Read Central Bicolano 2 Maccabees 1 Bible Online

2 Maccabees 1 - Central Bicolano bible

2 Maccabees 1

¹“Surat na hale sa mga Judio sa Jerusalem saka sa Judea para sa saindang mga tugang sa Egipto, an samong maogmang pangongomusta.

²“Gibohan logod kamo nin Dios nin karahayan asin giromdomon logod niya an saiyang tipan ki Abraham, ki Isaac saka ki Jacob, na saiyang mga maimbod na sorogoon.

³Panoon logod niya nin kamawotan an saindong puso na magsamba saiya saka maggibo kan saiyang kabotan sa bilog nindong puso asin kalag.

⁴Tabangan logod niya kamo na masabotan an saiyang togon asin an saiyang mga pagboot. Itao logod niya saindo an katoninongan,

⁵simbagon an saindong mga pamibi, patawadon an saindong mga kasalan, asin dai nanggad kamo pagtalikodan sa panahon nin kasakitan.

⁶Digdi sa Juda, namimibi kami ngunyan para saindo.

⁷“Kan taon 169, kan si Demetrio iyo an hade sa Siria, nagsurat kami tanganing sabihan kamo manongod kan persekusyon asin kan masakit na panahon na nag-abot samo sa laog kan mga taon pakatapos na magrebelde si Jason sa awtoridad sa Banal na Daga.

⁸Sinulo niya asin kan saiyang mga tawohan an mga trangkahan kan Templo saka ginaradan an mga tawong mayo nin sala. Dangan namibi kami sa Kagurangnan asin sinimbag niya an samong mga pamibi. Kaya nagsakripisyo kami nin mga hayop asin nagtao nin mga dolot na pagkakan. Pinagkotan mi an mga ilaw sa Templo, asin inandam an sagradong mga tinapay.

⁹Iyo ini an dahelan kun tadaw ta sinasadol mi kamo na selebraron an Pyesta nin mga Harong-harong sa bulan nin Kislev. Sinurat ini sa taon 188.”

¹⁰“Surat na hale sa mga Judio sa Jerusalem saka sa Judea, hale sa senado kan mga Judio asin hale ki Judas, para ki Aristobulo na sarong kapagarakian nin mga padi asin paratukdo ni Hadeng Tolomeo, siring man para sa mga Judio sa Egipto, an samong pangongomusta asin marahay na hawak saindo.

¹¹“Nagpapasalamat kami sa Dios huli ta ilinigtas niya kami sa dakulang pag-alaman. Arog kami sa mga lalaking andam na makilaban sa sarong hade,

¹²alagad inalaw nin Dios an mga kaiwal hale sa banal na syudad.

¹³Kan mag-abot sa Persia si Hadeng Antioco, garo masakit na madaog mi an saiyang hukbo, alagad rinonot sinda sa templo kan diosang si Nanea huli sa pandadaya na ginibo kan mga padi ni Nanea.

¹⁴Nagduman si Hadeng Antioco sa templo kaiba an pinapaniwalaan niyang mga parahatol, tanganing agomon an diosa sa katuyohan na makua an kayamanan sa templo bilang regalo sa saindang kasal.

¹⁵An kayamanan ilinuwas kan mga padi hale sa sarayan kaya naglaog sa templo si Antioco asin an nagkapira sa saiyang mga tawohan tanganing kuahon an kayamanan. Alagad pakalaog niya, sinerahan kan mga padi an mga pintoan.

¹⁶Binukasan ninda an sekretong pintoan sa kisame saka ginapo sagkod na nagadan si Antioco asin an mga tawohan niya. Dangan pinurotol ninda an mga bangkay saka itinapok an mga payo sa mga tawong nasa luwas.

¹⁷Omawon an Dios huli sa pagpadusa sa mga maraot na tawong idto! Omawon siya sa gabos na ginibo niya!

¹⁸“Huli ta seselebraron mi an paglinig kan Templo sa ikabeynte y singkong aldaw kan bulan nin Kislev, inisip mi na mahalagang paisihon kamo tanganing selebraron man nindo an Pyesta nin mga Harong-harong asin an Pyesta nin Kalayo na itinao kan si Nehemias, na nagtugdok kan Templo asin kan altar, nagdolot nin mga sakripisyo.

