Read Central Bicolano 2 Maccabees 11 Bible Online

2 Maccabees 11 - Central Bicolano bible

2 Maccabees 11

¹Dai nahaloy naaraman ni Lisias, na bantay asin kadugo kan hade patin pamayo kan gobyerno an pagkadaog ni Timoteo. An pangyayaring ini ikinaanggot niya

²kaya tinipon niya an otsenta mil na soldados na naglalakaw saka an gabos niyang soldados na nakakabayo asin nagluwas sinda tanganing makigera sa mga Judio. An saiyang katuyohan iyo na gibohon na sarong Griyegong syudad an Jerusalem,

³dangan papagbayadon nin buhis an Templo arog kan ginigibo niya sa gabos na paganong mga lugar na pagsasambahan, asin taon-taon ipabakal an katongdan kan Halangkaw na Padi.

⁴Maogmang gayo si Lisias sa kadakul niyang soldados na naglalakaw, sa rinibo niyang soldados na nagkakabayo, asin sa otsenta niyang elepante, kaya dai niya pinahalagahan an kapangyarihan kan Dios.

⁵Nagsakyada siya sa Judea saka sinalakay an bantayan sa Bet-zur, na mga treynta y dos na kilometros an distansya sa Jerusalem.

⁶Naaraman ni Judas asin kan saiyang mga tawohan na pinalibotan ni Lisias an saindang mga bantayan, kaya kaiba an gabos na tawo nagkurahaw saka naghaya sinda. Nakimaherak sinda sa Kagurangnan na padarahan sinda nin sarong marahay na anghel tanganing iligtas sinda.

⁷Si Judas an enot na nagkua nin mga armas, dangan sinadol niya an mga tawo na mag-iba saiya saka idolot an saindang buhay para sa kapwa Judio. Kaya dakula an kasibotan na nagluwas sinda.

⁸Alagad dai pa lamang sinda nakakaharayo sa Jerusalem, biglang nahiling ninda na may nangengenot sainda na sarong nakakabayong nakasulot nin puting gubing saka may darang mga armas na bulawan.

⁹Sarabay sindang nagpasalamat sa Dios huli kan saiyang pagkaherak; nagkosog an saindang boot, andam na sumalakay bako sanang tawo kundi maski sa pinakamaringis na hayop o sa mga kudal na lansang.

¹⁰Kaya nagpadagos sinda tanganing makigera, asin kaibahan ninda an saindang langitnon na kaalyansa, na huli sa pagkaherak ipinadara sainda kan Kagurangnan.

¹¹Dangan garo mga leon na nagsalakay sinda sa mga kaiwal asin nakagadan sinda nin onse mil na soldados na naglalakaw saka mil seis syentos na soldados na nakakabayo. An iba kan mga kaiwal napiritan na magdulag.

¹²Kadaklan kan nagdulag igwa nin lugad saka mayo nin mga armas. Dai nagadan si Lisias huli ta nagdulag siya arog sa sarong matalaw na lalaki.

¹³Huli ta madonong na tawo si Lisias, inisip niya an manongod sa pagkadaog niya asin nahiling niya na imposibleng madaog an mga Judio huli ta nakilaban para sainda an mapangyaring Dios. Kaya nagpadara siya sa mga Judio nin sarong mensahe,

¹⁴sa paghingowa na madagka sinda na mag-oyon sa sarong matanos na kondisyon. Nanuga man siya na gigibohon niya an gabos tanganing magin katood kan hade an mga Judio.

¹⁵Igwa nin pagpahalaga sa karahayan kan banwaan si Judas Maccabeo, kaya nag-oyon siya sa gabos na kondisyon na ginibo ni Lisias. Huli ta itinao kan hade an lambang kahagadan na ipinadara ni Judas ki Lisias.

¹⁶Uya an kopya kan surat ni Lisias para sa mga Judio: “Hale ki Lisias para sa mga Judio, an sakong pangongomusta.

¹⁷Dinara sako kan saindong mga sugo, na si Juan saka si Absalom, an opisyal na dokumento na ipinadara nindo sainda, asin hinagad ninda na mag-oyon ako sa nakasurat duman.

