Read Central Bicolano 2 Maccabees 3 Bible Online

2 Maccabees 3 - Central Bicolano bible

2 Maccabees 3

¹Kan si Onias iyo an Halangkaw na Padi sa Jerusalem, nagdanay sa banal na syudad an katoninongan asin kauswagan. An mga togon maimbod na kinuyog kan mga tawo, huli ta si Onias sarong diosnon na tawo asin kinaongisan niya an karatan.

²An Templo iginalang kan mga hade nin Siria saka nin Egipto asin dinolotan ninda nin mga mamahalon na regalo.

³Si Hadeng Seleuco na pamayo kan bilog na Asia, iyo an dating nagtatao kan kwartang pambakal kan mga sakripisyo sa Templo. Kinukua niya an kwarta hale sa buhis na natitipon niya.

⁴Alagad an sarong tawo na an ngaran Simon, hale sa tribu ni Bilga, an pangenot na opisyal kan Templo, an nakiiwal ki Onias manongod sa mga pagsusundon kan saodan kan syudad.

⁵Kan dai siya nanggana sa pakidiskutiran ki Onias, nagduman siya ki Apollonio na aki ni Traseo asin gobernador kan Dakulang Siria.

⁶Isinabi ni Simon ki Apollonio an manongod kan dai mabilang na kayamanan sa kaban nin yaman sa Jerusalem. Sinabi niya na dai na kaipuhan an kwarta para sa mga sakripisyo kaya pwedeng ibugtak sa pamamahala kan hade.

⁷Kan makipaghilingan si Apollonio sa hade, sinabi niya saiya an manongod sa kwarta. Kaya pinagbotan kan hade si Heliodoro, na saiyang pangenot na ministro, na kuahon para saiya an kwarta.

⁸Naghale tolos si Heliodoro na nagsagin-sagin na magibo siya nin pagsiyasat sa mga syudad kan Dakulang Siria.

⁹Nag-abot siya sa Jerusalem asin maogma siyang sinabat kan Halangkaw na Padi. Sinabi niya an dahelan kan saiyang pagdalaw saka naghapot kun totoo an bareta manongod sa kayamanan.

¹⁰Nagpaliwanag an Halangkaw na Padi na an maraot na tawong si Simon dai nagsasabi kan katotoohan. Igwa mananggad nin kwarta sa kaban nin yaman sa Templo, alagad an sarong kabtang kaiyan ipinanongod sa mga babaeng balo saka sa mga ilo, asin an sarong kabtang pagsadiri ni Hircano na aki ni Tobias, na sarong mahalagang tawo. Sinabi niya na an kabilogan na kantidad kan kwarta minaabot sa treynta mil na librang plata saka kinse mil na librang bulawan.

¹²Sinabi man niya na imposible nanggad na tugotan an siisay man na kuahon an kwarta kan mga tawong nagtiwala sa kabanalan asin kasigurohan kan Templo na bantog sa bilog na kinaban.

¹³Alagad sinabi ni Heliodoro na dapat na kuahon an kwarta para sa hade, sosog sa saiyang pagboot.

¹⁴Kaya nagtalaan siya nin aldaw saka nagduman sa Templo tanganing pamahalaan an pagbilang kan kwarta. Iyo ini an nagin dahelan kan pagkaigwa nin ribok sa bilog na syudad.

¹⁵An mga padi na nakasulot kan mga gubing na sa padi nagdarapa sa atubangan kan altar saka nakimaherak sa Dios na ingatan an kwarta, nin huli ta siya an kagtao kan mga togon manongod sa mga kwarta na ipinatago sa Templo.

¹⁶Makamoromondo na paghilingon an lalawogon kan Halangkaw na Padi. Nanlongsi an saiyang lalawogon na naghahayag kan dakulang sakit na namamatean kan saiyang kalag,

¹⁷asin an saiyang hawak nagtatakig sa takot, na nagpapahiling kan kulog sa saiyang puso.

¹⁸Hidali man na nagruluwas sa saindang mga harong an mga tawo tanganing magkasararo sa pamibi na dai madigtaan an Templo.

¹⁹Nagsurusoan sa mga tinampo an mga babae na nakasulot nin mga paldang sako. Dai kaidto itinutugot kan mga magurang sa mga aki nindang daraga na magluwas sa harong alagad ngunyan may nagdaralagan pasiring sa mga trangkahan, may nagpasiring sa mga kudal kan syudad, mantang an iba nagdudungaw sa saindang mga bintana.

²⁰Nakaitaas an mga kamot na namibi sinda gabos sa Dios.

