Read Central Bicolano 2 Maccabees 4 Bible Online

2 Maccabees 4 - Central Bicolano bible

2 Maccabees 4

¹Si Simon (na nasambit na kaidto na iyo an nagsumbong ki Apollonio manongod sa kwarta saka nagdara nin kariribokan sa nasyon) nagputik man manongod ki Onias. Sinabi niya na iyo ini an dahelan kan pagsalakay ki Heliodoro asin kan nangyari sa saiyang karatan.

²Mapangahas niyang sinabi na si Onias nagpaplano laban sa gobyerno—si Onias na bako sanang nagtao sa Jerusalem asin nag-ingat kan Templo, kundi maimbod na nagkuyog kan mga togon.

³Si Apollonio na aki ni Menesteo, na gobernador kan Dakulang Siria, iyo an nagpakosog kan boot ni Simon sa lambang karatan na gibohon niya. Nagkosog an pagsalungat ni Simon, kaya naggibo nin nagkapirang panggagadan an saro kan mga parasunod niya. Nahiling ni Onias na nagin masakit an sitwasyon,

⁴

⁵kaya nagduman siya sa hade, alagad bakong sa katuyohan na mag-akusar kan saiyang mga kahimanwa, kundi tanganing makiolay para sa karahayan kan gabos na Judio, sa buhay nindang pribado o publiko.

⁶Nahiling ni Onias na kun dai makikilabot an hade, dai na nanggad magkakaigwa nin katoninongan, asin dai mag-oontok si Simon sa saiyang kalolongan.

⁷Kan nagadan si Seleuco asin nagsalihid bilang hade si Antioco na inaapod man Epifanes, nagin Halangkaw na Padi sa maraot na paagi si Jason na tugang ni Onias.

⁸Nagdolok siya sa hade asin nanuga na matao nin beynte y syete mil na libra nin plata asin nanuga na dadagdagan pa ini ngapit nin seis mil na libra.

⁹Laen pa kaini, nanuga pa siya na matao nin onse mil dos syentos singkwentang libra nin plata kun tutugotan siyang magtugdok nin sarong dakulang estadyum saka mag-organisar nin mga hoben na lalaking parakawat. Gusto niyang iayon an mga taga Jerusalem bilang mga namamanwaan nin Antiokia.

¹⁰Nag-oyon an hade. Kaya pagtukaw ni Jason bilang Halangkaw na Padi, ginibo niyang mamuhay an mga taga Jerusalem arog kan pamumuhay kan mga Griyego.

¹¹Pinonan niyang haleon an mga deretso kan mga Judio na itinao sainda kan naenot na mga hade huli ki Juan na ama ni Eupolemo. (Si Eupolemo iyo an sugo na nagduman sa Roma tanganing makipagkatood asin makipag-alyansa sa mga taga Roma). Hinale man ni Jason an mga kaugalean kan Judio asin ipinamidbid an bagong mga kaugalean na salungat sa Katogonan.

¹²Dakula an entusyasmo na nagtugdok siya nin sarong dakulang estadyum na harani sa bulod kan Templo asin pinangenotan niya an piniling mga hoben na lalaki tanganing akoon an Griyegong kaugalean na pagpartisipar sa karawat.

¹³Huli kan grabeng karatan ni Jason, an lalaking bakong diosnon asin bakong totoong Halangkaw na Padi, an pagkagusto sa pamumuhay na Griyego asin sa mga kaugalean na dayuhan uminabot sa panahon

¹⁴na maski an mga padi nawaraan na nin gana sa pag-otob kan saindang banal na mga katongdan. Nawara an saindang gana sa paglingkod sa Templo asin pinabayaan ninda an pagdolot kan mga sakripisyo. Sa oras na nadangog ninda an tanog sa pagpoon kan karawat, hidali na sindang minahale tanganing makapartisipar sa mga karawat na ipinapangalad kan satong Katogonan.

¹⁵Dai ninda pinagmakulogan an anoman na bagay na mahalaga sa mga ginikanan ninda; an pinahalagahan sana ninda iyo idtong mahalaga para sa mga Griyego.

¹⁶Iyo ini an nagin dahelan kan gabos nindang problema, huli ta an mga tawong inomaw ninda asin boot arogon nanggad iyo an nagin kaiwal ninda asin iyo an nagpasakit sainda.

