Read Central Bicolano 2 Maccabees 7 Bible Online

2 Maccabees 7 - Central Bicolano bible

2 Maccabees 7

¹Sa saro man na okasyon igwa nin dinakop na sarong Judiong ina asin an saiyang pitong aking lalaki. Sa pagboot kan hade, pinasakitan sinda tanganing mapiritan sindang magkakan kan karneng orig na ipinagbabawal kan Katogonan.

²Dangan saro sa mga hoben na lalaki an nagsabi, “Ano an linalaom nindong pakinabang sa ginigibo nindong ini? Orog pang mamarahayon mi na magadan ki sa talikodan an mga katogonan kan samong mga ginikanan.”

³Naanggot nin marahay an hade kaya nagboot siya na initon an mga darakulang kaldero saka mga kawa,

⁴asin ginibo tolos an saiyang pagboot. Dangan pinagbotan kan hade an saiyang mga tawohan na putolon ninda an dila kan nagtaram, baklason an kublit kan payo dangan putolon an saiyang mga kamot saka mga bitis, mantang naghihiling an saiyang ina saka anom na tugang.

⁵Pakatapos nindang gibohon an mga pasakit na idto, asin mantang naghahangos pa an hoben, nagboot an hade na buhaton an hoben dangan itapok sa sarong kaldero. Mantang nag-iitaas an aso hale sa kaldero, nagsinarabihan an mag-irina tanganing pakosogon an boot kan lambang saro,

⁶“Naghihiling an Kagurangnan na Dios asin nasasabotan niya an satong kasakitan. Malinaw na ipinahayag ini ni Moises kan suraton niya an awit na minakondenar sa nagtalikod sa Kagurangnan. Iyo ini an sinabi niya, ‘Maheherakan nin Kagurangnan an mga naglilingkod saiya.’”

⁷Pakatapos na magadan an enot na tugang sa paaging idto, kinalwagan kan mga soldados an ikaduwa sa paagi nin pagrabnot kan mga buhok sa saiyang payo kaiba an kublit. Dangan hinapot ninda siya, “Kakakanon mo na daw ngunyan an karneng orig na ini o boot mong putolon mi nin saro-saro an saimong mga kamot sagkod mga bitis?”

⁸Nagsimbag siya sa sadiri niyang tataramon, “Dai ko nanggad iyan kakakanon!” Kaya pinasakitan ninda siya, siring kan ginibo ninda sa enot na tugang.

⁹Kan magagadan na siya, nagkurahaw siya sa hade, “Paragadan nin tawo! Pwede mo kaming gadanon, alagad bubuhayon giraray kami kan Hade kan bilog na kinaban asin tatawan niya kami kan buhay na mayo nin kataposan, huli ta kinuyog mi an saiyang mga togon.”

¹⁰An sunod na biktima kan saindang pagkaralwag iyo an ikatolong tugang. Kan siya pagbotan na iluwas an saiyang dila, ginibo tolos niya ini asin daing takot na inunat niya an saiyang mga kamot.

¹¹Makosog an saiyang boot na nagsabi, “Itinao ini sako kan Dios. Alagad mas mahalaga sako an saiyang Katogonan ki sa sakong mga kamot, asin naaaraman ko na itatao niya giraray ini sako.”

¹²Nagngalas an hade saka an mga kairiba niya sa ipinahiling na kosog nin boot kan hoben asin sa pagigin andam niyang magtios.

¹³Pakagadan niya, pinasakitan ninda an ikaapat sa siring na makuring paagi.

¹⁴Kan magagadan na siya, nagsabi siya, “Maogma akong magagadan sa kamot nindo, huli ta igwa kami nin kasigurohan na bubuhayon giraray kan Dios. Alagad mayo nin pagkabuhay liwat para saimo, Antioco!”

¹⁵Kan an ikalimang tugang kuahon kan mga soldados saka poonan na pasakitan

¹⁶naghiling siya sa hade saka nagsabi, “Igwa ka nin kapangyarihan na gibohon samo an ano man na boot mo, maski na magagadanon ka man. Alagad dai mo pag-isipon na pinabayaan na nin Dios an samong banwaan.

¹⁷Hilingon mo, huli ta gagamiton nin Dios an dakula niyang kapangyarihan tanganing pasakitan ka sagkod an saimong mga kapagarakian.”

¹⁸Sunod na kinua kan mga soldados an ikaanom na aking lalaki, asin bago nagadan nagsabi ini, “Dai nanggad kamo masala. Nagtitios kami kan maninigo samo huli ta nagkasala kami sa samong Dios. Iyan an dahelan kun tadaw ta nangyari samo an gabos na kasakitan na ini.

¹⁹Alagad dai kamo maghona na malilikayan nindo an padusa sa pagtumang nindo sa Dios.”

²⁰An orog na makangalas asin maninigo na tawan nin espesyal na lugar sa satong giromdom iyo an ina. Maski nahiling niya na nagadan sa laog nin saro sanang aldaw an pito niyang aking lalaki, tinios niya iyan sa dakulang kosog nin boot huli ta nagsarig siya sa Kagurangnan.

