Read Central Bicolano 2 Maccabees 10 Bible Online

2 Maccabees 10 - Central Bicolano bible

2 Maccabees 10

¹Sa pangengenot nin Kagurangnan, nabawi ni Judas Maccabeo asin kan saiyang mga tawohan an Templo saka an syudad nin Jerusalem.

²Rinumpag ninda an mga altar na itinugdok kan mga dayuhan sa mga plasa, siring man an iba pang lugar na pagsasambahan.

³Lininigan ninda an Templo saka nagtugdok sinda nin bagong altar. Dangan, sa enot na beses sa laog nin duwang taon, nagdolot sinda nin sakripisyo sa kalayong inamak huli kan duwang pinagkuskos na gapo. Nagtutong sinda nin insenso, nagpagkot nin mga ilawan saka nagbugtak nin sagradong mga tinapay.

⁴Pakatapos na magibo ninda ini, nagdapa sinda sa daga saka namibi sa Kagurangnan na dai na nanggad sinda pagpadarahan kan siring na mga kasakitan. Hinagad ninda saiya na kun nagkasala sinda, magin maheherakon siya sa pagpadusa sainda asin na dai na sinda ipagtao sa paralanghad saka makuring mga nasyon.

⁵Kinonsagra ninda an Templo kan ikabeynte y singkong aldaw kan bulan nin Kislev, kan parehong aldaw kan parehong bulan na dinigtaan kan mga pagano an Templo.

⁶An maogmang pagselebrar ginibo ninda sa laog nin walong aldaw, na arog kan pagselebrar kan Pyesta nin mga Harong-harong. Nagiromdoman kan mga tawo na dai pa sana nahahaloy, nagselebrar sinda kan Pyesta nin mga Harong-harong mantang naglalagalag sinda na garo mga lalaw na hayop sa kabukidan saka nag-eerok sa mga lungib.

⁷Alagad ngunyan, nagparada sinda na may darang mga berdeng sanga kan palma asin mga sugkod na nasasamnohan nin dahon na yedra, mantang inaawit ninda an mga himno nin pasalamat sa saiya na nagtao sainda nin oportunidad tanganing malinig an sadiri niyang Templo.

⁸Nag-oroyon an lambang saro na an bilog na nasyon kan mga Judio dapat na magselebrar taon-taon kan pyestang ini.

⁹Siring kaidto an kataposan kan buhay ni Antioco na inapod man na Epifanes.

¹⁰Ipapahayag mi ngunyan an manongod ki Antioco Eupator, na aki kan bakong diosnon na tawong ini, dangan itatao mi an pinahalipot na istorya kan karatan na nagin bunga kan saiyang mga pakigera.

¹¹Kan maghade na si Antioco Eupator, itinalaga niya an sarong tawo na an ngaran Lisias bilang parapamahala kan palakaw kan gobyerno saka bilang pamayong gobernador kan Dakulang Siria.

¹²Siya an nagsalihid ki Tolome Macron, an enot na gobernador na nagin marahay an pagtratar sa mga Judio. Nakipagtoninong sainda si Macron tanganing mabayadan an kasakitan na tinios ninda.

¹³Huli kaini, nagduman ki Eupator an mga Katood kan Hade saka nagsumbong na nagpasaluib si Macron huli ta binayaan kaini an isla nin Chipre na ibinugtak sa saiyang pamamahala ni Hadeng Filometor nin Egipto, dangan nagkampi ki Antioco Epifanes. Bunga kaini, an lambang saro inapod si Macron na sarong traydor. Kaya kan dai na siya iginalang kan mga tawo, naghugot siya sa paagi nin pag-inom nin hudong.

¹⁴Kan magin gobernador si Gorgias sa daga nin Idumea, nagkua siya nin mga soldados na binabayadan dangan kun nagkakaigwa nin oportunidad, sinasalakay niya an mga Judio.

¹⁵Laen pa kaiyan, nakapotan kan mga Idumeo an mahahalagang bantayan asin danay nindang pineperwisyo an mga Judio. Inako ninda an mga nagdulag hale sa Jerusalem sagkod hiningowa nanggad ninda na dai mag-ontok an gera.

¹⁶Alagad namibi si Judas Maccabeo saka an saiyang mga tawohan sa paghagad nin tabang sa Dios. Dangan hidali sindang nagluwas saka maisog na nagsalakay sa mga bantayan kan mga Idumeo.

¹⁷Dinaog ninda an mga nagdepensa kan mga kudal patin sinakop an mga bantayan. Ginadan ninda an lambang nanumpongan ninda, na uminabot sa bilang na beynte mil katawo.

¹⁸Alagad puminaili an mga nuebe mil na mga kaiwal sa duwang masasarig na bantayan, na igwa kan gabos nindang kaipuhan tanganing makatagal kun sinda salakayon.