¹⁷Huli ta sarong magabat na bagay an magbasang-basang sa Katogonan nin Dios, arog kan mahihiling nindo sa minasunod na mga pangyayari.

¹⁸Kaidtong panahon kan an hade yaon sa syudad nin Tiro sa paghiling kan karawat na ginigibo lambang ikalimang taon,

¹⁹an maraot na tawong si Jason nagpadara duman nin nagkapirang lalaki na hale sa Jerusalem, na mga syudadano na man nin Antiokia, tanganing darahon an beynte y dos mil kinyentos na libra nin plata para sa sakripisyo sa dios-dios na si Hercules. Alagad naisip kan mga sinugo na bakong tama na gamiton an siring na kadakulang kantidad para sa sakripisyo,

²⁰kaya ginamit ninda an kwarta na kutana para ki Hercules, sa pagpagibo nin mga barko para sa gera.

²¹Kan si Apollonio na aki ni Menesteo iyo an ipinadara sa Egipto tanganing mag-atender kan pagkorona ki Filometor bilang hade, naaraman ni Antioco na bako oyon si Filometor sa saiyang mga palakaw. Nahadit siya manongod sa seguridad kan sadiri niyang kahadean, kaya nagduman siya sa Jope dangan nagdagos sa Jerusalem.

²²Maogma siyang sinabat ni Jason asin kan bilog na syudad na gabos may darang karaba saka nagkukurahaw sa kaogmahan. Hale sa Jerusalem, pinangenotan ni Antioco an saiyang hukbo pasiring sa Fenicia.

²³Pakalihis nin tolong taon, sinugo ni Jason si Menelao (tugang siya ni Simon na nasambit na kaidto) tanganing magdara nin kwarta sa hade saka makihumapot manongod sa nagkapirang mahalagang bagay.

²⁴Alagad kan mag-atubang siya sa hade, nagpahiling si Menelao na garo baga siya sarong mapangyaring tawo, asin napasaiya an katongdan na Halangkaw na Padi sa paagi nin pagtao sa hade nin dakulang kantidad, na labi pa sa beynte y dos mil kinyentos na libra nin plata na itinao ni Jason.

²⁵Nagbalik siya sa Jerusalem na may darang mga kasuratan na hale sa hade, na nagpapatotoo na siya an Halangkaw na Padi. Alagad mayo siya nin kakayahan; igwa sana siya kan isog nin sarong mabangis na pamayo asin kan karingisan nin sarong lalaw na hayop.

²⁶Kaya si Jason na nandaya kan sadiring tugang nadaya man nin ibang tawo, asin napiritan siyang magdulag pasiring sa daga kan mga Ammonita.

²⁷Nagpadagos si Menelao sa pagigin Halangkaw na Padi, alagad ni minsan dai siya nagtao kan kwartang ipinanuga niya sa hade.

²⁸Si Sostratus na kapitan kan bantayan sa Jerusalem dai nag-ontok sa pagsingil saiya huli ta katongdan niya idto. Alagad habo nanggad magbayad si Menelao, kaya ipinaapod sindang duwa kan hade.

²⁹Iwinalat ni Menelao an katongdan na Halangkaw na Padi sa saiyang tugang na si Lisimaco, mantang iwinalat man ni Sostratus an pamamahala kan bantayan ki Crates na pamayo kan tinandanan na mga soldados sa Chipre.

³⁰Mantang siring kaiyan an nangyayari duman, nangyari man na nagrebelde an mga taga Tarsus asin mga taga Mallo huli ta itinao kan hade an saindang mga syudad ki Antiokis, na kasaroan kan hade.

³¹Kaya hidaling naghale an hade tanganing ontokon an kariribokan. Iwinalat niya ki Andronico, na saro sa mga halangkaw niyang opisyal, an pamamahala sa saiyang kahadean.

³²Kinua ni Menelao an oportunidad na ini asin tinawan niya si Andronico nin nagkapirang bulawan na kasangkapan na hinabon niya sa Templo sa Jerusalem. An ibang kasangkapan ipinabakal na niya sa syudad nin Tiro asin sa kataraed na syudad.

³³Kan maaraman ini ni Onias, nagtago siya sa sarong templo sa Dafne na harani sa syudad nin Antiokia, asin hayag na inakusar niya si Menelao.

