Read Central Bicolano 2 Maccabees 8 Bible Online

2 Maccabees 8 - Central Bicolano bible

2 Maccabees 8

¹Si Judas Maccabeo saka an saiyang mga katood hilom na nagduman sa mga baryo sagkod na nakatipon sinda nin haros seis mil na kalalakihan na nagdanay sa pagtubod na Judaismo.

²Nakimaherak sinda sa Kagurangnan na tabangan an saiyang banwaan na tinimaktimakan ngunyan kan gabos na mga nasyon, na maherak sa Templo na dinigtaan kan mga pagano,

³dangan maherak sa Jerusalem na raot na ngunyan saka haros patag na.

⁴Nakimaherak sinda sa Kagurangnan na giromdomon an mayong herak na paggadan sa mga inosenteng aki saka an paglanghad sa saiyang ngaran, patin ipahiling niya an saiyang pagkaongis sa karatan.

⁵Kan matapos ni Judas an pag-organisar kan saiyang hukbo, dai nakayang lumaban saiya an mga pagano, huli ta an dating kaanggotan nin Kagurangnan sa mga Judio naribayan nin pagkaherak.

⁶Mayong patanid na sinasalakay ni Judas an mga banwa saka mga baryo dangan sinusulo. Nasakop niya an mahahalagang lugar kan mga kaiwal asin dakul sainda an nagdurolag. Nahiling niya na orog an saindang panggagana kun banggi sinda nagsasalakay. An saiyang kaisogan nakalakop sa gabos na lugar.

⁸Nahiling ni Felipe na gobernador kan Jerusalem an luway-luway na pagsakop ni Judas sa manlaen-laen na lugar asin an sunod-sunod na panggana niya sa ralaban, kaya nagsurat si Felipe ki Tolomeo na gobernador kan Dakulang Siria, tanganing hagadan nin tabang sa pagdepensa sa gobyerno kan hade.

⁹Pinili tolos ni Tolomeo si Nicanor na aki ni Patroclo, na saro man sa mga haraning katood kan hade, dangan sinugo niya kaiba an sobra sa beynte mil na soldados na hale sa manlaen-laen na nasyon tanganing puhoon an bilog na rasa kan Judio. Pinili man ni Tolomeo si Gorgias, sarong eksperyensyadong heneral kan hukbo tanganing mag-iba saiya.

¹⁰Igwa si Hadeng Antioco nin utang na syento singkwenta mil na libra nin plata sa mga Romano asin plano ni Nicanor na bayadan an utang na idto sa paagi nin pagpabakal kan mga bihag na Judio bilang mga oripon.

¹¹Kaya ipinaisi niya sa mga banwa na nasa tampi kan dagat na magpapabakal siya nin mga Judio na an kantidad kan lambang saro dai pa maabot sa sarong libra nin plata. Alagad dai niya naaraman an padusang inandam saiya kan Makakamhan na Dios.

¹²Naaraman ni Judas na nagdadangadang si Nicanor kaiba an saiyang hukbo, kaya ipinaaram niya ini sa saiyang mga tawohan.

¹³An mga matalaw asin an mga dai nagtubod sa hustisya nin Dios, nagdaralagan tolos saka nagdurolag.

¹⁴Alagad ipinabakal kan iba an natatada nindang mga rogaring tanganing ibilang sinda kan Kagurangnan sa mga maninigong iligtas ki Nicanor, an tawong mayong dios patin nagpabakal na sainda maski dai pa nagpoon an ralaban.

¹⁵Hinagad ninda sa Dios na kun habo niyang iligtas sinda, gibohon na sana niya huli sa mga tipan na ginibo niya sa saindang mga ginikanan, dangan huli ta siya, an Dios na dakula saka makangangalas, iyo an nag-apod sainda bilang sadiri niyang banwaan.

¹⁶Tinipon ni Judas an seis mil na tawohan niya dangan sinadol sinda na dai matakot ni magdulag kun mahiling an kadakul na pagano na mayo man nin dahelan para salakayon sinda. Sinabihan niya sinda na maisog na makilaban,

¹⁷na dai paglingawan an mga karatan na ginibo kan mga pagano sa Templo, an makuring pasakit sa Jerusalem, patin an pagbasang-basang sa mga kaugalean kan mga Judio.

¹⁸Nagsabi si Judas, “Nagsasarig sinda sa mga armas ninda saka isog nin boot, alagad nagsasarig kita sa Makakamhan na Dios na kayang tumunaw bako sana kan mga nagdadangadang na iyan, kundi maski kan bilog na kinaban, sa sarong pagtango kan saiyang payo.”

