Read Central Bicolano 2 Maccabees 14 Bible Online

2 Maccabees 14 - Central Bicolano bible

2 Maccabees 14

¹Pakaagi nin tolong taon, naaraman ni Judas asin kan saiyang mga tawohan na si Demetrio, na aki ni Seleuco, nagbaba sa pantalan kan Tripolis kaiba an sarong makosog na hukbo saka mga barkong panggera.

²Ibinareta saiya na ginadan ni Demetrio si Hadeng Antioco saka an bantay kaining si Lisias dangan sinakop an daga.

³Igwa kaidto nin sarong tawo na an ngaran Alcimo, na dati sarong Halangkaw na Padi. Kan panahon nin pagrebelde, maogma niyang inako an pamumuhay na Griyego. Aram niya na dai na nanggad siya magigin Halangkaw na Padi ni makakaligtas sa pwedeng gibohon kan mga Judio saiya,

⁴kaya nagduman siya ki Hadeng Demetrio kan taon 151. Dinarahan niya an hade nin sarong koronang bulawan saka sarong sanga nin palma, kaiba kan nagkapirang sanga nin oliba na kaugalean nang idinodolot sa Templo. Alagad dai siya nagsabi manongod kan saiyang mga plano.

⁵Nag-abot an saiyang oportunidad na maotob an saiyang maraot na plano kan alokon siya ni Demetrio sa sarong pagtiripon kan mga parahatol kan hade tanganing hapoton manongod sa mga plano saka boot gibohon kan mga Judio. Nagsimbag si Alcimo,

⁶“An paghiling kan mga parasunod ni Judas Maccabeo sa saindang sadiri mga tawong maimbod saka may pagmakulog sa nasyon; nagugustohan ninda an gera asin parati nindang sinosotsotan an mga tawo na magrebelde. Dai nanggad ninda itutugot na magkaigwa nin katoninongan sa nasyon.

⁷Sinda an may kasalan kun tadaw ta nahale ako sa mamuraway kong katongdan bilang Halangkaw na Padi, katongdan na ipinanongod sako sa pagkaaki. Kaya nagdigdi ako

⁸enot sa gabos huli ta totoong pinagmamakulogan ko an saimong mga palakaw bilang hade asin ikaduwa huli ta igwa ako nin pagpapahalaga sa mga kahimanwa ko. An sa lolong na mga palakaw ni Judas asin kan saiyang mga parasunod iyo an nagdara kan makuring kasakitan sa bilog ming nasyon.

⁹Mahal na hade, kun masiyasat mo na an mga detalye kan bagay na ini, mawilihan mo logod na gumibo nin paagi para sa karahayan kan samong nasyon asin kan inaaping mga namamanwaan, sosog sa saimong pagkamaheherakon saka pagkamaboot.

¹⁰Huli ta sagkod na buhay si Judas, imposibleng magkaigwa nin katoninongan an samong nasyon.”

¹¹Pakatapos ni Alcimo na magtaram kan mga bagay na ini, an ibang mga parahatol kan hade na anggot man ki Judas, nagsotsot tolos sa hade tanganing orog na maanggot ini ki Judas.

¹²Kaya pinili tolos ni Hadeng Demetrio si Nicanor, na pamayo kan mga hukbong elepante, bilang gobernador sa Judea. Sinugo niya duman si Nicanor

¹³tanganing gadanon si Judas, iwarak an mga tawohan kaini, dangan gibohon si Alcimo na Halangkaw na Padi sa Templong pinakadakula sa bilog na kinaban.

¹⁴An gabos na dayuhan sa Judea, na nagdurolag huli kan mga pagsalakay ni Judas, naghidali na makaayon sa hukbo ni Nicanor. Inisip ninda na an pagkadaog asin kasakitan kan mga Judio magigin karahayan ninda.

¹⁵An pag-abot ni Nicanor saka an pag-apil saiya kan mga dayuhan, naaraman kan mga Judio. Kaya sinabwagan ninda nin abo an saindang payo dangan namibi sa Dios, na nagpili sa saindang nasyon bilang sadiri niya sagkod lamang saka dai nagpabaya na tabangan sinda sa panahon nin pangangaipo.

¹⁶Dangan kan nagboot si Judas na saindang lider, luminuwas tolos sinda tanganing makigera sa saindang kaiwal sa lugar na harani sa baryo kan Adasa.

¹⁷Si Simon na tugang ni Judas, iyo an nakilaban ki Nicanor, alagad dikit-dikit na nadadaog huli kan dai pinaglalaom na gigibohon sainda kan kaiwal.

¹⁸Alagad kan maaraman ni Nicanor an maisog saka mayong takot na pakilaban ni Judas asin kan mga tawohan kaini para sa saindang nasyon, naisip niya na bakong gera an solusyon kan saindang problema.

¹⁹Kaya sinugo niya si Posidonio, si Teodoto saka si Mattatias tanganing makipagtipan sa mga Judio.

²⁰Kan mapag-olayan na an mga detalye kan kondisyon, sinabi ini ni Nicanor sa saiyang hukbo, asin sararo sindang nag-oyon.

²¹Dangan an mga lider nagtalaan nin sarong aldaw tanganing mag-orolay giraray. An lambang kampo nagdara nin mga tukawan saka ibinugtak sa lugar na pagtitiriponan.

²²Bilang pag-iingat, nagbugtak si Judas nin mga armadong soldados sa mahahalagang mga lugar tanganing makalikay kun ngapit biglang magpasaluib an kaiwal. Alagad nagkaigwa nin marahay na pag-oolay an duwang lider.

