Read Central Bicolano 1 Maccabees 7 Bible Online

1 Maccabees 7 - Central Bicolano bible

1 Maccabees 7

¹Kan taon 151 naghale sa Roma si Demetrio, na aking lalaki ni Seleuco, kaiba an nagkapirang tawohan. Nagduman sinda sa sarong banwa sa tampi kan Dagat nin Mediteraneo, dangan ipinahayag niya na siya na an hade duman.

²Kan pasiring na siya sa palasyo kan saiyang mga ginikanan, dinakop kan mga soldados si Antioco an Ikalima, saka si Lisias, tanganing darahon sinda ki Demetrio.

³Kan madangog ini ni Demetrio, nagsabi siya, “Habo ko sindang mahiling.”

⁴Kaya ginadan sinda kan mga soldados, asin nagtukaw sa trono si Demetrio.

⁵Dangan nagduruman ki Demetrio an gabos na traydor saka bakong diosnon na mga Judio sa pamamayo ni Alcimo, na nagmamawot na magin Halangkaw na Padi.

⁶Isinumbong ninda sa hade an ibang mga Judio asin nagsabi, “Ginaradan ni Judas saka kan saiyang mga tugang an gabos na nagtabang saimo, dangan pinahale niya kami sa samong daga.

⁷Kaya magsugo ka nin sarong lalaki na masasarigan mo; padumanon mo siya tanganing siyasaton an perwesyong ginibo ninda sa samong rogaring saka sa teritoryo kan hade dangan padusahan niya si Judas, an mga tugang niya sagkod an gabos na nagtabang sainda.”

⁸Kaya pinili kan hade si Bakides, na katood niya asin gobernador kan Mas Dakulang Siria. Dakula siyang tawo sa kahadean asin maimbod sa hade.

⁹Sinugo siya kaiba kan bakong diosnon na si Alcimo, na itinalaan kan hade bilang Halangkaw na Padi; dara ni Alcimo an pagboot na baloson an mga Judio.

¹⁰Naghale sinda sa Antiokia dangan nagduman sa Judea kaiba an sarong dakulang hukbo. Naghingowa si Bakides na madaya si Judas saka an mga tugang kaini, sa paagi nin pagpadara nin mga sugo, na igwang mga mensahe nin pakipagtoninong.

¹¹Alagad kan nahiling ni Judas saka kan saiyang mga tugang an dakulang hukbo na kaiba ni Bakides, dai sinda nagtubod sa sinabi kan mga sugo.

¹²Sarong grupo nin mga paratukdo kan Katogonan an nagduman ki Alcimo saka ki Bakides tanganing maghagad nin hustisya.

¹³An mga Hasideong ini iyo an enot na naghingowang makipagtoninong ki Alcimo saka ki Bakides.

¹⁴Nagsarig sinda ki Alcimo, na sarong padi na gikan ki Aaron, asin naghona sindang dai sinda kaini aanohon.

¹⁵Matoninong na nakipag-olay sainda si Alcimo, asin nagsumpa ini na mayo nin maraot na mangyayari sainda saka sa saindang mga katood.

¹⁶Alagad kan nagsarig na sinda ki Alcimo, dinakop kaini an sesenta sa sainda asin gabos ginadan sa saro sanang aldaw. Siring sa sinasabi sa kasuratan,

¹⁷“Pinabulos an dugo kan saimong maimbod na banwaan, an saindang mga bangkay nagkawararak sa palibot kan Jerusalem, asin mayo nin natada na malubong kan mga nagadan.”

¹⁸Kan nangyari ini, an gabos nagkatarakot ki Alcimo saka ki Bakides, asin nagsarabi sinda, “Dai ninda aram kun ano an kahulogan kan katotoohan o kan hustisya, huli ta linapas ninda an tipan asin an saindang panuga!”

¹⁹Naghale sa Jerusalem si Bakides dangan nagkampo sa Bet-zait. Ipinadakop niya an nagkapirang mga maimbod na Judio asin maski na an dakul na Judiong nag-arapil saiya, dangan ipinagadan niya gabos asin ihinulog sa sarong dakulang kalot.

²⁰An nasyon ibinugtak ni Bakides sa pamamahala ni Alcimo. Winalatan niya si Alcimo nin sarong hukbo tanganing tabangan siya, dangan nagbalik siya sa hade.

²¹Hiningowa nanggad ni Alcimo na siya an magin Halangkaw na Padi.

²²Nag-apil saiya an gabos na nagpaparibok sa banwa. Nasakop ninda an daga nin Judea asin dakul na karatan an ginibo ninda sa Israel.

²³Nahiling ni Judas na mas makuri an karatan na ginibo ni Alcimo saka an mga tawohan kaini ki sa naginibo kan mga pagano.

²⁴Kaya naglibot si Judas sa Judea asin binalos an gabos na nag-apil ki Alcimo. An mga nag-erok sa mga banwa dai niya tinugotan na makahale.

²⁵Kan nahiling ni Alcimo na orog na nagkokosog si Judas saka an mga tawohan kaini, asin kan mareparo niya na dai niya kayang labanan si Judas, nagbalik siya sa hade dangan nagsumbong saiya kan dakulang mga krimen na ginibo ni Judas.