¹⁹Kan panahon na dinadara an satong mga ginikanan bilang mga bihag sa Persia, an nagkapirang maimbod na mga padi kuminua nin kalayo sa altar saka hilom na itinago sa sarong mamarang bubon. Marahay an pagkatago ninda sa kalayo kaya mayo nin nakadiskubre.

²⁰Pakalihis nin dakul na taon, asin kan nawilihan nin Dios, sinugo kan emperador nin Persia si Nehemias na magpuli sa Jerusalem, dangan sinabihan ni Nehemias an mga kapagarakian kan mga padi na idto na hanapon an kalayo. Ibinareta ninda samo na mayo sinda nin nahiling na kalayo kundi tubig na malana. Sinabihan sinda ni Nehemias na tumabo nin kadikit kan tubig saka darahon saiya.

²¹Kan ibugtak na sa altar an mga bagay para sa sakripisyo, pinagbotan niya sinda na iula an tubig sa kahoy asin sa sakripisyo.

²²Pakagibo kaini asin pakalihis nin nagkapirang minuto, nagtunga an aldaw hale sa likod kan mga panganoron, asin biglang nagkalayo an gabos na nasa ibabaw kan altar. Nangaralas an gabos sa saindang nahiling.

²³Mantang natututong an sakripisyo, pinangenotan ni Jonathan na Halangkaw na Padi sa pagpamibi an mga tawo asin nagsimbag si Nehemias saka an mga tawo.

²⁴“Siring kaini an pamibi ni Nehemias: ‘Kagurangnan Dios, Kaglalang kan gabos na bagay, makangangalas ka asin makosog, alagad maheherakon ka saka matanos. Ika sana an hade. Mayo nin maboot kundi ika;

²⁵mayo nin matinao saka matanos kundi ika sana. Makakamhan ka asin mayo nin kataposan, andam sagkod lamang na iligtas an Israel sa kasakitan. Pinili mo an samong mga ginikanan na magin sadiri mong espesyal na banwaan.

²⁶Akoa an sakripisyong ini na idinodolot mi para sa bilog na Israel. Ingatan mo an banwaan na pinili mo asin giboha kaming banal.

²⁷Talingkasan mo an mga oripon sa mga dayuhan na daga asin tipona an nagkawararak ming banwaan. Kaheraki an samong banwaan na pinapasakitan asin isinisikwal, tanganing maaraman kan mga pagano na ika an samong Dios.

²⁸Padusahan mo an makuri saka mapaabaw-abaw na mga tawo na nag-aapi samo;

²⁹dangan gibohang pusog an saimong banwaan sa saimong banal na daga, siring kan ipinanuga mo sa paagi ni Moises.’

³⁰“Dangan nag-arawit nin mga himno an mga padi.

³¹Kan matutong na an gabos na sakripisyo, nagboot si Nehemias na iula sa darakulang gapo an natadang tubig.

³²Kan iula ninda ini, biglang may nag-itaas na kalayo, alagad pinalsok ini kan laad hale sa kalayo sa altar.

³³“An pangyayaring ini nakalakop maski saen. Nabaretaan kan emperador nin Persia na igwa nin tubig na nakua sa lugar na pinagtagoan kan kalayo kan mga padi, bago sinda dinarang mga bihag. Nabaretaan man niya na an tubig ginamit ni Nehemias asin kan saiyang mga katood sa pagtutong kan sakripisyo sa altar.

³⁴Kan magsiyasat an emperador, naaraman niya na totoo an pangyayari kaya ipinakudal niya an lugar dangan ipinahayag niya ining sagradong lugar.

³⁵Nagin ginikanan ini nin dakulang kwarta para sa hade, asin ginamit niya an kwarta bilang regalo sa mga tawong nawilihan niya.

³⁶An tubig inapod ni Nehemias asin kan saiyang mga katood na neftar, na an kahulogan ‘paglinig,’ alagad inapod ining ‘nafta’ kan kadaklan.