Read Central Bicolano 2 Maccabees 2 Bible Online

2 Maccabees 2 - Central Bicolano bible

2 Maccabees 2

¹“Hale sa talaan kan kasaysayan naaaraman nyato na an mga nabihag na mga tawo pinagbotan ni propeta Jeremias na magtago nin kalayo hale sa altar, siring kan nasambit mi.

²Naaaraman man nyato na tinukdoan niya sinda kan Katogonan nin Dios asin pinatanidan na dai sinda madaya kan nasasamnohan na mga dios-dios na bulawan asin plata na mahihiling ninda sa daga na pagdadarahan sainda bilang mga bihag.

³Sinadol niya sinda na dai nanggad paglingawan an Katogonan.

⁴“Sinasabi man kan talaan na ini na si Jeremias, huli sa pahayag nin Dios, nagboot na an Tabernakulo asin an Kaban nin Tipan darahon kasunod niya sa bukid saen nagtanaw si Moises sa daga na ipinanuga nin Dios sa satong banwaan.

⁵Kan mag-abot si Jeremias sa bukid, nakahiling siya nin dakulang lungib asin itinago niya duman an Tabernakulo, an Kaban nin Tipan, asin an altar nin insenso. Dangan sinerahan niya an lungib.

⁶“Naghingowa an mga katood ni Jeremias na sumunod saiya saka tandaan an agihan alagad dai ninda nakua an lungib.

⁷Naaraman ni Jeremias an ginibo ninda kaya tinuyaw niya sinda. Nagsabi siya, ‘Mayo nin dapat na makaaram manongod kan lugar na idto sagkod na tiponon giraray nin Dios asin maherakan an saiyang banwaan.

⁸Sa panahon na iyan ihahayag niya kun saen itinago an mga bagay na idto asin mahihiling sa panganoron an nakasusulang kamurawayan nin Kagurangnan, siring kan nangyari kan panahon ni Moises asin kan mamibi si Solomon dangan hagadon niya na espesyal na ikonsagra an Templo.’

⁹“Sinabihan man kita kun paano nagdolot nin sakripisyo an madonong na si Hadeng Solomon kan nahaman an Templo,

¹⁰asin kan mamibi siya, nagbaba an kalayo hale sa langit saka tinutong an mga sakripisyo, siring kan naenot na pangyayari kan mamibi si Moises.

¹¹Ipinaliwanag ni Moises na tinutong kan kalayo an dolot para sa kasalan huli ta dai ini kinakan.

¹²Sinelebrar ni Solomon an pyesta sa laog nin walong aldaw.

¹³“An mga pangyayaring ini mababasa man sa mga talaan kan hade asin sa talaan ni Nehemias. Nagmukna si Nehemias nin sarong libraria asin tinipon an mga sinurat ni David, an mga surat kan mga hade manongod sa mga dolot, asin an mga libro manongod sa mga hade saka sa mga propeta.

¹⁴Tinipon man ni Judas an mga libro na nagkawararak huli kan gera, asin yaon pa sato ngunyan an mga librong iyan.

¹⁵Kun kaipuhan nindo an mga librong iyan, paaramon nindo kami, asin ipapadara mi iyan.

¹⁶“Huli ta madali mi nang selebraron an Pyesta nin Paglinig, sinusuratan mi kamo tanganing alokon na selebraron man nindo ini.

¹⁷Ilinigtas nin Dios an saiyang banwaan asin ibinalik niya sato an dagang banal, an kahadean, an pagigin padi, asin an paglingkod sa Templo,

¹⁸sosog sa ipinanuga niya sa Katogonan. Ilinigtas niya kita sa mangirhat na mga karatan asin lininig niya an Templo. Kami naniniwala na maheherak siya sato asin dai mahahaloy, titiponon niya kita sa saiyang banal na Templo hale sa lambang nasyon sa tangod kan langit.”

¹⁹Isinurat ni Jason na taga Cirene sa limang libro an istorya ni Judas Maccabeo asin kan saiyang mga tugang na lalaki, an paglinig kan dakulang Templo, patin an pagkonsagra kan altar.

²⁰Ilinadawan niya an pakikilaban ki Antioco Epifanes saka sa aki niyang si Eupator,

²¹asin an langitnon na mga bisyon na nahiling kan mga tawong maisog saka maigot na nakilaban para sa Judaismo. Kadikit sana sinda alagad nakua ninda an bilog na daga saka nadaog an paganong mga kaiwal.

²²Nabawi ninda an Templo na bantog sa bilog na kinaban, ikinaligtas an Jerusalem, asin ibinalik an mga katogonan na nasa pag-alaman na mapara. Nagibo ninda an gabos na bagay na ini huli ta nagin maheherakon saka maboot sainda an Kagurangnan.

²³Hihingowahon kong ikabugtak sa sarong libro an limang libro na sinurat ni Jason.

²⁴An bilang kan mga detalye saka an kadakulan kan mga babasahon magigin dipisil para sa boot bumasa kan kasaysayan.

²⁵Alagad hiningowa ko na mapaogma an boot bumasa, na gibohon ining pasil para sa boot magtoom, asin tanganing magkinabang an gabos na parabasa.

²⁶An pagpahalipot nin halabang libro sarong dipisil na trabaho na nangangaipo nin pagpatagdo nin ganot asin pagpuka.

²⁷Arog ini kadipisil sa pag-andam nin sarong bangkete na pwedeng magpaogma sa gabos na tawo. Alagad naoogma ako na tioson an kadipisilan na ini mapaogma sana an mga parabasa ko.

²⁸Papabayaan ko sa enot na kagsurat an manongod sa mga detalye asin hihingowahon ko na itao an pinahalipot na istorya kan mga pangyayari.

²⁹An minamangno kan sarong paratugdok nin bagong harong iyo an lambang detalye kan estruktura, alagad an minamangno kan pintor iyo an pagpagayon kan harong. Gigibohon ko an siring kan gibo kan pintor.

³⁰Kaipuhan na aramon nanggad kan parasurat an saiyang tema, siyasaton an lambang detalye, dangan maingat niyang ipaliwanag.

³¹Alagad an nagsusurat kan kabilogan dapat na tugotan na pahalipoton an istorya na mayo kan mga detalye.

³²Mayo na ako nin sasabihon kaya popoonan ko na an sakong istorya. Huli ta kamangmangan an pahalabaon an introduksyon kan sarong pinapahalipot na istorya.