Read Central Bicolano 2 Maccabees 6 Bible Online

2 Maccabees 6 - Central Bicolano bible

2 Maccabees 6

¹Dai nahaloy, nagpadara an hade nin sarong gurang na taga Atenas tanganing piriton an mga Judio na bayaan an saindang relihiyon asin an mga kaugalean kan saindang mga ginikanan.

²Sinugo man siya tanganing digtaan an Templo sa Jerusalem saka ikonsagra ini sa dios-dios na si Zeus nin Olimpia. An Templo sa Bukid nin Gerizim, opisyal na ngangaranan na “Templo ni Zeus, an Katood kan mga Dayuhan,” sosog sa kahagadan kan mga tawong nag-eerok duman.

³An pang-aapi makuri nin marahay asin dai na haros matagalan nin siisay man.

⁴An Templo ginibo kan mga pagano na lugar nin bururatan asin nin gabos na karigsokan. Nagkurua an mga pagano nin mga maraot na babae asin nagdororog sinda sa laog kan Templo. Nagdara sinda nin mga bagay na dai pwedeng isakripisyo.

⁵An altar napano nin makauuyam na mga dolot na ipinagbabawal kan Katogonan.

⁶Dai na pwedeng pabanalon kan mga Judio an Sabbath asin selebraron an mga kapyestahan kan banwaan; dai na ngani ninda pwedeng sabihon na sinda mga Judio.

⁷Lambang bulan, kun sineselebrar an kumpleanyo kan hade, pirit na pinapakakan an mga Judio kan mga bituka kan hayop na isinakripisyo. Dangan kun kapyestahan kan dios-dios na si Dionisio, kaipuhan na mag-iba sinda sa prosisyon na nakakorona nin palmera.

⁸Huli sa hatol ni Tolome pinagbotan an mga kataraed na syudad na Griyego na piriton ninda an mga Judio na kakanon an mga sakripisyo;

⁹sinabihan sinda na gadanon an lambang Judio na magsayuma na akoon an pamumuhay na Griyego. Maliwanag na dakul pang kasakitan an mangyayari.

¹⁰Halimbawa, duwang babae an dinakop huli ta tinatak ninda an saindang omboy na aki, ipinaparada sinda sa syudad na nakagakod sa saindang daghan an saindang mga aki dangan ihinuhulog sinda hale sa ibabaw kan kudal kan syudad.

¹¹Sa saro pang okasyon, igwa nin nagsabi ki Felipe na nagtiripon sa sarong lungib an nagkapirang Judio tanganing hilom na selebraron an Sabbath. Nagsalakay si Felipe saka buhay na sinulo sinda gabos. Dakula an paggalang ninda sa Sabbath kaya dai sinda naglaban tanganing magdepensa kan sadiri nindang buhay.

¹²Nakikimaherak ako saindo na dai kamo mawaraan nin kosog nin boot mantang binabasa nindo an manongod sa nangyaring mga kasakitan. Isipon nindo na an mga padusang ini iyo an paagi nin Kagurangnan bakong para tunawon an saiyang banwaan kundi para disiplinahon sinda.

¹³Sa katotoohan, an pagpadusa tolos sa sarong nagkasala embes na pahaloyon pa iyan, sarong tanda nin kabootan.

¹⁴An pagtratar nin Kagurangnan sa ibang mga nasyon bakong arog kan pagtratar niya sato: minahalat nanggad siya sagkod na mag-abot sinda sa kasagkoran nin saindang pagkakasala bago niya sinda pinapadusahan,

¹⁵alagad pinapadusahan na niya kita bago kita magkasala nin dakul.

¹⁶Kaya danay na maheherakon an Kagurangnan sa sato, kita na sadiri niyang banwaan. Maski ngani dinidisiplina niya kita sa paagi nin mga kasakitan, alagad dai nanggad niya kita pinapabayaan.

¹⁷Ibilang nindong sarong pagiromdom an mga sinabi ko. Ipapadagos ta na an istorya.

¹⁸Igwa kaidto nin gurang saka iginagalang na paratukdo kan Katogonan na an ngaran Eleazar. Boot nindang pakakanon si Eleazar nin karneng orig kaya pinirit ninda siyang magbuka kan saiyang ngoso.

¹⁹Alagad mas pinaorog niyang magadan na igwa nin onra ki sa mabuhay na igwa nin digta. Kaya ilinuwa niya an karne saka nagpasiring sa lugar na pagpapasakitan saiya. Ipinahiling niya na kaipuhan magin makosog an boot kan tawong masayuma na magkakan kan pagkakan na maati sosog sa Katogonan, maski katimbang ini kan saiyang buhay.

²¹Haloy nang katood ni Eleazar an mga tawong namamahala kan sakripisyo asin huli kan pagkakatood na ini, hilom na sinabihan ninda siya na magdara nin karne na pwede niyang kakanon sosog sa Katogonan. An dapat sana niyang gibohon iyo an magsagin-sagin na kinakakan an karneng orig, tanganing dai siya paggadanon.

²³Alagad naggibo si Eleazar nin sarong desisyon na maninigo sa saiyang maputing buhok asin edad. Sa bilog niyang buhay kinuyog nanggad niya an banal na Katogonan nin Dios, kaya nagsimbag siya, “Gadanon nindo ako ngunyan.

²⁴An siring na pagsagin-sagin bako nang maninigo sa edad kong ini. Hohonaon kan dakul na hoben na pinagnegaran ko an sakong pagtubod pag-abot ko sa edad na nubentang taon.

²⁵Kun magsagin-sagin ako na nagkakan kan karneng ini tangani sanang mabuhay ako nin kadikit pang panahon, magdadara sako iyan nin kasosopgan saka pagkawara nin onra asin magigin dahelan iyan tanganing malagalag an dakul na hoben.

²⁶Pwede ko ngunyan na dulagan an gigibohon nindo sako, alagad mabuhay man ako o magadan, dai ko madudulagan an Dios na Makakamhan.

²⁷Kun maisog akong magadan ngunyan, magpapahiling iyan na maninigo sako an halawig na buhay.

²⁸Magwawalat pa iyan nin sarong marahay na halimbawa sa mga hoben—an tuyo saka magayagayang pagpapagadan para sa satong sagrado saka iginagalang na Katogonan.” Pakasabi niya kan mga bagay na ini, nagduman siya tolos sa lugar na pagpapasakitan saiya,

²⁹asin an mga tawong dai pa nahahaloy nagpahiling nin kabootan saiya, ngunyan anggot na huli ta sa paghona ninda nagtaram siya arog sa sarong lolong.

³⁰Kinulogan ninda si Eleazar asin kan haros magagadan na siya, nag-agrangay siya saka nagsabi, “Igwa an Kagurangnan kan gabos na banal na pakaaram. Naaaraman niya na pwede kong dulagan an mangirhat na mga kasakitan na ini asin kagadanan, alagad naaaraman man niya na maogma kong tinitios an mga bagay na ini huli ta igwa ako nin pagkatakot saiya.”

³¹Kaya nagadan si Eleazar. Alagad an saiyang maisog na pagkagadan giniromdom bilang sarong mamuraway na halimbawa, bako sana kan mga hoben, kundi kan bilog na nasyon.