Read Central Bicolano 2 Maccabees 15 Bible Online

2 Maccabees 15 - Central Bicolano bible

2 Maccabees 15

¹Naaraman ni Nicanor na yaon sa rehiyon nin Samaria si Judas saka an saiyang mga tawohan. Kaya nagplano siya na salakayon sinda sa aldaw nin Sabbath tanganing ligtas siya sa anoman na pag-alaman.

²An mga Judio na pinirit na mag-iba sa saiyang hukbo, nakimaherak saiya na dai maggibo kan maraot saka maringis na bagay na idto kundi galangan an aldaw na inomaw saka pinabanal nin orog sa gabos na aldaw kan Dios na nakakahiling kan gabos.

³Si Nicanor na pinakahababang klase nin linalang sa daga, naghapot sainda kun igwa nin pinakadakulang pamayo sa langit na nagboot sainda na omawon an Sabbath.

⁴Nagsimbag an mga Judio, “Igwa, an Kagurangnan na buhay, na namamahala sa langit, iyo an nagboot samo na omawon an Sabbath.”

⁵Alagad nagsimbag si Nicanor, “Ako an pamayo sa daga, asin nagboboot ako saindo na kuahon nindo an saindong mga armas saka gibohon nindo an ipinagboboot kan hade.” Alagad mayo nin nangyari sa maraot niyang plano.

⁶Sa kapaabaw-abawan ni Nicanor naghambog siya na patitindogon niya an sarong monumento bilang pag-omaw sa magigin kapangganahan niya laban ki Judas asin sa mga tawohan kaini.

⁷Alagad bilog an pagsarig ni Judas na tatabangan siya kan Kagurangnan.

⁸Kaya sinadol niya an saiyang mga tawohan na dai matakot sa mga kaiwal, kundi giromdomon an tabang na itinao sainda nin Kagurangnan kan nakaaging mga panahon, asin manarig na itatao giraray sainda ngunyan kan Makakamhan an kapangganahan.

⁹Pinakosog niya an saindang boot sa paagi nin pagbasa sainda hale sa Katogonan asin sa Mga Propeta patin pagpagiromdom sainda kan mga kapangganahan na nakamit ninda sa gera.

¹⁰Kan andam na sa pakigera an saiyang mga tawohan, itinao niya sainda an saiyang pagboot, siring man an pagiromdom na dai magtiwala sa mga pagano huli ta sinda dai nagkukuyog sa mga tipan.

¹¹Tinawan niya nin armas an saiyang mga tawohan bakong sa paagi nin pagsadol sainda na manarig sa mga kalasag saka mga garod, kundi sa paagi nin pagtao sainda nin mga tataramon na nagpakosog kan saindang boot. Pinakosog niyang orog an saindang boot kan isaysay niya sainda an saiyang pangatorogan na sarong klase nin bisyon na pwede nindang pagsarigan.

¹²Tinaraman niya sinda na nahiling niya sa sarong bisyon si Onias, an dating Halangkaw na Padi saka sarong tawong dakula saka makangangalas, mapakumbaba, maboot, matibay magtaram, asin poon pa sa pagkaaki tinukdoan na kun paano mamuhay kan tamang gawe. Nakaitaas an mga kamot ni Onias mantang namimibi para sa bilog na nasyon kan mga Judio.

¹³Dangan nahiling man ni Judas an sarong tawo na maputi na an buhok, asin nasa lalawogon niya an dakulang dignidad patin awtoridad.

¹⁴Nagsabi si Onias: “Iyo ini si Jeremias an propeta nin Dios na namomoot sa kapwa niya Judio saka nagdodolot nin dakul na pamibi para sato patin para sa Jerusalem, an banal na syudad.”

¹⁵Inunat ni Jeremias an too niyang kamot saka itinao ki Judas an sarong espadang bulawan. Mantang itinatao niya an espada, nagsabi siya:

¹⁶“Kuahon mo an banal na espadang ini, na regalo nin Dios. Gamiton mo ini sa paglaglag kan saimong mga kaiwal.”

¹⁷Kuminusog an boot kan lambang saro huli kan marahay na mga tataramon ni Judas, kaya maski an mga hoben na lalaki nadagkang makilaban. Huli ta nasa pag-alaman an saindang syudad, relihiyon asin Templo, nagdesider an mga Judio na dai na magsayang nin oras, kundi maisog nang sumalakay saka aramon an saindang palad sa paagi nin mano-manong pakilaban.

¹⁸Nangongorog an saindang pagmakulog sa sagrado nindang Templo; ikaduwa sana sa saindang boot an manongod sa kamugtakan kan sadiri nindang pamilya saka mga kadugo.

¹⁹An mga tawong nawalat sa Jerusalem gabos naghadit manongod sa magigin kataposan kan gera sa kahiwasan.