²³Pakatapos kan pag-oolay, nag-erok si Nicanor sa Jerusalem nin nagkapirang panahon. Dai siya naggibo nin bakong marahay sa mga Judio; maski an mga tawo na boot magkampi saiya pinahale niya.

²⁴Parating kaibahan ni Nicanor si Judas asin nagin marahay na magkatood sinda.

²⁵Sinadol ni Nicanor si Judas na mag-agom na tanganing magkaigwa nin mga aki. Kaya nag-agom si Judas saka namuhay na arog kan ordinaryong namamanwaan.

²⁶Kan mahiling ni Alcimo an marahay na pag-ibahan ni Nicanor saka ni Judas, kuminua siya nin sarong kopya kan tipan saka duminuman ki Hadeng Demetrio. Inosipan niya an hade na si Nicanor bakong maimbod sa gobyerno huli ta pinili niya si Judas na sarong traydor, para magsalihid sa hade.

²⁷An salang sumbong na ini ikinaongis kan hade asin sa kaanggotan, nagsurat siya ki Nicanor manongod sa tipan. Nagsabi siyang dai niya nawiwilihan an tipan saka nagboot na darahon tolos sa Antiokia si Judas Maccabeo bilang sarong bilanggo.

²⁸Kan mag-abot an mensaheng iyan ki Nicanor napurisaw siya saka namondo na raoton an tipan sa tawong dai man naggibo nin maraot.

²⁹Alagad dai siya pwedeng magsalungat, kaya hinalat niya an oportunidad na magibo an pagboot kan hade.

³⁰Nariparo ni Judas na bako nang marahay an pakiiba saiya ni Nicanor, asin aram niyang saro ining maraot na tanda. Kaya tinipon niya an dakul na bilang kan saiyang mga tawohan saka nagtago.

³¹Kan mahiling ni Nicanor na madonong na dinulagan siya ni Judas, nagduman siya sa dakula saka banal na Templo mantang an mga padi nagdodolot kan kaugalean nang mga dolot. Dangan pinagbotan niya an mga padi na isuko ninda si Judas.

³²Nagsumpa an mga padi na dai ninda aram kun saen nagtatago si Judas.

³³Itinuro ni Nicanor sa Templo an too niyang kamot saka nagpatakot: “Kun dai nindo itao sako si Judas bilang sarong bilanggo, ipapapatag ko an Templo nin Dios. Gagabaon ko an altar asin sa lugar na ini matugdok ako nin sarong magayon na templo para ki Dionisio.”

³⁴Dangan naghale siya, asin itinaas tolos kan mga padi an saindang mga kamot saka namibi sa Dios, an maimbod na Parasurog kan samong nasyon:

³⁵“Kagurangnan nin gabos, dai ka nangangaipo nin anoman, alagad nawilihan mong ibugtak digdi an saimong Templo saka nag-erok sa tahaw nyamo.

³⁶Huli kaini, O banal na Kagurangnan kan gabos na kabanalan, ingatan mo na dai madigtaan sagkod lamang an saimong Templo na nalilinigan pa sana.”

³⁷Saro kan mga lider sa Jerusalem iyo an lalaking si Razis. May nagsumbong ki Nicanor na si Razis nagtatabang sa manlaen-laen na paagi sa saiyang mga kahimanwa. Ginagalangan siya nin marahay asin midbid sa ngaran na “an Ama kan mga Judio.”

³⁸Kan mga enot na aldaw kan rebolusyon ilinaog niya sa pag-alaman an saiyang buhay para sa Judaismo asin dinara siya sa hukoman huli sa saiyang kaimbodan.

³⁹Sa kamawotan na ikapahiling an saiyang paghabo sa mga Judio, nagpadara si Nicanor nin sobra sa kinyentos na soldados tanganing dakopon si Razis.

⁴⁰Inisip niya na kun madakop si Razis makukulogan nin marahay an boot kan mga Judio.

⁴¹Kan madali nang masakop kan mga soldados an tore na dinumanan ni Razis, asin mantang pinipirit nindang mabukasan an mga trangkahan pasiring sa patyo, nagboot sinda na suloon an pintoan. Nahiling ni Razis na mayo na siya nin madudulagan, kaya hiningowa niyang maghugot sa paagi kan saiyang espada.

⁴²Mas gusto niyang magadan na may onra ki sa mahulog sa mga kamot kan mga tawong maraot saka magtios nin kasosopgan.

⁴³Alagad sa paghidali ni Razis, an saksak na ginibo niya sa sadiri dai niya ikinagadan. Kaya mantang nagraralaog sa kwarto an mga soldados, nagsakat siya sa ibabaw kan kudal asin hale duman maisog siyang naglukso sa tahaw kan mga tawo.

⁴⁴Hidaling naglikay an mga tawo kaya nagbagsak siya sa daga.

⁴⁵Dai pa man siya nagadan, kaya naglalaad an kaisogan na nagtindog si Razis, an dugo nagbulos hale sa saiyang mga lugad asin duminalagan sa tahaw kan mga tawo. Dangan suminakat siya sa sarong bakilid na gapo.

⁴⁶Kan oras na idto na haros ubos na an dugo sa hawak, rinabsing niya kan duwa niyang kamot an saiyang bituka saka itinapok sa mga tawo, mantang namimibi sa Kagurangnan na nagtatao nin buhay saka espiritu na itao giraray saiya an mga iyan. Siring kaiyan an pagkagadan ni Razis.