Read Central Bicolano 1 Maccabees 9 Bible Online

1 Maccabees 9 - Central Bicolano bible

1 Maccabees 9

¹Kan madangog ni Demetrio na nadaog sa gera si Nicanor asin an saiyang hukbo, sinugo niya giraray si Bakkides saka si Alcimo pasiring sa daga nin Judea, kaiba an tolong kabtang kan hukbo nin Siria.

²Nag-agi sinda sa dalan pasiring sa Gilgal, dangan pinalibotan an Mesalot sa Arbela. Sinakop ninda ini asin dakul an saindang ginadan.

³Kan enot na bulan kan taon 152, nagkampo sinda sa atubangan nin Jerusalem.

⁴Hale duman, nagmartsa sinda pasiring sa Berea, kaiba an beynte mil na naglalakaw na mga soldados saka dos mil na nakakabayong mga soldados.

⁵Nagkampo kaidto si Judas sa Elasa, kaiba an tres mil na piling mga soldados.

⁶Alagad kan nahiling kan mga soldados an dakulang hukbo kan mga kaiwal, nagkatarakot sinda. Dakul sainda an duminulag mala ta otso syentos na sanang mga soldados an natada.

⁷Kan nahiling ni Judas na nagparadikit an bilang kan mga soldados, dangan madali nang magpoon an ralaban, nahandal siya huli ta dai na nin panahon tanganing tiriponon sinda.

⁸Nagluya an saiyang boot, alagad sinabihan niya an mga nagkatarada, “Mag-andam kita sa pagsalakay; tibaad madaog ta sinda.”

⁹Hiningowa kan saiyang mga tawohan na padesganaron siya sa pagsabi, “Mayo na kita nin kosog. Magdulag na sana kita asin iligtas ta an satong buhay. Dangan mabalik kita na may katabang asin labanan ta an mga kaiwal. Kulang na kita ngunyan.”

¹⁰Nagsimbag si Judas, “Dai logod itugot nin Dios an siring na bagay na magdulag ako sainda. Kun mag-abot na an oras ta, magpagadan kita sa kaisogan para sa kapwa tang mga Judio asin dai nyato pagpabayaan na madigtaan an satong ngaran.”

¹¹Nagluwas sa kampo an hukbo ni Bakkides dangan nag-andam laban sa mga Judio. Pinagduwang grupo niya an nakakabayong mga soldados. Nangenotan an pinakamaisog na mga soldados, asin nasa enotan kan bilog na hukbo an mga parapana saka mga paralagpitaw.

¹²Nasa toong kabtang si Bakkides. Pagtanog kan mga trompeta, nag-abante an mga naglalakaw na soldados kan mga kaiwal mantang nag-aantabay sa mag-ibong an duwang grupo nin nakakabayong mga soldados. Pinatanog man kan mga soldados ni Judas an saindang mga trompeta.

¹³Nagtakig an daga sa ribok kan magsabatan na duwang hukbo; nagralaban sinda poon aga sagkod banggi.

¹⁴Nahiling ni Judas na nasa toong kabtang si Bakkides kaiba an makosog na hukbo kaini. Kaya tinabangan siya kan gabos niyang maiisog na mga soldados,

¹⁵asin rinonot ninda an toong kabtang kan hukbo nin Siria asin linamag ninda sagkod sa pamitisan kan kabubuldan.

¹⁶Alagad kan mahiling kan mga Siro na nasa walang kabtang kan hukbo na nadaog an mga nasa toong kabtang, buminirik sinda tanganing salakayon sa likod si Judas saka an saiyang mga tawohan.

¹⁷Nagin mangirhat an ralaban, asin dakul an nagadan sa mag-ibong na hukbo.

¹⁸Nagadan man si Judas, asin nagdurulag an saiyang mga tawohan.

¹⁹Kinua ni Jonathan saka ni Simon an bangkay kan saindang tugang dangan ilinubong sa lulubngan kan saindang pamilya duman sa Modein,

²⁰asin pinagmondoan siya ninda duman sa lulubngan. An bilog na Israel tudok sa pusong nagmondo para saiya sa dakul na mga aldaw. Nagsarabi sinda,

²¹“Nagadan an makosog na bayani asin kagtubos nin Israel!”

²²An iba pang mga ginibo ni Judas, an saiyang mga pakigera, an mga pangyayari na nagpahiling kan saiyang kaisogan asin an dakula niyang mga naginibo dai na isinurat huli ta dakul nin marahay.

²³Pagkagadan ni Judas, nagruluwas hale sa manlaen-laen na lugar sa Israel an mga Judiong dai nagmimidbid kan katogonan, asin man an mga tawong tampalasan.

²⁴Kan mga aldaw man na idto, nagkaigwa nin dakulang gutom, asin an bilog na nasyon nag-arapil sa mga kaiwal.

²⁵Pinili ni Bakkides an nagkapirang bakong diosnon na mga Judio dangan ginibo niyang pamayo kan nasyon.