²¹Makaheherak paghilingon an Halangkaw na Padi sa siring na kasakitan saka kulog nin boot asin an mga tawong ribong na nagdarapa sa daga.

²²Mantang nakikimaherak sinda sa Kagurangnan na Makakamhan na ingatan an kwarta na ipinaniwala ninda saiya,

²³nagpadagos man si Heliodoro sa plano niya.

²⁴Alagad kan nakarani na sa kaban nin yaman si Heliodoro asin an saiyang mga bantay, nagpahiling nin pambihirang bisyon an Kagurangnan nin gabos na espiritu asin kapangyarihan. An gabos na nangahas lumaog kaiba ni Heliodoro nagkatararanta saka nanruluya sa takot huli sa ipinahiling na kapangyarihan nin Kagurangnan.

²⁵Nahiling ninda sa bisyon an sarong kabayo saka sarong paralunad. Igwa nin magayon na samno an kabayo, asin nakakatakot an paralunad kaini na nakagubing nin armas na bulawan. Biglang dinaguso kan kabayo si Heliodoro saka sinipa.

²⁶Nagpahiling man ki Heliodoro an duwang hoben na lalaki na makosog nin marahay, gwapo, saka nakasulot nin magayon na gubing. Nagtindog an duwang hoben na ini sa mag-ibong ni Heliodoro saka mayo nin herak na kinulogan ninda siya.

²⁷Natumba siyang bigla sa daga asin dismayadong ibinugtak siya kan saiyang mga tawohan sa sarong higdaan,

²⁸saka dinara sa luwas. Dai pa lamang nahahaloy naglaog an lalaking ini sa templo, kaiba an kadakul na tawohan, sagkod an gabos niyang bantay, alagad ngunyan ilinuwas siyang dismayado. Kaya hayag na minidbid ninda gabos an dakulang kapangyarihan nin Dios.

²⁹Nakahigda duman si Heliodoro na dai nakakataram saka mayo nin paglaom na maomayan huli kan pagpahiling na ini kan kapangyarihan nin Dios.

³⁰Alagad inomaw kan mga Judio an Makakamhan na Dios huli sa makangalas na pag-ingat niya sa Templo. An Templo, na mga pirang minuto pa sana an nakalihis pano nin takot asin kariribokan, napano nin kaogmahan asin kagayagayahan, huli kan pagpahiling nin Kagurangnan na Makakamhan.

³¹An nagkapira sa mga katood ni Heliodoro nakiolay tolos ki Onias na Halangkaw na Padi na ipamibi sa Kahorohalangkawe na dai pagputolon an hinangos kan tawong ini na madali nang magadan.

³²Kaya nagdolot nin sakripisyo an Halangkaw na Padi na naglalaom na ililigtas nin Dios si Heliodoro, huli ta habo niyang maghona an hade na ginibo ini kan mga Judio sa tawong sinugo niya.

³³Mantang idinodolot ni Onias an sakripisyo, nagpahiling giraray ki Heliodoro an duwang hoben na lalaki na iyo man giraray an saindang sulot na gubing. Nagsabi an duwa, “Dapat kang magpasalamat sa Halangkaw na Padi; ilinigtas nin Kagurangnan an saimong buhay huli saiya.

³⁴Giromdoma na an Kagurangnan nin langit iyo an nagpadusa saimo. Lakaw ngunyan asin isabi mo sa gabos an saiyang dakulang kapangyarihan.” Pakasabi kaini, nawara an duwa.

³⁵Kaya nagdolot si Heliodoro nin sakripisyo sa Kagurangnan, asin naggibo nin dakul na panuga huli ta ilinigtas nin Kagurangnan an saiyang buhay. Dangan nagpaaram siya ki Onias asin kaiba an hukbo na nagbalik sa hade.

³⁶Pinatotoohan niya sa gabos na tawo an nahiling niyang mga ginibo kan Kahorohalangkaweng Dios.

³⁷Kan hapoton kan hade si Heliodoro kun siisay an dapat na ipadara sa Jerusalem, nagsimbag siya,

³⁸“Kun may kaiwal ka o may aram kang nagpaplano nin laban sa saimong gobyerno, siya an saimong ipadara. Kun makabalik pa siya saimo, mabalik siya na igwa nin makuring kasakitan, huli ta igwa nin makangalas na kapangyarihan hale sa Dios na naghihiro duman.

³⁹An Dios nin langit iyo an nagbabantay sa Templo; pinapadusahan niya asin rinaraot an siisay man na mag-abot tanganing raoton iyan.”

⁴⁰Iyo ini an istorya ni Heliodoro asin kun paano iningatan nin Dios an kaban nin yaman sa Templo.