¹⁸Ipinaaram ko na sa hade an mga bagay na kaipuhan darahon sa saiya, asin nag-oyon siya na gigibohon niya an anoman na posible.

¹⁹Kun magpapadagos kamong maimbod sa gobyerno, gigibohon ko an gabos para sa karahayan nindo ngapit.

²⁰Pinagbotan ko an saindong mga sugo asin an sakong mga sugo na pag-olayan an mga detalye kan mga bagay na ini sa atubang nindo.

²¹Mawot ko an karahayan nindo. Sinurat ngunyan na aldaw, ika beynte kwatrong aldaw kan bulan nin Dioscorinto, kan taon 148.”

²²Uya an kopya kan surat kan hade: “Hale ki Hadeng Antioco para sa ginagalangan na Lisias, an sakong pangongomusta.

²³Ngunyan na gadan na an sakong ama asin kaiba na kan mga dios, boot ko na an mga nasasakopan kan sakong kahadean iyo na an mamahala kan sadiri nindang mga palakaw na dai pakikilabotan.

²⁴Naaraman ko na dai oyon an mga Judio na ipamuhay an mga kaugalean kan Griyego, na iyo an pagboot kan sakong ama. Gusto nindang mamuhay sa sadiri nindang paagi asin hinagad ninda na tugotan sindang mamuhay sosog sa sadiri nindang mga kaugalean.

²⁵Huli ta gusto kong mamuhay sinda na mayo nin nagpupurisaw arog kan ibang mga nasyon sa sakong imperyo, kaya nagboboot ako na ibalik sainda an saindang Templo dangan tugotan sindang mamuhay sosog sa mga kaugalean kan mga ginikanan ninda.

²⁶Sabihan mo sinda kan desisyon na ini asin patotoohan mo sainda an sakong pakipagkatood, tanganing matoninong sindang makagibo kan sadiri nindang mga palakaw, na dai naghahadit nin anoman.”

²⁷Uya an kopya kan surat kan hade sa mga Judio: “Hale ki Hadeng Antioco para sa mga lider kan mga Judio asin sa gabos na mga Judio, an sakong pangongomusta.

²⁸Linalaom ko na marahay an saindong kamugtakan. Marahay man an sakong hawak.

²⁹Ipinaisi sako ni Menelao na mawot nindong magbalik sa sadiring mga harong saka mangnohon an sadiring mga palakaw.

³⁰Kaya an magpuli bago sa ikatreyntang aldaw kan bulan nin Xantico mayo nin dapat na ipaghandal.

³¹Pwede na nindong ipadagos an pagkuyog kan saindong katogonan sa pagkakan asin iba pang katogonan, siring kan dati nindong ginigibo. Mayo nin Judio na padudusahan sa sarong krimen na ginibo niya huli ta dai niya aram na iyan sarong pagkakasala.

³²Susugoon ko si Menelao tanganing pakosogon an saindong boot.

³³Mawot ko an karahayan nindo. Sinurat ngunyan na ikakinseng aldaw kan bulan nin Xantico kan taon 148.”

³⁴Nagpadara man an mga taga Roma nin surat sa mga Judio, na siring kaini an mababasa: “Hale ki Quinto Memmio asin ki Tito Manio, mga sugo kan mga taga Roma, para sa mga Judio, an samong pangongomusta.

³⁵Bilog an samong pag-oyon sa gabos na itinao saindo kan ginagalangan na si Lisias.

³⁶Pasiring na kami sa Antiokia, kaya siyasaton nindong marahay an mga bagay na dinara ni Lisias sa hade. Dangan padarahan tolos nindo kami kan saindong simbag tanganing iatubang mi saiya an manongod sa saindong karahayan. Gibohon tolos nindo ini:

³⁷Magpadara kamo tolos nin mga tawo tanganing maaraman mi an saindong simbag.

³⁸Mawot mi an karahayan nindo. Sinurat ngunyan na ikakinseng aldaw kan bulan nin Xantico kan taon 148.”