niya asin nagsunod kan saiyang mga pagboot.

²⁴Alagad anong karahayan an dinara kaiyan samo? Ngunyan an samong mga kahimanwa nagin samong mga kaiwal. Sa katotoohan ginadan ninda an gabos na nadakop ninda asin sinamsam an samong mga rogaring.

²⁵Bako sana kami an kinulogan ninda; sinalakay man ninda an samong mga kataraed.

²⁶Ngunyan sinalakay na ninda an bantayan sa Jerusalem asin nagpaplanong sakopon idto. Pinapusog man ninda an Templo sagkod an Bet-zur.

²⁷Kun dai ka tolos maghiro, dakul pa an gigibohon ninda dangan dai mo na sinda mapapaontok.”

²⁸Naanggot an hade kan madangog ini. Tinipon niya an gabos na opisyal kan hukbo saka an saiyang mga pinapaniwalaan na mga parahatol.

²⁹Nagkua man siya nin nagpapatandan na mga soldados hale sa ibang daga asin sa mga isla sa Grecia.

³⁰An bilang kan bilog niyang hukbo nakaabot sa syen mil na soldados, beynte mil na nakakabayong soldados dangan treynta y dos na elepanteng tood sa gera.

³¹An hade asin an saiyang hukbo nag-agi sa Idumea dangan pinalibotan ninda an Bet-zur, saen nagralaban sinda sa halawig na panahon. Naggamit sinda nin mga platapormang panlaom, alagad nakilaban nin marahay an mga Judio, nagruluwas sa banwa dangan sinurulo an mga plataporma.

³²Dangan naghale sa bantayan si Judas asin nagkampo sa Bet-zacarias, kahampang sa kampo kan hade.

³³Pagkaagang amay, dinara tolos kan hade an saiyang hukbo sa dalan pasiring sa Bet-zacarias, asin nag-andam para sa pakilaban dangan pinatanog an saindang mga trompeta.

³⁴Inandam man ninda sa pakigera an mga elepante sa paagi nin pagpahiling sa mga ini kan tagok kan pinugang ubas saka iba pang bungang nagtatao nin arak.

³⁵An mga hayop na ini itinalaga niya sa mga soldados, sarong elepante para sa sangribong soldados na naglalakaw, na gabos igwa nin pantahob sa daghan saka helmet na bronse. Saro man na elepante an kaiba kan kinyentos na nakakabayong mga soldados.

³⁶Dai binayaan kan mga soldados an mga elepante; kun saen magduman an elepante, minaduman man an mga soldados.

³⁷An lambang elepante igwa nin kargang sarong platapormang kahoy na nakagakod saiya. An lambang elepante igwa nin lunad na tolo katawo, laen pa kan nagrerenda kaini.

³⁸An ibang nakakabayong mga soldados ibinugtak ni Lisias sa pagultanan kan duwang grupo nin mga naglalakaw na mga soldados, tanganing madepensahan sinda mantang nagsasalakay.

³⁹An kinang kan mga bronse saka bulawan na mga kalasag, na tinamaan kan saldang nakapaliwanag sa kabukidan asin garo mga karaba sa liwanag.

⁴⁰Sarong kabtang kan hukbo kan hade an nakaposisyon sa itaas kan kabukidan mantang an sarong kabtang nasa kababan; alagad may orden sindang mag-abante.

⁴¹Nagkatarakot an gabos na tawo kan madangog ninda an ribok kan saindang mga armas saka an pagmartsa kan dakula asin mapangyaring hukbo.

⁴²Nag-abante sa pakigera si Judas saka an saiyang hukbo, asin nakagadan tolos sinda nin anom na gatos sa hukbo kan hade.

⁴³Kan nahiling ni Eleazar Avaran na mas dakula an sarong elepante ki sa iba, dangan igwa nin armas kan sa hade, naghona siya na lunad duman an hade.

⁴⁴Kaya idinusay niya an saiyang buhay tanganing iligtas an saiyang banwaan asin tanganing mabantog an saiyang ngaran.

⁴⁵Maisog na nagsalakay siya pasiring sa namumugtakan kan elepante, na nasa tahaw nin sarong batalyon nin mga soldados. Ginadan niya an mga kaiwal sa wala saka sa too niya, kaya dakul na soldados kan kaiwal an nagkagaradan.

