Read Central Bicolano 2 Maccabees 12 Bible Online

2 Maccabees 12 - Central Bicolano bible

2 Maccabees 12

¹Pakatapos na magkaoroyon an mga Judio saka an mga taga Siria, nagbalik sa hade si Lisias, asin nagbalik man sa saindang pag-oma an mga Judio.

²Alagad may nagkapirang gobernador an dai nagtugot na mamuhay nin matoninong an mga Judio. An mga gobernador na ini iyo si Timoteo, si Apollonio na aki ni Gennaeo, si Jeronimo, si Demofon saka si Nicanor na pamayo kan tinandanan na mga soldados na hale sa Chipre.

³Kan panahon na iyan, naggibo an mga taga Jope nin sarong maringis na bagay sa mga Judio na nag-eerok sa saindang syudad. Nagsagin-sagin an mga taga Jope na makikipagkatood sa mga Judio dangan inalok ninda an mga ini na maglunad kaiba an saindang mga pamilya sa mga barkong inandam ninda.

⁴Huli ta pinagkaoroyonan kan bilog na tawo sa syudad an pag-alok na ini, mayo nin suspetsa na inako kan mga Judio an imbitasyon tanganing ipahiling sa mga taga Jope na boot nindang makipagkatood sainda. Alagad pag-abot sa tahaw kan dagat, linamos kan mga taga Jope an dos syentos na Judio na naglunad sa barko.

⁵Kan maaraman ni Judas an karingisan na ginibo kan mga taga Jope sa saiyang mga kahimanwa, pinaisi niya tolos an saiyang mga tawohan.

⁶Pakatapos na mamibi sa Dios, an matanos na hukom, sinalakay ninda an mga paragadan. Pagkabanggi, sinulo ninda an pantalan, patin an mga barko, saka ginadan an lambang nagtatago duman.

⁷Igwa nin mga barat an mga trangkahan kan syudad, kaya nagsibog si Judas; alagad desidido siyang magbalik saka puhoon an lambang nag-eerok duman.

⁸Naaraman ni Judas na an mga taga Jamnia igwa nin plano na gadanon man an mga Judio na nag-eerok sa syudad ninda.

⁹Kaya pagkabanggi, sinalakay niya an Jamnia, sinulo an pantalan kaini saka an mga barko duman. An kalayo nahiling sagkod sa Jerusalem, na kwarenta y otso kilometros an rayo.

¹⁰Kan may duwang kilometros pa sana an rayo sa Jamnia ni Judas saka kan saiyang mga tawohan, na naglalakaw tanganing sabaton sa gera si Timoteo, sinalakay sinda kan sobra sa singko mil na mga Arab na igwang kaibahan na kinyentos na soldados na nakakabayo.

¹¹Nagin masakit an ralaban, alagad sa tabang nin Dios, nanggana si Judas saka an saiyang mga tawohan. An nadaog na mga Arab, nakimaherak ki Judas na tugotan sindang makipagkatood sa mga Judio. Nanuga sinda na matao nin mga baka saka matabang sa mga Judio sa iba pang paagi.

¹²Inisip ni Judas na dakul na tabang an makukua niya sa mga Arab kaya nag-oyon siya na makipagkatood sainda; pakatapos kaiyan nagbalik an mga Arab sa saindang mga tolda.

¹³Sinalakay man ni Judas an Caspin, na sarong pusog saka kinudalan na syudad. Nag-erok sa syudad na ini an mga paganong manlaen-laen an rasa,

¹⁴na nagsarig sa kosog kan saindang mga kudal saka sa dakul nindang pagkakan. Kinalwagan ninda si Judas asin an mga tawohan kaini. Nagkurahaw sinda nin mga insulto laban sa mga Judio saka laban sa Dios.