³⁴Dangan hilom na pinirit ni Menelao si Andronico na gadanon si Onias. Kaya nagduman si Andronico ki Onias asin dinaya niya ini sa paagi nin marahay na pakikipag-olay saka mga panuga nin kaligtasan. Maski nagduda si Onias, nadagka man giraray siya ni Andronico na magluwas sa templo; dangan ginadan siya tolos ni Andronico.

³⁵Naanggot nin marahay an mga Judio saka mga pagano huli kan paggadan ki Onias.

³⁶Kaya kan magbalik an hade hale sa rehiyon nin Cilicia, nagduman saiya an mga Judio sa Antiokia asin nagreklamo sinda saiya manongod kan mayong dahelan na paggadan ki Onias. Siring man kaini an namatean kan mga Griyego.

³⁷Labi-labi an kamondoan ni Hadeng Antioco. Naherak saka nagtangis an hade kan magiromdoman niya an kadonongan asin pagpugol sa sadiri na ipinahiling ni Onias kan siya nabubuhay pa.

³⁸Naanggot siyang marahay kaya ginisi niya an purpurang gubing ni Andronico, hinubaan, saka ilinibot sa syudad sagkod sa lugar na ginadanan niya ki Onias. Dangan ipinagadan ni Antioco an tawong ini na paha sa dugo. Siring kaini an paagi nin Kagurangnan kan itao niya an padusang maninigo saiya.

³⁹Kadakul na beses na hinabonan ni Lisimaco an Templo sa tabang kan saiyang tugang na si Menelao. Kadakul nang bulawan na mga kasangkapan an kinua niya kaya kan naaraman ini kan mga tawo, nagtiripon sinda bilang pagprotesta ki Lisimaco.

⁴⁰Nagigin maisog na an mga tawo saka dai na pwedeng pugolon, kaya nagpadara si Lisimaco nin tres mil na armadong kalalakihan tanganing salakayon sinda. Pinangenotan sinda ni Aurano, na an kalolongan kapareho kan saiyang pagkagurang.

⁴¹An pagsalakay ni Lisimaco naaraman kan mga Judiong nasa patyo kan Templo kaya nagpururot sinda nin mga gapo, mga kahoy saka mga abo hale sa altar, dangan tarantang itinapok ninda ki Lisimaco asin sa mga tawohan niya.

⁴²Nakagadan sinda nin nagkapira sa mga tawohan ni Lisimaco saka nakalugad nin dakul; nakadulag an ibang tawohan. Si Lisimaco, na mahabon sa Templo, nagadan sa may harani kan kaban nin yaman sa Templo.

⁴³Huli kan nangyaring ini, inakusar si Menelao kan mga tawo.

⁴⁴Kan magduman an hade sa syudad nin Tiro, nagpadara nin tolong lalaki an mga awtoridad na Judio tanganing magsumbong saiya kan ginibo ni Menelao.

⁴⁵Kan mahiling ni Menelao na madadaog siya sa kaso, sinuholan niya nin dakulang halaga si Tolome na aki ni Dorimenes tanganing piriton an hade na maghatol nin pabor saiya.

⁴⁶Kan ipag-iba ni Tolome an hade sa patyo, na garo baga magpapapresko, pinirit niya na magbago nin isip an hade.

⁴⁷Kaya pinatawad kan hade si Menelao maski siya an dahelan kan gabos na karatan, asin hinatolan nin kagadanan an tolong mayo nin palad na mga sugo na magigin mga talingkas maski inatubang sa maringis na mga Escita.

⁴⁸Nagtaram an tolong lalaki sa pagdepensa sa Jerusalem, sa namamanwahan kaini, asin sa sagradong mga kagamitan na hinabon sa Templo, alagad mayo nin hustisya na ginadan sinda tolos.

⁴⁹Alagad naanggot an nagkapira sa mga taga Tiro huli kan krimen na ini asin ipinahiling ninda an saindang paggalang sa tolong ginadan sa paagi nin pagtao sainda nin sarong mamuraway na lubong.

⁵⁰Nagdanay si Menelao sa saiyang katongdan huli kan mga tawong paslo sa kapangyarihan. Orog siyang nagin maraot asin nagin pinakamakuring kaiwal kan sadiri niyang banwaan.