¹⁹Dangan ipinagiromdom niya sainda an mga paagi kan Dios sa pagtabang sa saindang mga ginikanan: kan panahon ni Senakerib, syento otsenta y singko mil na mga kaiwal an ginadan;

²⁰dangan kan gera sa Babilonia, igwa nin nag-abot na otso mil na Judio sa pagtabang sa kwatro mil na taga Macedonia asin nadaog ninda an syento beynte mil na taga Galacia saka nakakua sinda nin dakul na sinamsaman nin huli sa tabang nin Dios.

²¹An mga tataramon ni Judas iyo an nagpakosog sa boot kan saiyang mga tawohan saka nag-andam sainda tanganing itao an saindang buhay para sa saindang relihiyon saka para sa banwaan ninda. Pinag-apat na grupo ni Judas an saiyang hukbo

²²na igwa nin mil kinyentos na kalalakihan sa lambang grupo. Si Judas iyo an namahala kan saro sa mga grupo asin siring man an saiyang mga tugang na si Simon, Jose saka Jonathan.

²³Pakatapos na pagbootan ni Judas si Eleazar na magbasa nin makosog hale sa banal na libro, itinao niya sa saiyang mga tawohan an kurahaw nin pakilaban: “Tatabangan kita kan Dios.” Dangan nangenot siya sa sainda sa pagsalakay ki Nicanor.

²⁴Nakilaban sa kaibahan ninda an Makakamhan na Dios, kaya nakagadan sinda nin sobra sa nuebe mil kan mga kaiwal. An iba kan mga kaiwal nagkarulugadan saka napiritan na magdurulag.

²⁵Inagaw kan mga Judio an kwarta sa mga tawong nag-abot tanganing magbakal sainda bilang mga oripon. Dangan haloy na linamag ninda an mga kaiwal sagkod na kaipuhan na magbalik sinda,

²⁶huli ta haros oras na kan pagpoon kan Sabbath.

²⁷Pakatapos na matipon ninda an mga armas kan mga kaiwal saka masamsaman an mga gadan, nagselebrar sinda kan Sabbath. Inomaw ninda asin pinasalamatan an Kagurangnan na nagligtas sainda kan aldaw na idto patin nagtao sainda kan enot na tanda kan saiyang pagkaherak.

²⁸Kan matapos na an Sabbath, itinao ninda an ibang parte kan sinamsaman sa mga biktima kan pasakit asin sa mga babaeng balo saka sa mga ilo, dangan binaranga ninda an natada para sa sadiri nindang mga pamilya.

²⁹Pakagibo ninda kaini, nagkasararo sinda sa pagpamibi sa Kagurangnan na maheherakon. Nakimaherak sinda saiya na mawilihan niya an saiyang mga sorogoon.

³⁰Dangan linabanan kan mga Judio an hukbo ni Timoteo saka ni Bakkides asin nagadan ninda an sobra sa beynte mil sa sainda. Sinakop ninda an nagkapira sa mga bantayan na haralangkaw nin marahay. Kadakul kan saindang nasamsam, na binaranga nindang tama sa saindang mga sadiri, sa mga babaeng balo, sa mga ilo, sa mga gurang na lalaki, asin sa mga biktima kan pasakit.

³¹Maingat nindang tinipon an gabos na armas kan mga kaiwal dangan sinaray sa mahalagang mga lugar, alagad dinara ninda sa Jerusalem an iba kan sinamsam.

³²Ginadan ninda an pamayong opisyal kan hukbo ni Timoteo, na sarong bakong diosnon na tawo asin nagin dahelan kan dakulang kasakitan kan mga Judio.

³³Mantang sineselebrar ninda an saindang kapangganahan sa syudad kan saindang mga ginikanan, sinulo nindang buhay an mga tawong nagsulo kan mga trangkahan kan Templo. Kaibahan sa mga gadan iyo si Callistenes na nagtago sa sarong sadit na harong; kaya nag-ako siya kan padusa na maninigo sa mga gibo niyang maraot.

³⁴An maraot na tawong si Nicanor na nagdara nin sangribong negosyante tanganing magbakal kan mga Judio,

³⁵nadaog kan mga tawong saiyang kinaongisan huli ta tinabangan sinda kan Kagurangnan. Hinuba niya an saiyang magayon na gubing dangan nagsosolong nagdulag arog sa sarong nagdulag na oripon, sagkod na nakaabot siya sa Antiokia. An naginibo niya sana iyo an pagraot kan sadiri niyang hukbo.

³⁶An lalaking ini na naghingowang bihagon an mga Judio tanganing ipabakal, asin ibayad an kabakalan sa mga taga Roma, iyo an nagpahayag na an mga Judio igwa nin mapangyaring Parasurog. Dai sinda pwedeng madaog huli ta nagkuyog sinda kan Katogonan na itinao sainda nin Dios.