²⁶Kaya sinugo kan hade si Nicanor, saro kan mga bantog niyang opisyal, na anggot sa mga Judio, dara an pagboot na ronoton an mga Judio.

²⁷Nag-abot sa Jerusalem si Nicanor kaiba an sarong dakulang hukbo. Hiningowa niyang dayaon si Judas saka an mga tugang kaini sa paagi nin pagpadara nin alok na pakipagtoninong. Nagsabi siya,

²⁸“Dai na kita maglaban. Madiyan ako saimo kaiba an nagkapirang tawohan tanganing mag-olay nin matoninong.”

²⁹Nagdolok siya ki Judas asin matoninong na nag-olay sinda. Alagad andam na dakopon si Judas kan mga kaiwal.

³⁰Kan maaraman ni Judas na an pagdalaw ni Nicanor kabtang kan maraot na plano niya, natakot siya asin dai na niya sinabat si Nicanor.

³¹Naaraman ni Nicanor na aram na ni Judas an saiyang plano, kaya naghale siya sa Jerusalem dangan sinabat sa gera si Judas duman sa lugar na harani sa Cafarsalama.

³²Mga limang gatos na soldados ni Nicanor an nagadan, asin an natada sa saiyang hukbo nagdulag pasiring sa bantayan sa Jerusalem.

³³Pakalihis nin nagkapirang aldaw, nagduman si Nicanor sa Bukid nin Sion. Nagkapira sa mga padi an nagluwas sa Templo tanganing magsabat saiya nin matoninong kaiba an nagkapirang mga lider kan banwaan, dangan ipahiling saiya an tinutong na atang na dolot para sa hade.

³⁴Alagad pinag-olog-olog niya sinda asin dinigtaan sa paagi nin paglutab sainda. Mapaabaw-abaw na tinaraman niya sinda

³⁵dangan anggot na pinatakot na may kaibang sumpa, “Sagkod na dai nindo sako itinatao si Judas asin an saiyang hukbo sa madaling panahon, susuloon ko an Templong ini pagbalik ko hale sa kapangganahan.” Dangan naghale siya na grabe an kaanggotan.

³⁶Nagduman an mga padi sa patyo dangan nagtirindog sa atubangan kan altar saka kan Templo. Nagpoon sindang maghibi dangan magpamibi,

³⁷“Kagurangnan, pinili mo an Templong ini na magdara kan saimong ngaran asin magin lugar nin pamibian saka hagadan nin tabang kan saimong banwaan.

³⁸Ngunyan baloson mo an lalaking ini asin an saiyang hukbo; tugotan mong magadan sinda sa gera. Giromdoma kun paano sinda naglanghad saimo, kaya hare pagtugot na may matada sa saindang buhay.”

³⁹Naghale si Nicanor sa Jerusalem dangan nagkampo sa Bet-horon. Nakisumaro saiya duman an hukbo kan mga taga Siria.

⁴⁰Kan panahon na iyan, nagkampo si Judas sa Adasa kaiba an tres mil na soldados. Namibi duman si Judas,

⁴¹“Kagurangnan, nagsasabi an mga kasuratan na kan an sarong hade nagpadara nin mga sugo tanganing maglanghad saimo, nagluwas an sarong anghel dangan ginadan an syento otsenta y singko mil kan saiyang mga soldados.

⁴²Ngunyan, sa parehong paagi, ronota an hukbong ini sa atubangan nyamo ngunyan na aldaw asin tugotan mong maaraman kan gabos na si Nicanor pinapadusahan huli ta naglanghad siya kan saimong banal na Templo. Padusahan mo siya sosog sa saiyang karatan.”

⁴³Nagsabatan an mga hukbo kan ikatreseng aldaw kan bulan nin Adar, asin nadaog an hukbo ni Nicanor. Si Nicanor mismo an enot na nagadan sa ralaban,

⁴⁴dangan kan nahiling kan saiyang mga soldados na gadan na siya, itinapok ninda an saindang mga armas asin nagdurulag.

⁴⁵Linamag sinda kan mga Judio sa bilog na aldaw magpoon sa Adasa sagkod sa Gezer. Mantang naglalamag an mga Judio, padagos na pinapatanog ninda an mga trompetang nag-aapod sa pakigera.

⁴⁶Kaya an mga Judiong nag-eerok sa mga baryo sa palibot kan Judea nagruluwas dangan sinalakay an mga nagdurulag na kaiwal sa gabos na direksyon. Huli kaini, an mga kaiwal napiritan na magbalik sa mga naglalamag sainda, kaya gabos sinda nagadan. Mayo sainda nin natadang buhay.

⁴⁷Kinua kan mga Judio an mga sinamsam, dangan pinugotan ninda nin payo si Nicanor asin pinutol an too niyang kamot na mapaabaw-abaw na ibinikyaw niya. Dinara ninda an payo saka kamot dangan ibinugtak sa luwas kan Jerusalem tanganing ipahiling.

⁴⁸Nagkaigwa nin dakulang kaogmahan an mga Judio, asin itinalaan ninda an aldaw na idto bilang sarong espesyal na aldaw nin selebrasyon.

⁴⁹Nagdekreto sinda na an ikatreseng aldaw kan bulan nin Adar gibohon na aldaw nin selebrasyon taon-taon.

⁵⁰Sa kadikit na panahon nagkaigwa nin katoninongan sa daga nin Judea.