²⁶Hinanap kan mga Judiong ini an mga katood ni Judas dangan dinara ki Bakkides. Pinasakitan sinda ni Bakkides asin ginibong ngingisihan.

²⁷Saro idtong panahon nin dakulang kasakitan para sa Israel, pinakamakuring kasakitan na inagihan ninda poon kan panahon na dai na sinda nagkaigwa nin mga propeta.

²⁸Dangan nagtiripon an mga katood ni Judas asin nagsabi ki Jonathan,

²⁹“Poon kan pagkagadan kan tugang mong si Judas, mayo na nin arog saiya na pwedeng mamayo samo sa pakilaban sa mga kaiwal, ki Bakkides asin sa mga kahimanwa ta na nagkokontra sato.

³⁰Kaya ngunyan ika an pinipili ming kasalihid niya bilang samong pamayo asin lider tanganing ipadagos an samong pakigera.”

³¹Inako ni Jonathan an katongdan kan aldaw na idto asin siya an nagin kasalihid kan tugang niyang si Judas.

³²Kan maaraman ini ni Bakkides, nag-isip siyang gadanon si Jonathan.

³³Alagad nakaabot ki Jonathan an baretang ini, kaya nagdulag siya kaiba an tugang niyang si Simon sagkod an saindang mga tawohan pasiring sa kapantayan nin Tekoa dangan nagkampo sa tampi kan sapa nin Asfar. (

³⁴Naaraman ini ni Bakkides sa aldaw na Sabbath dangan ibinalyo niya an Jordan kaiba an bilog niyang hukbo.)

³⁵Sinugo ni Jonathan an tugang niyang si Juan, na iyo an namahala kan mga pamilya kan mga soldados, tanganing makimaherak sa mga Nabateo, na mga katood niya, na tugotan siyang sarayon an saindang mga kagamitan sa mga sarayan kan mga Nabateo.

³⁶Alagad sinalakay si Juan kan mga aking lalaki ni Jambri kan Medeba, binihag siya, dangan kinua an gabos na kagamitan.

³⁷Pakatapos kan pangyayaring ini, naaraman ni Jonathan saka ni Simon na saiyang tugang, na an mga aking lalaki ni Jambri magkakaigwa nin sarong dakulang kasal dangan solemneng kukuahon an nobya hale sa banwa nin Nadabat. An nobya iyo an aki kan saro sa mga dakulang prinsipe nin Canaan.

³⁸Boot magbalos si Jonathan saka si Simon huli kan pagkagadan kan tugang nindang si Juan, kaya nagtukad sinda sa saro sa mga bukid dangan duman naghipa.

³⁹Nagbantay sinda asin nahiling ninda an sarong maribok na grupo na may mga darang kagamitan. Naglalakaw an nobyo, an saiyang mga katood saka mga kadugo tanganing sabaton an grupo kan nobya. Igwa sinda nin mga armas asin nagtutugtog nin tamborin saka iba pang instrumento.

⁴⁰Sinalakay sinda kan mga Judio dangan ginadan an dakul sainda. An iba nakadulag pasiring sa kabukidan; kinua kan mga Judio an saindang mga kagamitan.

⁴¹Kaya an kasal nagin sarong panahon nin pagmondo, asin an maogmang musika nagin mga awit nin panambitan.

⁴²Kan nakabalos na nanggad si Jonathan saka si Simon huli kan pagkagadan kan saindang tugang, nagbalik sinda sa katiboan sa tampi kan Salog nin Jordan.

⁴³Naaraman ini ni Bakkides asin nag-abot siya sa aldaw na Sabbath sa pangpang kan Jordan kaiba an sarong dakulang hukbo.

⁴⁴Sinabihan ni Jonathan an saiyang mga tawohan, “Kaipuhan makilaban kita ngunyan para sa satong buhay. Iba an ngunyan ki sa nakalihis na aldaw.

⁴⁵Nasa atubangan ta an satong mga kaiwal, nasa likod ta an salog asin sa ibong ta an katiboan. Mayo kitang madudulagan.

⁴⁶Kaya mamibi kamo ngunyan sa Kagurangnan tanganing iligtas kita sa satong mga kaiwal.”

⁴⁷Nagpoon an ralaban, asin gagadanon na kutana ni Jonathan saka kan saiyang mga tawohan si Bakkides, kan makadulag ini pasiring sa likodan kan hukbo.

⁴⁸Kaya naglukso sa salog si Jonathan saka an saiyang mga tawohan dangan naglangoy pasiring sa ibong kan salog tanganing magdulag. Dai sinda linamag kan mga kaiwal.

⁴⁹Kan aldaw na idto sangribong soldados an nagadan sa hukbo ni Bakkides.

