Read Central Bicolano 2 Maccabees 13 Bible Online

2 Maccabees 13 - Central Bicolano bible

2 Maccabees 13

¹Kan taon 149 naaraman ni Judas Maccabeo asin kan saiyang mga tawohan na nagmamartsa laban sa Judea si Antioco Eupator na may kaibahan na dakulang hukbo.

²Kaibahan man niya si Lisias, an saiyang bantay saka parapamahala kan gobyerno. Igwa sinda nin Griyegong hukbo na syento dyes mil na naglalakaw na soldados saka singko mil tres syentos na nakakabayo, asin beynte dos na elepante saka tres syentos na karwahe na may matatarom na karit sa mga rweda.

³Sa paghingowang makabentahe, nag-ayon sainda si Menelao saka sinadol niya si Antioco na magpadagos sa pagsalakay. Ginibo niya ini bakong huli sa karahayan kan saiyang banwaan kundi huli ta minawot niya na magtukaw bilang Halangkaw na Padi.

⁴Alagad pinaanggot nin Dios, an Hade kan mga hade, si Antioco laban ki Menelao. Pinaliwanag ni Lisias ki Antioco na si Menelao iyo an nagin dahelan kan gabos na karibokan. Kaya nagboot si Antioco na darahon siya sa Berea saka gadanon sosog sa kaugalean duman.

⁵Sa syudad na idto igwa nin tore na beynte y tres metros an langkaw asin pano nin abo. Sa laog kan tore, magpoon sa itaas pasiring sa ibaba igwa nin platapormang korteng imbudo.

⁶An siisay man na nagkasala laban sa mga dios o nagkasala nin magabat dinadara sa itaas kan tore saka ihinuhulog sa platapormang korteng imbudo.

⁷Siring kaiyan an paagi kan paggadan ki Menelao. Dai man lamang siya nagkamit nin marahay na paglubong,

⁸asin iyan an maninigo saiya. Dakul na beses niyang dinigtaan an altar na may banal na kalayo saka abo, alagad ngunyan nagadan siya sa abo.

⁹Mapaabaw-abaw na nagpadagos si Hadeng Antioco sa bakong makatawong pagsalakay sa Juda. Boot niyang gibohon sa mga Judio an mga bagay na mas maraot ki sa ginibo kan saiyang ama.

¹⁰Kan naaraman ini ni Judas, sinabihan niya an mga tawo na mamibi aldaw-banggi sa Kagurangnan, huli ta nasa pag-alaman na mawara sainda an Katogonan, an nasyon saka an saindang banal na Templo. Kaipuhan nanggad ninda ngunyan an saiyang tabang saka pag-iingat

¹¹tanganing dai mahulog sa mga kamot kan paralanghad na mga pagano an saindang nasyon na bago pa sanang itindog.

¹²Sa laog nin tolong aldaw nagdapa sa daga an mga tawo, nag-ayuno saka naghibi, patin naghagad nin tabang sa Kagurangnan na maheherakon. Dangan pinakosog ni Judas an boot kan mga tawo, saka nagsabi na mag-andam sinda.

¹³Pakatapos, sekretong kinaolay niya an mga lider kan mga Judio saka nagdesisyon na sa tabang nin Dios maluwas sinda tanganing makigera sa hade bago ini magsalakay sa Judea saka masakop an Jerusalem.

¹⁴Ibinugtak ni Judas sa kamot kan Kaglalang kan kinaban an ano man na mangyayari sainda sa gera. Sinadol niya an saiyang mga tawohan na magin maisog sa pakilaban sagkod sa kagadanan para sa Katogonan, sa Templo, sa Jerusalem, sa saindang banwaan asin para sa saindang kaugalean. Nagkampo sinda harani sa syudad nin Modein.

¹⁵Itinao ni Judas sa saiyang mga tawohan an kurahaw nin gera, “An kapangganahan naghahale sa Dios.” Kan bangging idto, kaiba an sarong grupo kan mga pili niyang tawohan, sinalakay niya an lugar na harani sa tolda kan hade asin nakagadan nin dos mil na kalalakihan. Ginadan man ninda an pangenot na elepante saka an naglulunad kaiyan.

¹⁶Sa ginibo nindang ini napano nin takot saka pagkaribong an kampo kan kaiwal. Kaya mapangganang naghale si Judas saka an saiyang mga tawohan

¹⁷bago magsirang an aldaw. Nangyari an gabos na ini huli sa tabang saka pag-iingat kan Kagurangnan.

¹⁸Huli sa ipinahiling na kaisogan kan mga Judio, nagtubod si Hadeng Antioco na dapat siyang maghanap nin marahay na paagi tanganing masakop an mga lugar kan mga Judio.

¹⁹Sinalakay niya an Bet-zur, na sarong makosog na bantayan kan mga Judio, alagad sunod-sunod na napasibog siya saka nadaog.

²⁰Nagpadara si Judas kan mga kaipuhan kan mga lalaking nagdedepensa kan bantayan,

²¹alagad sarong soldados na Judio, na an ngaran Rodoco, an nagtao kan sekretong mga impormasyon sa mga kaiwal. Naaraman an gibo niyang ini, kaya dinakop siya saka pinadusahan kan maninigo sa gibo niya.

²²Binalo giraray kan hade na makipag-oyon sa mga taga Bet-zur, asin kan magkaorolay na sinda, nagsibog siya. Dangan nagluwas siya tanganing salakayon si Judas, alagad nadaog giraray siya.

²³Si Felipe iyo an nawalat sa Antiokia tanganing mamahala kan gobyerno, alagad naaraman ni Hadeng Antioco na nagrebelde siya. Dai maaraman kan hade an saiyang gigibohon, kaya nakipagtoninong siya sa mga Judio, nag-oyon sa mga kahagadan ninda, saka nanuga na magigin marahay an pagtratar niya sainda. Tanganing magkahalaga an kasundoan, an hade nagdolot nin sakripisyo, nagtao nin dakulang kantidad tanganing ipahiling an paggalang niya sa Templo,

²⁴asin maogmang inako si Judas Maccabeo. Pakatapos, ibinugtak kan hade si Hegemonides bilang gobernador kan teritoryo magpoon sa Tolemaida sagkod sa Gerar,

²⁵dangan nagduman siya sa Tolemaida. An mga taga Tolemaida dai nag-oyon kan ginibong pinagkaoroyonan; sa katotoohan, naanggot sindang marahay kaya boot nindang halean nin halaga iyan.

²⁶Alagad nagtaram sa publiko si Lisias asin dinepensahan nin marahay an pinagkaoroyonan. Kan mapatoninong na niya an mga tawo saka napatubod sinda, nagbalik siya sa Antiokia. Sa siring kaining paagi, an pagsalakay ni Hadeng Antioco nagin pagsibog.