Read Central Bicolano 2 Maccabees 5 Bible Online

2 Maccabees 5 - Central Bicolano bible

2 Maccabees 5

¹An pangyayaring ini haros kasabay kan ginibong ikaduwang pagsalakay ni Antioco an Ikaapat sa Egipto.

²Sa laog nin kwarentang aldaw an gabos na tawo sa bilog na Jerusalem nakahiling nin mga bisyon nin nakakabayong soldados na nakagubing nin bulawan asin nagsasalakay sa kaitaasan. Igwa nin armas na garod an mga parakabayo asin kapot ninda an saindang mga espada.

³Nakalinya sinda na magkahampang asin nagraralaban. Nagtataginting an mga kalasag, nag-uuran an mga garod, asin nagraralayog an mga busog. An manlaen-laen na armas asin an bulawan na mga kamadero sa kabayo nagsisirilyab sa liwanag kan aldaw.

⁴Namibi an lambang saro sa syudad na an mga bisyon na ini magin marahay na mga tanda.

⁵Kan maglakop an salang bareta na gadan na si Antioco, nagkua si Jason nin sobra sa sarong ribong kalalakihan asin biglang sinalakay an Jerusalem. Pinasiribog ninda an mga lalaking nagbabantay sa mga kudal kan syudad sagkod na nasakop ninda an syudad. Nagdulag si Menelao pasiring sa bantayan, na harani sa bulod kan Templo,

⁶mantang padagos an mayo nin herak na paggadan ni Jason sa kapwa niya mga Judio. Dai niya naisip na an kauswagan na nakamit huli sa paggadan nin sadiring mga kadugo iyo an pinakamaraot na klase nin kadimalasan. An saiyang kauswagan ibinilang niya na sarong kapangganahan laban sa saiyang mga kaiwal, embes na sarong pagkadaog kan sadiring banwaan.

⁷Alagad dai napasaiya an gobyerno. Embes kaiyan napiritan siyang magdulag giraray pasiring sa daga kan mga Ammonita asin sa kataposan mayo nin itinao saiya an maraot niyang plano kundi kasosopgan asin pagkawara nin onra.

⁸Makaheherak an nagin kataposan kan saiyang buhay. Ibinilanggo siya ni Aretas, na pamayo kan mga Arab; ibinilang siya na sarong kriminal asin kinaongisan huli ta nagpasaluib siya sa sadiri niyang banwaan; linamag siya kan lambang saro kaya nagtago siya sa manlaen-laen na banwa. Nagdulag siya pasiring sa Egipto,

⁹dangan sa Grecia, na naglalaom na makakapaili sa kaibahan kan mga taga Esparta, na kadugo kan mga Judio. An tawong ini, na nagin dahelan kan pagharale kan dakul na tawo sa sadiri nindang daga, nagadan sa sarong dayuhan na daga.

¹⁰Kadakul an ginadan ni Jason asin dai niya sinda ipinalubong; ngunyan an saiyang pagkagadan dai lamang pinagmondoan. Dai siya tinawan nin marahay na paglubong ni ilinubong sa kaibahan kan saiyang mga ginikanan.

¹¹Kan an bareta manongod sa nangyari sa Jerusalem nakaabot ki Antioco, inisip niya na nagrebelde an bilog na Judea, asin nagin maringis siya arog sa sarong lalaw na hayop. Kaya naghale siya sa Egipto dangan marikas na sinalakay an Jerusalem.

¹²Pinagbotan niya an saiyang mga tawohan na gadanon na mayo nin herak an siisay man na masabatan ninda saka gadanon an siisay man na nagtatago sa mga harong.

¹³Ginadan ninda an lambang saro—an mga lalaki saka mga babae, an mga aking lalaki saka mga aking babae; ginadan ninda maski an mga omboy.

¹⁴Sa laog nin tolong aldaw otsenta mil an nawara sa Jerusalem; kwarenta mil an nagadan kan gibohon an pagsalakay asin kwarenta mil an ipinabakal bilang mga oripon.

¹⁵Alagad dai pa nakontento si Antioco. Mapangahas siyang naglaog sa pinakabanal na Templo sa bilog na kinaban, sa pangenot ni Menelao na nagpasaluib sa saiyang relihiyon asin sa sadiring banwaan.

¹⁶Kinua kan maati saka bakong banal niyang mga kamot an mga banal na kagamitan asin sinamsam an mga regalo kan ibang mga hade na para sa ikakaorog kan kamurawayan asin kaomawan kan Templo.

¹⁷Naogma nin marahay si Antioco huli sa panggana niya kaya dai niya inisip na itinugot nin Kagurangnan na madigtaan an saiyang banal na Templo, huli ta pinaanggot siya sa kadikit na panahon kan mga taga Jerusalem.

¹⁸Kun bakong huli sa kadakul na kasalan kan mga taga Jerusalem, pinadusahan kutana nin Dios si Antioco bago niya ginibo an kalolongan na idto. Nangyari kutana saiya an arog kan nangyari ki Heliodoro, na sinugo ni Hadeng Seleuco tanganing magsiyasat kan kaban nin yaman.

¹⁹Alagad dai pinili nin Kagurangnan an saiyang banwaan para sa Templo; pinatindog niya an saiyang Templo para sa mga tawo.

²⁰Kaya an Templo nagin kahiras kan mga tawo sa kasakitan alagad ngapit nagin kahiras man kan saindang kauswagan. Pinabayaan iyan nin Kagurangnan kan maanggot siya, alagad ibinalik niya an kamurawayan kaiyan kan mahale an saiyang kaanggotan.

²¹Nagkua si Antioco nin syento treynta y singko mil na libra nin plata sa Templo saka hidaling nagduman sa Antiokia. Sa saiyang kapaabaw-abawan, naghona siya na maski an mamarang daga kaya niyang paagihan nin mga barko asin an dagat palakawan sa saiyang mga soldados.

²²Nagpili siya nin mga gobernador na magpapasakit sa mga tawo. Sa Jerusalem an ibinugtak niya iyo si Felipe, sarong taga Frigia na orog pang makuri ki sa saiya.

²³Sa Bukid nin Gerizim an ibinugtak niya iyo si Andronico. Laen pa sainda, yaon man si Menelao, na orog an ginibong karatan sa kapwa niya mga Judio ki sa ginibo kan ibang mga gobernador,

²⁴kaya ipinadara niya sa Jerusalem an sarong hukbo na beynte dos mil na soldados sa pamamayo ni Apollonio, na kapitan kan mga soldados na taga Misia. Igwa sainda nin pagboot na gadanon an lambang lalaki sa syudad saka ipabakal an kababaehan asin mga aking lalaki bilang mga oripon.

²⁵Kan mag-abot sa Jerusalem si Apollonio, nagsagin-sagin siya na katoninongan an saiyang katuyohan. Dangan kan aldaw nin Sabbath, kan sineselebrar kan gabos na Judio an aldaw nin pahingalo, pinangenotan niya an saiyang hukbo, na gabos igwa nin armas, sa sarong parada sa luwas kan syudad.

²⁶Nagboot siya sa saiyang mga soldados na gadanon an lambang saro na magluwas sa paghiling sainda, dangan nagralaog sinda sa syudad saka ginaradan an kadakul na tawo.

²⁷Alagad si Judas Maccabeo saka an siyam pang iba nakadurulag pasiring sa kalangtadan asin nag-erok sinda duman na garo mga lalaw na hayop. Tanganing dai sinda madigtaan, nagkakan sana sinda kan mga tanom na nakua nindang nagtatalubo sa kabukidan.