⁴⁶Duminalagan siya sa irarom kan elepante, asin binuno ini sagkod na nagadan. Buminagsak saiya an elepante kaya nagadan man siya.

⁴⁷Kan nahiling kan mga Judio na makosog an hukbo kan hade asin andam na makilaban, nagsiribog sinda asin nagdurulag.

⁴⁸Nagsakat pasiring sa Jerusalem an hade asin an saiyang hukbo tanganing labanan an mga Judio duman dangan laomon an bilog na Judea saka Jerusalem.

⁴⁹Nakipagtoninong siya sa mga Judio sa Bet-zur, kaya binayaan kan mga Judiong ini an banwa. Kulang an pagkakan para sainda sa laog kan banwa tanganing makatagal sa pagkalaom sainda kan kaiwal, huli ta taon idto kan Sabbath para sa daga, kaya mayo nin tinanom.

⁵⁰Sinakop kan hade an Bet-zur dangan binugtakan nin sarong grupo nin soldados tanganing magbantay duman.

⁵¹Dangan pinalibotan niya an Templo asin sinalakay sa laog nin haloy na panahon. Nagpatindog siya nin mga platapormang panlaom, naggamit nin mga trosong pantumbok, mga makina sa pagtapok nin kalayo saka mga gapo asin iba pang kagamitan sa pagpauran nin pana sagkod darakulang gapo.

⁵²An mga kalaban ninda naggamit man nin mga makinang panggera tanganing labanan an saindang mga kaiwal, kaya nahaloy an ralaban.

⁵³Alagad mayo nin pagkakan sa mga sarayan sa Templo, huli ta taon idto nin Sabbath, asin an mga pagkakan na nasasaray duman kinarakan na kan mga tawong nagdurulag sa mga pagano dangan nagpaili sa Judea.

⁵⁴Grabe an pagkulang kan pagkakan, kaya nagkawararak an mga tawo asin an nagkapira nagpuruli sa saindang mga harong. Nagkapira na sana an natada sa Templo.

⁵⁵Kan panahon na iyan, si Felipe na pinili ni Hadeng Antioco, bago ini nagadan, na iyo an magtukdo sa aki niyang lalaki sa pagigin hade,

⁵⁶nagbalik hale sa Persia saka Media. Nagbalik siya kaiba an hukbo kan hade dangan nagplanong kapotan an pagpadalagan kan gobyerno. Kan nadangog an baretang ini ni Lisias,

⁵⁷hidali siyang nag-andam tanganing maghale. Sinabihan niya an hoben pang hade, an saiyang mga opisyal saka mga tawohan, “Orog kitang nagluluya aroaldaw; kulang kita sa pagkakan asin pusog ining lugar na sinasalakay ta. Laen pa kaiyan, igwa nin mas mahalagang mga bagay sa gobyerno na kaipuhan mangnohon nyato tolos.

⁵⁸Kaya kaolayon ta an mga Judio na ontokon ngona an gera asin makitoninong kita sa bilog na nasyon kan mga Judio.

⁵⁹Tutugotan nyato sindang magsunod kan sadiri nindang mga katogonan saka mga kaugalean arog kan gibo ninda kaidto. An karibokan na ini nagpoon kan pawaraan nyato nin halaga an saindang mga katogonan saka mga kaugalean.”

⁶⁰An pahayag na ini maogmang inako kan hade asin kan saiyang mga opisyal, kaya nakipagtoninong si Lisias sa mga Judio, na inako man kan mga ini.

⁶¹Kan nanuga an hade saka an saiyang mga opisyal na kukuyogon an mga nasasabi sa tipan, nagruluwas sa saindang mga bantayan an mga Judio.

⁶²Alagad kan naglaog an hade sa natad kan Templo sa Bukid nin Sion asin kan nahiling niya an makosog na depensa, linapas niya an tipan dangan nagboot na rumpagon an kudal sa palibot kan Templo.

⁶³Dangan hidali siyang naghale asin nagbalik sa Antiokia, saen naabotan niya si Felipe na namamahala kan syudad. Linabanan niya si Felipe asin pirit na sinakop an syudad.