Read Central Bicolano Deuteronomy 10 Bible Online

Deuteronomy 10 - Central Bicolano bible

Deuteronomy 10

¹“Dangan nagtaram sako an Kagurangnan, ‘Magtabas ka nin duwang tablang gapo arog kan mga naenot, asin gumibo ka nin Kaban na gibo sa kahoy na paglalaogan kaiyan; dangan tumukad ka digdi sa bukid.

²Isusurat ko sa mga tanalang gapo an mga tataramon na isinurat ko duman sa mga naenot na tablang gapo na binaraak mo. Dangan ilaog mo iyan sa Kaban.’

³“Kaya naggibo ako nin sarong kaban na akasya asin nagtabas ako nin duwang tablang gapo arog kan mga naenot, dangan dinara ko an mga ini pagtukad ko sa bukid.

⁴Isinurat nin Kagurangnan sa mga gapong ini an mga isinurat niya duman sa naenot, an Sampolong Togon na itinaram niya saindo hale duman sa kalayo kan magtiripon kamo sa bukid. Itinao sako nin Kagurangnan an mga tablang gapo.

⁵Kaya naghilig ako hale sa bukid dangan ilinaog ko an mga gapo sa Kaban na ginibo ko sosog sa ipinagboot nin Kagurangnan; poon kaidto yaon sa laog kan Kaban an mga Togon.” (

⁶Naghale an mga Israelita sa lugar na pagsadiri kan mga taga Jaakan, asin nagpasiring sa Masera. Duman nagadan asin ilinubong si Aaron; an aki niyang si Eleazar iyo an nagsalihid saiya bilang padi.

⁷Hale duman nagpasiring sinda sa Gudgoda dangan sa Jotbata, sarong daga na mayaman sa tubig.

⁸Kan panahon na iyan pinili nin Kagurangnan an mga lalaki sa tribu ni Levi na iyo an mamahala kan Kaban nin Tipan, tanganing maglingkod saiya bilang mga padi asin magbendisyon sa ngaran nin Kagurangnan. Sagkod ngunyan ginigibo pa ninda ini.

⁹Kaya dai nag-ako nin kahirasan na daga an tribu ni Levi, bakong arog kan ibang tribu; an Kagurangnan iyo an saindang kahirasan, sosog sa ipinanuga sainda nin Kagurangnan na saindong Dios.)

¹⁰“Arog kan enot, nag-ontok ako sa bukid sa laog nin kwarentang aldaw asin banggi. Dinangog giraray ako nin Kagurangnan asin nag-oyon siya na dai kamo pagtunawon.

¹¹Dangan tinaraman niya ako na pangenotan kamo tanganing masadirihan nindo an daga na ipinanuga niyang itatao sa saindong mga ginikanan.

¹²“Banwaan nin Israel, dangoga nindo ngunyan an kahagadan saindo nin Kagurangnan na saindong Dios; magkaigwa kamo nin pagkatakot saiya asin otobon nindo an saiyang mga pagboot. Kamotan nindo an Kagurangnan saka paglingkodan nindo siya sa bilog nindong puso,

¹³patin kuyogon nindo an saiyang mga togon saka mga pagboot. Itinatao ko ini saindo ngunyan para sa ikakarahay nindo.

¹⁴Sadiri nin Kagurangnan na saindong Dios an pinakahalangkaw na kalangitan; sadiri man niya an daga asin an gabos na yaon diyan.

¹⁵Alagad labi-labi an pagkamoot nin Kagurangnan sa saindong mga ginikanan, kaya pinili niya kamo embes na an ibang mga tawo, asin sagkod ngunyan, kamo an saiyang sadiring banwaan.

¹⁶Kaya poon ngunyan, magkuyog na kamo sa Kagurangnan asin dai na nindo pagpatagason an saindong payo.

¹⁷Huli ta an Kagurangnan na saindong Dios iyo an Dios nin mga dios, an Kagurangnan nin mga kagurangnan, an dakula, an makakamhan asin maninigong katakotan na Dios. Dai siya nin inaapilan asin dai siya nag-aako nin mga suhol.

¹⁸Tinatawan niya nin katanosan an mga ilo saka mga babaeng balo; namomotan niya an mga dayuhan na nakikihimanwa sa satong banwaan asin tinatawan niya sinda nin pagkakan saka gubing.

¹⁹Kaya kamotan nindo an mga dayuhan huli ta nagin dayuhan man kamo sa Egipto.

²⁰Matakot kamo sa Kagurangnan na saindong Dios asin siya sana an saindong pagsambahon. Magmaimbod kamo saiya asin magsumpa kamo sa saiya sanang ngaran.

²¹Pag-omawon nindo siya huli ta siya an saindong Dios; nahiling nindo an dakula asin makangangalas na mga bagay na ginibo niya para saindo.

²²Kan magduman sa Egipto an saindong mga ginikanan, setenta sana sinda; alagad ngunyan pinadakul kamo nin Kagurangnan na saindong Dios siring sa mga bitoon sa langit.