Read Central Bicolano 1 Maccabees 8 Bible Online

1 Maccabees 8 - Central Bicolano bible

1 Maccabees 8

¹Nabaretaan ni Judas an kabantogan kan mga Romano, an saindang kosog saka isog sa pakigera, siring man an pagigin andam ninda sa pag-ako kan mga boot mag-ayon sainda bilang mga kaalyansa asin an kasigurohan na magigin katood sinda kan Roma.

²Sinabi saiya an mga gera na linabanan kan mga Romano sagkod an mga kaisogan na ginibo ninda sa mga taga Galia, na nasakop ninda dangan pinabayad nin buhis.

³Naosipan man siya kan ginibo ninda sa Espanya, kun paanong nasakop ninda an mga mina nin plata saka bulawan duman.

⁴Huli kan saindang marahay na pagplano saka kahigosan, nasakop ninda an bilog na rehiyon, maski harayo idto sa Roma. Dinaog ninda an mga hade sa hararayong lugar na nakilaban sainda; makuring gayo an pagkadaog kan mga hadeng idto, kaya an mga natada kaipuhan magbayad nin taonan na buhis.

⁵Linabanan ninda asin dinaog si Felipe saka si Perseo na mga hade nin Macedonia, sagkod an gabos na nag-apil sa mga ini laban sa Roma.

⁶Nadaog ninda maski si Antioco an Dakula, an hade nin Siria, na nagsalakay sainda kaiba an syento beynteng elepante, mga soldados na naglalakaw saka mga nakakabayo asin kaiba an sarong makosog na hukbo.

⁷Binihag nindang buhay si Antioco dangan pinirit siya asin an saiyang mga kasalihid na magbayad nin magabat na buhis, magtao nin mga bilanggo asin isuko an

⁸India, Media, Lydia sagkod an nagkapira sa saindang pinakamarahay na mga daga. Sinadiri ninda ini gabos dangan itinao ki Hadeng Eumenes.

⁹Kan nagplano an mga Griyego na salakayon saka ronoton an mga Romano,

¹⁰naaraman idto kan mga Romano kaya sinugo ninda an sarong heneral tanganing labanan sinda. Dakul na Griyego an nagadan kan mga Romano, binihag an saindang mga agom saka mga aki, sinamsam an saindang mga rogaring, sinakop an saindang daga, ginaba an saindang mga bantayan asin ginibo sindang mga oripon sagkod ngunyan.

¹¹Ginaradan man ninda o ginibong mga oripon an mga nag-eerok sa iba pang mga kahadean, mga isla sagkod an gabos na nakilaban sainda.

¹²Alagad iginalang ninda an saindang mga katood saka mga kaalyansa na nakipagkatood sainda. Dinaog ninda an mga hade sa harani saka sa harayong mga lugar, asin natakot sainda an gabos na nakadangog kan saindang kabantogan.

¹³An iba tinabangan nindang magin hade, alagad an iba hinale ninda sa pagkahade. An kosog ninda lakop sa bilog na kinaban.

¹⁴Alagad minsan siring, mayo man nin saro man na Romano na naghingowang magsulot nin korona o maggubing kan sa hade bilang tanda nin kapaabaw-abawan.

¹⁵Nagmukna sinda nin sarong senado, asin aroaldaw nagtiripon an tres syentos beynteng mga senador tanganing pag-orolayan an mga bagay manongod sa mga tawo asin kun ano an ikakarahay ninda.

¹⁶Taon-taon sarong tawo an tinatawan ninda nin katongdan na mamayo sainda asin magpadalagan kan bilog na teritoryo. An lambang saro nagkuyog sa tawong idto asin mayo nin ororihan sainda.

¹⁷Pinili ni Judas si Eupolemo na aking lalaki ni Juan saka makoapo ni Accos, asin si Jason na aking lalaki ni Eleazar, dangan sinugo niya sinda na makipagkatood asin makipag-alyansa sa mga Romano.

¹⁸Ginibo niya ini tanganing maontok an pang-aapi kan mga taga Siria, huli ta nahiling ninda na an mga Judio ginigibong mga oripon.

¹⁹Pakatapos nin sarong halawig saka masakit na pagbyahe, nakaabot si Eupolemo asin si Jason sa Roma dangan naglaog sa Senado. Ini an sinabi ninda sa katiriponan:

²⁰“Sinugo kami ni Judas Maccabeo, kan saiyang mga tugang sagkod kan gabos na Judio tanganing makipag-alyansa saka makipagtoninong saindo, asin tanganing opisyal kaming ibugtak sa saindong talaan bilang mga kaalyansa asin mga katood nindo.”

²¹Inako kan mga Romano an kapahayagan ninda,

²²asin an minasunod iyo an kopya kan surat na inukit sa mga tablang bronse dangan ipinadara sa Jerusalem tanganing danay na magin giromdom kan ginibong tipan:

²³“Magin marahay logod an dalagan kan nasyon kan mga Romano saka mga Judio sa daga man o sa dagat! Dai man logod sinda magkaigwa nin kaiwal ni makigera!

²⁴Alagad kun enot na gerahon an Roma o an saro sa mga kaalyansa kaiyan saen man na lugar,

²⁵an nasyon kan mga Judio bilog na pusong matabang bilang kaalyansa kan Roma, sosog sa hinahagad kan pangyayari.

²⁶Sosog sa napagkaorolayan, dai tatabangan kan mga Judio an kaiwal sa paagi nin pagtao nin pagkakan, armas, kwarta o mga barko. Kaipuhan gibohon kan mga Judio an saindang katongdan na mayo nin aakoon na balos.

²⁷“Siring man, kun enot na gerahon an nasyon kan mga Judio, an mga Romano bilog na pusong matabang sosog sa hinahagad kan pangyayari.

²⁸Dai tatabangan kan mga Romano an mga kaiwal sa paagi nin pagtao sainda nin pagkakan, armas, kwarta o mga barko sosog sa napagkaorolayan sa Roma. Kaipuhan otobon kan mga Romano an saindang katongdan na mayo nin daya.

²⁹“Iyo ini an napagkaoroyonan sa tipan na ginibo kan mga Romano asin kan mga Judio.

³⁰Alagad kun sa maabot na aldaw, magdesisyon an duwa na dugangan o inaan nin anoman an tipan, sinda an madesisyon kaiyan asin papahalagahan ninda iyan.

³¹“Dangan manongod sa mga karatan na ginigibo ni Hadeng Demetrio laban sa mga Judio, ini an sinurat mi saiya: ‘Tano ta pinapasakitan nindo an mga Judio na mga katood saka kaalyansa mi?

³²Kun magsumbong giraray sinda samo, ipapakilaban mi an saindang deretso asin gegerahon mi kamo sa dagat asin sa daga.’”