¹⁵Alagad namibi an mga Judio sa Makakamhan na Kagurangnan kan kinaban, na nagrumpag kan mga kudal nin Jerico kan panahon ni Josue na dai naggamit nin mga kagamitan na panrumpag ni mga armas na pansalakay. Dangan maisog nindang sinalakay an kudal

¹⁶asin huli ta kabotan nin Dios, nasakop ninda an syudad. Kadakul an nagadan kan mga Judio kaya pati an sarong haraning danaw, na haros kwatro syentos metros an hiwas, garo nagsupay sa dugo.

¹⁷Hale sa syudad nin Caspin, naglakaw si Judas saka an saiyang mga tawohan nin haros syento singkwenta y dos kilometros sagkod na nakaabot sinda sa Carax, sarong lugar na enerokan kan mga Judio saka harani sa syudad nin Tob.

¹⁸Alagad dai ninda nakua duman si Timoteo huli ta naghale na siya sa rehiyon. Mayo siya nin naginibo duman kundi an magwalat nin sarong makosog na bantayan sa sarong lugar.

¹⁹Duwang heneral ni Judas, si Dositeo saka si Sosipater, an nagsalakay kan bantayan asin ginadan ninda an dyes mil na soldados na nadestino sa bantayan.

²⁰Dangan binanga ni Judas an saiyang hukbo sa nagkapirang dibisyon asin nagbugtak siya nin mga lalaki na mamamayo sa lambang dibisyon. Pakatapos hidaling linamag niya si Timoteo asin an hukbo kaini na igwa nin bilang na syento beynte mil na naglalakaw na soldados saka dos mil kinyentos na nakakabayong soldados.

²¹Kan maaraman ni Timoteo na pinaglalamag siya ni Judas, pinaenot niya an mga babae asin an mga aki pati an mga kargamento sa syudad nin Karnaim, sarong lugar na masakit na mapalibotan ni maabot, huli kan mga hayakpit na dalan pasakat duman.

²²Alagad pag-abot kan enot na dibisyon ni Judas, nagkatarakot an mga kaiwal huli sa sarong bisyon na ipinadara nin Dios na nakakahiling kan gabos na bagay. Sa katakotan nagdaralagan sinda na mayo nin direksyon asin kadakul sainda an nalugadan kan mga espada kan saindang kaibahan.

²³Maigot na naglamag si Judas asin an mga tawohan kaini, kaya mga treynta mil na kaiwal an nagadan ninda.

²⁴Nabihag man kan hukbo ni Dositeo saka ni Sosipater si Timoteo. Alagad tuso siyang marahay asin napatubod niya sinda na kadaklan kan saindang kadugo saiyang mga bilanggo. Sinabi ni Timoteo na magagadan an saindang mga kadugo kun may maraot na mangyari saiya.

²⁵Huli kan panuga niya na papupulion niyang ligtas an mga kadugo ninda, binutasan siya kan duwa.

²⁶Sunod na sinalakay ni Judas an syudad nin Karnaim asin an templo kan diosang si Atargatis, dangan ginadan niya an beynte singko mil na tawo.

²⁷Pakatapos na raoton an syudad asin templo, nagmartsa si Judas laban sa Efron, sarong syudad na nakukudalan patin enerokan ni Lisias asin kan iba pang mga tawo na hale sa manlaen-laen na nasyon. Makokosog na mga hoben na lalaki an nagpwesto sa atubangan kan mga kudal saka maisog na nakilaban, mantang sa laog kan syudad nasasaray an kadakul na kagamitan sa pakigera.

²⁸Alagad naghagad nin tabang an mga Judio sa Kagurangnan na nagroronot kan kapangyarihan kan saiyang kaiwal. Kaya nasakop ninda an syudad saka ginadan an haros beynte singko mil na tawo.

²⁹Hale duman hidali sindang nagduman sa syudad nin Betsan, na syento beynte kilometros an rayo hale sa Jerusalem.

³⁰Isinabi ki Judas kan mga Judio duman an kabootan na ipinahiling sainda kan mga tawo sa syudad, orog na kan panahon nin kasakitan.