⁵⁰Kan nakabalik na si Bakkides sa Jerusalem, nagpatugdok siya nin mga pinapusog na bantayan sa Judea, na igwa nin haralangkaw na mga kudal saka mga trangkahan na binaratan. Itinugdok an mga ini sa mga banwa nin Emmaus, Bet-horon, Betel, Timnat, Piraton, Tefon saka Jerico.

⁵¹Binugtakan niya an mga ini nin mga bantay na soldados tanganing takoton an mga Judio.

⁵²Pinapusog man niya an mga bantayan sa mga banwa nin Bet-zur asin Gezer sagkod an bantayan sa Jerusalem. Nagbugtak siya nin mga bantay na soldados duman asin nagsaray nin mga pagkakan.

⁵³Dangan dinakop niya an mga aking lalaki kan mga namamayo kan daga bilang mga bihag asin ibinilanggo sa bantayan sa Jerusalem.

⁵⁴Kan ikaduwang bulan kan taon 153, nagboot an Halangkaw na Padi na si Alcimo na rumpagon an kudal kan patyo sa laog kan Templo. Mararaot kutana an ginibo kan mga propeta, alagad kan popoonan na an pagrumpag,

⁵⁵inatake sa puso si Alcimo, asin naontok an trabaho. Naparalisar siya saka dai na niya ikinabuka an saiyang ngoso. Huli kaini dai siya makapagtaram ni makagibo nin testamento para sa saiyang pamilya.

⁵⁶Nagadan siya sa dakulang kasakitan.

⁵⁷Kan maaraman ni Bakkides na gadan na si Alcimo, nagbalik siya ki Hadeng Demetrio, asin an daga nin Judea nagkaigwa nin katoninongan sa laog nin duwang taon.

⁵⁸Huli kaini nagtiripon an traydor na mga Judio asin nagsarabi, “Nabubuhay nang matoninong asin matiwasay si Jonathan saka an saiyang mga tawohan. Kun padigdihon ta si Bakkides, pwede niyang bihagon sinda gabos sa laog sana nin sarong banggi.”

⁵⁹Kaya nagduman sinda asin nakipag-olay ki Bakkides.

⁶⁰Pakatapos kan pag-orolay nagmartsa si Bakkides kaiba an sarong dakulang hukbo. Hilom na nagpadara siya nin mga surat sa gabos niyang kaalyansa sa Judea na dakopon si Jonathan asin an mga tawohan kaini. Alagad dai nangyari ini huli ta naaraman an saindang plano.

⁶¹Nadakop ni Jonathan saka ni Simon an singkwentang traydor na mga lider na kaayon sa pagplano dangan saindang ginadan.

⁶²Pakatapos kaini, nagsibog sa Bet-basi duman sa kalangtadan si Jonathan, si Simon asin an saindang mga tawohan. Hinirahay ninda an narumpag na mga bantayan asin pinapusog an depensa kan banwa.

⁶³Kan naaraman ini ni Bakkides, tinipon niya an bilog niyang hukbo asin pinaandam an mga kaapil niya sa Judea.

⁶⁴Pinalibotan niya dangan sinalakay an Bet-basi asin nagtugdok nin mga platapormang panlaom. Pakatapos nin halawig na ralaban,

⁶⁵luminuwas sa banwa si Jonathan kaiba an nagkapirang lalaki. Iwinalat niya si Simon tanganing iyo an mamahala kan banwa.

⁶⁶Sinalakay ni Jonathan si Odomera asin an saiyang mga tawohan, dangan an kampo ni Fasiron. Pagkadaog sainda, nag-apil sinda ki Jonathan dangan nag-iba saiya sa pagsalakay laban ki Bakkides.

⁶⁷Kan panahon na iyan, nagluwas sa banwa si Simon asin an saiyang mga tawohan dangan sinurulo an mga platapormang panlaom.

⁶⁸Sa ralaban, nadaog ninda si Bakkides; grabe an kamondoan niya huli ta mayo nin nangyari sa saiyang mga plano.

⁶⁹Naanggot siyang marahay sa traydor na mga Judio na nagdagka saiya na magduman sa Judea, kaya ginadan niya sinda gabos. Dangan nagdesisyon si Bakkides na magbalik sa saiyang nasyon.

⁷⁰Kan naaraman ini ni Jonathan, nagpadara siya nin mga sugo ki Bakkides tanganing makipagtoninong saiya asin tanganing makabalik an mga Judiong bilanggo.

⁷¹Nag-oyon si Bakkides sa kahagadan ni Jonathan asin nanumpa na papabayaan niyang mamuhay na matoninong si Jonathan sa bilog kaining pagkabuhay.

⁷²Ibinalik ni Bakkides an mga bilanggo dangan nagbalik siya sa saiyang nasyon. Dai na nanggad siya nagduman sa teritoryo kan mga Judio.

⁷³Naontok an gera sa Israel. Nag-erok si Jonathan sa Micmas dangan nagpoon sa pagpamahala kan banwaan asin sa paghale sa Israel kan traydor na mga Judio.