²¹Pinakosog niya an saiyang boot arog sa kosog nin boot nin sarong lalaki dangan tinaraman niya nin mga tataramon na pangpakosog nin boot an lambang saro kan saiyang aki sa sadiri nindang lengwahe.

²²“Dai ko aram kun paano nagpoon an saimong buhay sa laog kan sakong tulak,” an sabi niya. “Bako ako an nagtao saimo nin buhay saka hinangos, ni nagbilog kan lambang kabtang kan saimong hawak.

²³An Dios iyo an kaggibo kaiyan, an Dios na kaglalang kan bilog na kinaban, kan mga tawo asin kan gabos na nabubuhay. Maheherakon siya asin tatawan ka niya giraray nin buhay saka hinangos huli ta orog an pagkamoot mo sa saiyang Katogonan ki sa pagkamoot mo sa saimong buhay.”

²⁴Nasiguro ni Antioco na pinag-oolog-olog siya kan ina kaya ginibo niya an gabos tanganing makombenser an pinakangohod na aki kan babae na talikodan niya an mga kaugalean kan saiyang mga ginikanan. Pinanugaan niya an aki na gigibohon niya ining mayaman saka bantog; tatawan pa niya nin halangkaw na katongdan saka ngaran na “Katood kan Hade.”

²⁵Alagad dai dinangog kan aki si Antioco, kaya inapod niya an ina kan aki saka pinirit na kaolayon an saiyang aki na iligtas an sadiring buhay.

²⁶Huli sa pagparapirit kan hade, nag-oyon an ina na kaolayon an saiyang aki.

²⁷Nagrani siya sa saiyang aki, dangan bilang pag-olog-olog sa hade, kinaolay niya an saiyang aki sa sadiri nindang lengwahe. Nagsabi siya, “Aki ko, maherak ka sako. Giromdoma na dinara taka sa sakong tulak sa laog nin siyam na bulan asin pinasuso sa laog nin tolong taon. Pinadakula taka, pinaeskwela, patin inataman sagkod ngunyan.

²⁸Nakikiolay ako, aki ko, na masdan mo an langit asin an daga. Horophoropa an lambang mahiling mo diyan asin midbidon mo na linalang nin Dios an gabos na iyan, siring kan paglalang niya sa katawohan.

²⁹Dai ka matakot sa paragadan na iyan, kundi patunayan mo sa saimong mga tugang na saro kang mahalagang tawo. Akoon mo an kagadanan tanganing sa herak nin Dios akoon taka giraray sa pagkabuhay liwat kaiba kan saimong mga tugang.”

³⁰Bago nakatapos magtaram an ina, nagsabi an aki, “Ano pa an hinahalat mo, Hadeng Antioco? Dai ko kukuyogon an mga pagboot mo. An kinukuyog ko sana iyo an mga pagboot sa Katogonan na itinao ni Moises sa samong mga ginikanan.

³¹Inisip mo an gabos na klase nin karatan laban sa samong banwaan alagad dai ka makakadulag sa padusa na inandam nin Dios para saimo.

³²Totoong gayo na naaanggot samo an samong buhay na Kagurangnan asin pinapatios niya kami huli kan samong mga kasalan. Ginigibo niya ini tanganing tanoson kami saka disiplinahon. Alagad dai ini maghahaloy huli ta kami pa an saiyang mga sorogoon, patin papatawadon niya kami.

³³

³⁴Alagad ika an pinakamakuri asin makauuyam sa gabos na tawong nabubuhay. Kaya dai mo pagdayaon an saimong sadiri sa salang mga kaisipan nin kadakulaan mantang pinapadusahan mo an banwaan nin Dios.

³⁵Dai ka makakadulag sa padusa kan Makakamhan na Dios na nakakahiling kan gabos.

³⁶Nagtios nin halipot na panahon an sakong mga tugang huli kan samong kaimbodan sa tipan nin Dios, alagad ngunyan naglaog sinda sa buhay na mayo nin kataposan. Alagad mapapasairarom ka kan paghukom nin Dios asin papadusahan ka kan maninigo sa saimong kapalangkawan.

³⁷Arog kan ginibo kan sakong mga tugang, idinodolot ko ngunyan an sakong hawak asin buhay para sa Katogonan kan samong mga ginikanan. Alagad ipinapamibi ko na maherakan tolos nin Dios an saiyang banwaan dangan pasakitan ka niya sagkod na mapiritan ka na mag-ako na siya sana an Dios.

³⁸Kami logod na magturugang an huring magdusa kan kaanggotan kan Makakamhan na Dios, na matanos niyang ipinadara sa bilog ming nasyon.”

³⁹Naanggot nin marahay si Antioco sa mga tataramon na idto, kaya orog niyang pinasakitan an aki ki sa mga tugang niya.

⁴⁰Nagadan an aki na bilog an pagsarig sa Kagurangnan; dai nanggad siya nagtalikod saiya maski sa halipot na panahon.

⁴¹Pakatapos na magadan an pitong aki, ginadan man an ina.

⁴²Alagad tama na an mga itinaram ko manongod sa mga Judio na pinasakitan saka pinirit na magkakan kan mga bituka kan mga dolot na hayop.