³¹Kaya pinasalamatan ni Judas asin kan saiyang mga tawohan an mga tawo duman patin sinadol niya sinda na ipahiling ngapit sa mga Judio an siring na karahayan. Dangan nagpasiring sinda sa Jerusalem, asin nag-abot duman bago magpoon an Pyesta nin Pag-ani.

³²Pakatapos kan Pentecostes (iyo ini an Griyegong pag-apod sa Pyesta nin Pag-ani), nagluwas si Judas saka an saiyang mga tawohan laban ki Gorgias, an gobernador sa Idumea.

³³Sinabat sinda ni Gorgias na may kaibahan na tres mil na naglalakaw na soldados saka kwatro syentos na nakakabayong soldados.

³⁴Sa laban na ini, nagkapirang Judio an nagadan.

³⁵Dangan sarong Judio na hale sa syudad nin Tob, na sarong makosog na parakabayo na an ngaran Dositeo, an nakadakop ki Gorgias. Pinugolan niya ini sa saiyang alikboy saka makosog na ginuyod huli ta boot niya ining madakop na buhay. Alagad biglang nagrani ki Dositeo an sarong nakakabayong taga Tracia asin pinutol an braso ni Dositeo. Nakadulag si Gorgias saka nagtago sa syudad nin Marisa.

³⁶Haloy nang nakilaban an mga Judio na nasa pamamahala ni Esdrias asin paragal na sinda. Kaya namibi si Judas na ipahiling logod kan Kagurangnan na kakampi ninda siya saka namamayo kan saindang hukbo.

³⁷Dangan, mantang nag-aawit si Judas nin sarong himno sa sadiri niyang lengwahe bilang tanda nin pakilaban, biglang sinalakay kan mga Judio si Gorgias, saka an mga tawohan kaini; nagdurolag an mga ini.

³⁸Pakatapos kan gera pinangenotan ni Judas an saiyang mga tawohan pasiring sa banwa nin Adullam. Huli ta madali na an aldaw nin Sabbath, kaya sosog sa kaugalean kan mga Judio, naglinig sinda saka inotob an Sabbath.

³⁹Pagkaaga, kaipuhan nanggad na tiponon ninda an mga bangkay kan nagadan sa gera dangan ilubong sinda sa lulubngan kan saindang pamilya.

⁴⁰Alagad sa irarom kan gubing kan lambang bangkay may nakua sindang sadit na ladawan kan dios-dios sa Jamnia. Sa Katogonan kan mga Judio maigot na ipinagbabawal an pagsulot kan mga ladawan na ini. Nagin malinaw sa lambang saro an dahelan kun tadaw ta nagadan an mga lalaki.

⁴¹Kaya inomaw ninda an mga paagi nin Kagurangnan, an matanos na hukom, na naghahayag kan mga bagay na natatago,

⁴²dangan nakimaherak sinda saiya na paraon logod an siring na kasalan. Pakatapos, sinadol kan dakulang tawong si Judas an mga tawo na maglikay sa kasalan, huli ta nahiling ninda mismo an nangyari sa mga tawong nagkasala.

⁴³Nagtipon man siya nin kantidad na uminabot sa duwang kilong plata hale sa gabos niyang tawohan saka ipinadara sa Jerusalem tanganing gamiton para sa dolot sa kasalan. Ginibo ni Judas an nobleng bagay na ini huli ta nagtubod siya sa pagkabuhay giraray kan mga gadan.

⁴⁴Kun dai siya nagtubod na mabubuhay giraray an gadan, an pamibi para sainda sarong kalolongan saka mayo nin halaga.

⁴⁵Huli kan saiyang pusog saka diosnon na prinsipyo na an gabos na tawong maimbod sa Dios mag-aako nin dakulang premyo, kaya ginibo niya an pagbabayad para sa kasalan kan mga nagadan tanganing mapatawad an saindang kasalan.