Read Central Bicolano 2 Maccabees 9 Bible Online

2 Maccabees 9 - Central Bicolano bible

2 Maccabees 9

¹Kan panahon man na idto, ribong na nagdulag si Antioco hale sa Persia,

²na kun saen luminaog siya sa syudad kan Persepolis dangan hiningowang habonan an sarong templo saka sakopon an syudad. Alagad kinurua kan tawo an armas saka sinalakay si Antioco. Napiritan na magsibog si Antioco saka an saiyang hukbo na grabe an kasosopgan.

³Kan mag-abot siya sa Ecbatana, inosipan siya kan nangyari sa mga hukbo ni Nicanor saka ni Timoteo.

⁴Naanggot siya asin inisip na pabayadon an mga Judio huli sa nangyaring pagkadaog niya. Kaya pinagbotan niya an nagpapadalagan kan saiyang karwahe na dai mag-ontok sagkod na dai sinda nakaabot sa Jerusalem. Sa dakulang kapaabaw-abawan nagsabi siya, “Pag-abot ko sa Jerusalem, gigibohon ko ining lulubngan kan mga Judio.” Alagad dai niya aram na pasiring na siya sa padusang inandam saiya kan Dios.

⁵Huli ta pakasabi niya kaidto, an Kagurangnan na naghihiling kan gabos na bagay, an Dios nin Israel, nagpadara saiya nin sarong dai nahihiling alagad nakakagadan na helang. Namatean niya an grabeng kulog nin tulak na mayo nin pwedeng ibolong—

⁶sarong maninigong padusa huli kan makangingirhat na mga pasakit na ginibo niya sa mga Judio.

⁷Alagad dai ini nagin dahelan tanganing talikodan niya an saiyang kapalangkawan. Nag-orog an saiyang kapaabaw-abawan asin anggot nin marahay na naghoma siya laban sa mga Judio. Dangan nagboot siya na rikasan pa an pagpadalagan kan karwahe. Kaya sa rikas kan dalagan kan karwahe, nakatapok siya sa luwas. Huli sa kosog kan saiyang pagbagsak nagkurulog an bilog niyang hawak.

⁸Kaya si Antioco, na an paghiling sa sadiri bako sanang tawo asin naghohona na mapapagbotan niya an mga alon kan dagat saka matitimbang an haralangkaw na kabukidan, buminagsak sa daga kaya kaipuhan pang buhaton na nakahigda sa sarong higdaan. Sarong malinaw na tanda ini kan kapangyarihan nin Dios para sa gabos.

⁹Nagkaranap an mga ulod maski sa mga mata kan bakong diosnon na tawong ini asin nabuhay siya sa labi-labing kasakitan. Naglapa an saiyang hawak kaya nagsuruka sa bata an saiyang hukbo.

¹⁰Huli kan grabe niyang parong mayo nin nagrani saiya tanganing darahon siya sa lugar na gusto niya. Alagad dai pa sana nahahaloy, naghona siya na makakapotan niya an mga bitoon.

¹¹Nag-orog an kamondoan ni Antioco asin nagtios siya nin daing ontok na kulog huli kan padusang dinara saiya nin Dios. Sa kahuri-hurihi, nagliwanag an saiyang isip asin nagpakumbaba siya.

¹²Dangan kan dai na niya matagalan an sadiri niyang bata, nagsabi siya, “Tama sanang magpasakop an tawo sa Dios asin dai dapat na mag-isip na kapantay niya an Dios.”

¹³Natapos na an panahon nin pagkaherak nin Kagurangnan ki Antioco, alagad an mayo nin halagang tawong ini naggibo nin panuga sa Kagurangnan:

¹⁴“Boot kong patagon kaidto an Jerusalem saka gibohon an banal na syudad na sarong lulubngan na pano nin mga Judio,” an sabi niya, “alagad ngunyan ipinapahayag ko iyan na sarong talingkas na syudad.

¹⁵Nagplano ako na itapok sa luwas an mga bangkay kan mga Judio asin kan saindang mga aki tanganing kakanon kan mga lalaw na hayop saka mga gamgam huli ta ibinilang ko sinda na bakong maninigong ilubong. Alagad ngunyan tatawan ko sinda kan parehong mga deretso na inaako kan mga syudadano sa Atenas.

¹⁶Sinamsaman ko minsan an Templo dangan kinua ko an sagradong mga kagamitan alagad papanoon ko iyan nin marahay na mga regalo, saka babayadan ko an halaga kan mga sakripisyo hale sa sadiri kong kwarta.

¹⁷Laen pa kaini, ako mismo magigin Judio saka maduman ako sa lambang lugar na igwa nin nag-eerok na mga tawo, dangan tataraman ko sinda kan kapangyarihan nin Dios.”

¹⁸Mamondo si Antioco asin mayo siya nin nakuang bolong para sa saiyang kulog huli ta pinadusahan siya nin Dios kan maninigo saiya, kaya nagsurat siya nin siring sa mga Judio:

¹⁹“Hale ki Hadeng Antioco para sa mga Judio, na sakong espesyal na mga nasasakopan. Ipinapaabot ko saindo an sakong maogmang pangongomusta saka pagmawot saindo nin marahay na hawak patin kauswagan.

²⁰“Linalaom ko na kamo saka an saindong mga pamilya marahay an hawak patin marahay an kamugtakan. An sakong paglaom yaon sa Dios,

²¹asin ginigiromdom ko sa dakulang kaogmahan an paggalang saka pagkaherak na ipinahiling nindo sako. “Kan pabalik na ako hale sa Persia naghelang ako nin makuri kaya inisip ko na dapat akong magplano para sa ikakarahay kan gabos na tawo.

²²Dai ako nahahadit kan sakong kamugtakan huli ta igwa ako nin bilog na paglaom na mararahay an sakong helang.

²³Alagad nagigiromdoman ko an ginigibo kaidto kan sakong ama kun siya naghahale pasiring sa sirangan kan Eufrates tanganing makigera. Minapili siya nin kasalihid,

²⁴tanganing kun igwa nin mangyari na dai linalaoman, o kun may mag-abot na maraot na bareta, dai matatakot an mga tawo huli ta aram na ninda kun siisay an nawalat tanganing mamahala.

²⁵Laen pa kaiyan, aram ko na an mga pamayo sa palibot kan mga pagdolonan kan sakong kahadean danay na naghahalat kan saindang oportunidad. Kaya pinili ko an sakong aki na si Antioco na magsalihid sako bilang hade. Danay ko siyang ipinapaniwala saka ipinapamidbid saindo sa lambang pagdalaw ko sa mga probinsya sa sirangan kan Eufrates. (Magkakaigwa siya nin kopya kan surat kong ini.)

²⁶Kaya maigot kong sinasadol kamo na giromdomon an karahayan na ginibo ko sa lambang saro saindo asin sa nasyon, patin ipadagos nindo an marahay na pakiiba nindo sako asin sa sakong aki.

²⁷Huli ta nasisiguro ko na susunodon niya an palakaw ko patin magigin matanos saka marahay an pagtratar niya saindo.”

²⁸Kaya si Antioco, an paragadan saka paralanghad sa Dios, nagtios kan parehong mga kasakitan na dinara niya sa iba. Makaheherak an pagkagadan niya sa kabukidan kan sarong dayuhan na nasyon.

²⁹An nagpuli kan saiyang bangkay iyo si Felipe, na saro kan harani niyang katood; alagad, huli ta natakot si Felipe sa aking lalaki ni Antioco, nagduman siya ki Hadeng Tolome Filometor nin Egipto.