²⁰An lambang saro naghahalat na maaraman an manggagana sa gera. Naghaharani na an mga hukbo kan kaiwal, kaiba an saindang mga elepante na ibinugtak ninda sa mahahalagang lugar saka an saindang mga nakakabayong soldados na nakalinya sa mag-ibong na parte ninda.

²¹Tinanaw ni Judas Maccabeo an dakulang hukbo kan mga kaiwal, an manlaen-laen nindang armas, patin an mababangis nindang elepante. Dangan initaas niya an saiyang mga kamot saka namibi sa Kagurangnan na naggigibo nin mga ngangalasan. Aram niya na an kapangganahan itinatao kan Kagurangnan sa mga tawong maninigo kaiyan bakong sa mga tawo na igwa nin makosog na hukbo.

²²Nagsabi si Judas: “O Kagurangnan, kan panahon ni Hadeng Ezekias nin Juda, sinugo mo an saimong anghel, asin ginadan niya an syento otsenta y singko mil sa mga tawohan ni Hadeng Senakerib.

²³Magsugo ka giraray ngunyan, O Kagurangnan nin kalangitan, nin marahay na anghel tanganing magtakig saka magkubogkubog sa takot an mga kaiwal.

²⁴Huli kan dakula mong kapangyarihan, mapuho logod an mga paralanghad na iyan na nagdadangadang sa pagsalakay sa pinili mong banwaan.” Tinapos niya an saiyang pamibi sa mga tataramon na iyan.

²⁵Sa tanog kan mga trompeta saka mga awit na panggera, nagpadagos sa pagharani si Nicanor asin an saiyang hukbo,

²⁶alagad nakigera sainda si Judas patin an mga tawohan kaini na nag-aapod sa Dios para tabangan sinda.

²⁷Ginamit ninda an saindang mga kamot sa pakilaban mantang sa puso namimibi sinda sa Dios, kaya nakagadan sinda nin treynta y singko mil na mga kaiwal. Dakula nin marahay an saindang pasalamat sa tabang na inako ninda hale sa Dios.

²⁸Kan natapos na an gera dangan papuli na sinda na nagseselebrar kan kapangganahan ninda, nahiling ninda an bangkay ni Nicanor na nakasulot pa kan saiyang gubing na panggera.

²⁹Dangan sa makosog na kinurahaw inomaw ninda an Kagurangnan sa sadiri nindang lengwahe.

³⁰Nagboot si Judas, an lalaking sa hawak asin kalag danay na nagsurog kan kapwa niya Judio magpoon kan hoben pa siya, na putolon an payo saka toong kamot ni Nicanor tanganing darahon sa Jerusalem.

³¹Pag-abot sa syudad, tinipon ni Judas an gabos na Israelita, nagbugtak nin mga padi sa atubangan kan altar, dangan ipinaapod an mga tawohan na nasa bantayan.

³²Ipinahiling niya sainda an payo kan maraot na tawong si Nicanor saka an kamot kaini na mapaabaw-abaw na initaas laban sa sagradong Templo kan Makakamhan na Dios.

³³An dila kan bakong diosnon na si Nicanor pinutol ni Judas na nanunugang dikit-dikit na ipapakakan idto sa mga gamgam saka ibibitay sa atubangan kan Templo an payo ni Nicanor, bilang katibayan kan ginibo niyang kalolongan.

³⁴An lambang saro duman nagtingkalag sa langit saka nag-omaw sa Kagurangnan, na nagpahiling kan saiyang kapangyarihan patin nag-ingat kan Templo tanganing dai ini madigtaan.

³⁵Binitay ni Judas an payo ni Nicanor sa kudal kan bantayan, bilang malinaw na katibayan sa lambang saro kan tabang na itinao nin Kagurangnan.

³⁶Nagkasararo sinda na an aldaw na ini dai nanggad ninda lilingawan, kundi seselebraron ninda taon-taon sa bisperas kan Aldaw ni Mardokeo, na iyo an ikatreseng aldaw kan ikadoseng bulan, na inapod na bulan nin Adar sa lengwaheng Arameo.

³⁷Nagtapos sa siring na paagi an buhay ni Nicanor. Magpoon kaidto nagdanay sa kamot kan mga Judio an syudad nin Jerusalem. Kaya digdi ko tataposon an sakong istorya.

³⁸Kun marahay an pakasurat ko kaiyan saka madaling masabotan, naoogma ako; kun maraot an pakasurat saka mayo nin buhay, ginibo ko na an gabos kong makakaya.

³⁹Naaaraman ta na bakong marahay na mag-inom kan purong arak o tubig sana, alagad managom saka makawiwiling inomon an pinaghalong arak saka tubig. Siring man, an sarong istorya na marahay an pakasurat minatao nin kaogmahan sa nagbabasa kaiyan. Digdi ko tinatapos an istoryang ini.