¹⁹Kaipuhan magduman si Judas sa mga lugar na orog siyang kaipuhan, alagad iwinalat niya si Simon saka si Jose, siring man si Zakeo saka an mga tawohan kaini. Dakula nin marahay an hukbong ini kaya padagos an pagsalakay,

²⁰alagad si Simon igwa nin mga tawohan na paslo sa kwarta, na kan alokon kan mga nasa bantayan nin syento kwarentang libra nin plata, pinabayaan nindang magdulag hale sa mga bantayan an mga kaiwal.

²¹Kan naaraman ni Judas an nangyari, inapod niya an mga lider kan saiyang hukbo saka inakusar an mga tawong nagpabakal kan saindang mga tugang sa paagi nin pagpadulag sa mga kaiwal tanganing makilaban sainda.

²²Ipinagadan niya an mga traydor, dangan sinakop tolos an duwang bantayan.

²³Danay na nanggagana sa gera si Judas, asin kan magsalakay siya sa duwang bantayan, ginadan niya an beynte mil na kaiwal.

²⁴Nadaog na kaidto kan mga Judio, si Timoteo. Kaya nagtipon siya nin sarong dakulang hukbo nin tinandanan na mga soldados saka nin dakulang bilang nin mga nakakabayong soldados na hale sa Asia. Kan andam na an gabos, nagluwas sinda sa pagsalakay sa Judea.

²⁵Alagad kan naghaharani na an mga kaiwal, namibi sa Dios si Judas saka an saiyang mga tawohan. Nagsulot sinda nin sakong gubing, nagbugtak nin abo sa saindang payo,

²⁶saka nagdapa sa mga tangga kan altar. Nakimaherak sinda sa Dios na tabangan sinda sa paagi nin pakilaban sa saindang mga kaiwal, siring kan panuga niya sa saiyang Katogonan.

²⁷Pakatapos nindang mamibi, kinua ninda an saindang mga armas, naglakaw nin harayo paluwas sa Jerusalem, saka nag-ontok pagkabanggi sa lugar na harani sa mga kaiwal.

²⁸Pagsirang kan aldaw, naglaban an duwang hukbo. An hukbo kan mga Judio nagsarig na manggagana bako sana huli kan saindang kaisogan kundi huli kan panarig ninda sa Kagurangnan, mantang an mga kaiwal nagsarig sana sa saindang kakayahan na mayo nin takot kun makilaban.

²⁹Kan nagin mangirhat na an ralaban, nakahiling an mga kaiwal nin limang gwapong lalaki na nakalunad sa mga kabayong igwa nin rendang bulawan, asin nangengenot sinda sa hukbo kan mga Judio.

³⁰Pinalibotan kan mga lalaking ini si Judas tanganing ingatan kan sadiri nindang mga armas. Pinauranan ninda nin mga busog saka kikilat an mga kaiwal. Nagkatararanta an hukbo kan mga kaiwal, kaya ribong na nagkasiriblag sinda.

³¹Ginadan kan mga Judio an beynte mil kinyentos na soldados na naglalakaw saka an seis syentos na soldados na nakakabayo.

³²Nakadulag si Timoteo pasiring sa bantayan sa Gezer, na pusog an pagkakakudal. An namamahala sa bantayan na iyan iyo si Chaereas na tugang ni Timoteo.

³³Dakula an entusyasmo na pinalibotan ni Judas asin kan saiyang mga tawohan an bantayan sa laog nin apat na aldaw.

³⁴Alagad an pusog na bantayan iyo an sinarigan kan mga tawong nasa laog kaiyan asin nagkurahaw sinda nin manlaen-laen na maraot na tataramon laban sa mga Judio patin sa saindang Dios.

³⁵Kaya huli sa makuring kaanggotan kan mga tawohan ni Judas, kan magsirang an aldaw kan ikalimang aldaw, beynte sainda an maisog na nagsakat sa kudal asin mangirhat na ginadan an lambang nanumpongan ninda.

³⁶An iba man nagsakat sa ibong na parte kan bantayan saka sinulo an mga tore. Dakul sa mga kaiwal an nagadan kan maglakop an kalayo. Rinaot man kan ibang mga tawohan an mga trangkahan dangan pinalaog an mga kaibahan ninda tanganing sakopon an syudad.

³⁷Nakatago si Timoteo sa sarong bubon, alagad ginadan ninda siya, siring man an saiyang tugang na si Chaereas saka si Apollofanes.

³⁸Pakatapos kaini, nagselebrar an mga Judio. Nag-awit sinda nin mga himno saka mga awit nin pasalamat sa Kagurangnan, na nagpahiling sainda nin dakulang pagkaherak patin nagtao sainda nin kapangganahan.