Read Central Bicolano Deuteronomy 11 Bible Online

Deuteronomy 11 - Central Bicolano bible

Deuteronomy 11

¹“Kamotan nindo an Kagurangnan na saindong Dios, asin danay na kuyogon nindo an saiyang mga togon saka mga pagboot.

²Giromdoma nindo ngunyan an nanodan nindo manongod sa Kagurangnan, huli sa mga nangyari saindo. Kamo asin bako an saindong mga aki an nag-agi kan siring na mga eksperyensya. Nahiling nindo an kadakulaan nin Kagurangnan, an saiyang kapangyarihan asin kosog,

³patin an saiyang mga gibong ngangalasan. Nahiling nindo an ginibo nin Kagurangnan sa hade nin Egipto asin sa bilog na daga nin Egipto;

⁴an ginibo niya sa bilog na hukbo kan Egipto, kaiba an saindang mga kabayo saka mga karwahe, kan lamoson dangan gadanon sinda nin Kagurangnan sa Dagat na Pula, kan lamagon ninda kamo.

⁵Aram nindo an ginibo para saindo nin Kagurangnan duman sa kalangtadan bago kamo nakaabot digdi.

⁶Giromdoma nindo an ginibo niya ki Datan asin ki Abiram, an mga aking lalaki ni Eliab kan tribu ni Ruben; sa atubang kan gabos, buminuka an daga asin hinalon sinda gabos kaiba an saindang mga pamilya, mga tolda, mga oripon sagkod mga hayop.

⁷Kamo an nakahiling kaining mga darakulang bagay na ginibo nin Kagurangnan.

⁸“Kuyogon nindo an gabos na togon na ipinagboot ko saindo ngunyan, tanganing makabalyo kamo sa salog saka masakop nindo an daga na saindong lalaogon,

⁹tanganing maghalawig an saindong buhay duman sa dagang mayaman sa gabos na bagay, daga na ipinanuga nin Kagurangnan na itatao sa saindong mga ginikanan asin sa saindang mga kapagarakian.

¹⁰An daga na saindong sasakopon iba man sa daga kan Egipto na saindong pinag-erokan. Sa pagtanom nindo nin banhi duman sa Egipto, kaipuhan magtrabaho kamo nin marahay tanganing matubigan an kaomahan;

¹¹alagad an daga na saindong lalaogon, sarong daga nin kabubuldan asin nin mga kapantayan na binabaribi nin uran.

¹²Sa bilog na taon, an Kagurangnan na saindong Dios an nag-aataman asin nagbabantay kan dagang iyan.

¹³“Kaya kuyogon nanggad nindo an gabos na togon na itinao ko saindo ngunyan; kamotan nindo an Kagurangnan na saindong Dios asin paglingkodan nindo siya sa bilog nindong puso.

¹⁴Kun gibohon nindo ini, papadarahan niya nin uran an saindong daga sa tamang panahon, tanganing magkaigwa kamo nin banhi, arak saka lana nin oliba,

¹⁵asin doot para sa saindong mga hayop. Magkakaigwa kamo kan gabos na pagkakan na kaipuhan nindo.

¹⁶Mag-ingat kamo tibaad madaya kamo asin talikodan nindo an Kagurangnan dangan magsamba kamo asin maglingkod sa mga dios-dios.

¹⁷Kun gibohon nindo iyan, maaanggot saindo an Kagurangnan asin pupugolon niya an uran kaya dai matao nin bunga an daga. Magkakagaradan tolos kamo duman, maski ngani marahay an daga na itinatao niya saindo.

¹⁸“Kaya giromdoma nindo asin kamotan ining mga pagboot. Igakod nindo an mga iyan sa saindong mga kamot sagkod sa saindong mga angog bilang tanda.

¹⁹Itukdo nindo an mga iyan sa saindong mga aki. Sambiton nindo iyan sainda kun kamo nagtutukaw sa harong o kun kamo nasa paglakaw; kun kamo nagpapahingalo o kun kamo nagtatrabaho.

²⁰Isurat nindo an mga iyan sa mga hamba kan pintoan nin saindong mga harong sagkod sa saindong mga trangkahan,

²¹tanganing maghalawig an saindong buhay asin an buhay kan saindong kapagarakian duman sa daga na ipinanuga nin Kagurangnan na saindong Dios na itatao sa saindong mga ginikanan. Mag-eerok kamo duman sagkod na an kalangitan nasa itaas kan daga.

²²“Maimbod na kuyogon nindo an gabos na ipinagboot ko: kamotan nindo an Kagurangnan na saindong Dios, gibohon nindo an gabos niyang ipinagboboot asin magmaimbod kamo saiya.

²³Dangan sa pagdangadang nindo, papahaleon niya an gabos na nasyon, tanganing masakop nindo an daga na sadiri kan mga nasyon na mas darakula asin mas mapangyari ki sa saindo.

²⁴Mapapasaindo an gabos na daga na mababatayan nindo. An pagsadiri nindo mapoon sa desyerto sa parteng habagat sagkod sa kabukidan nin Lebanon sa parteng amihan; mapoon sa Salog nin Eufrates sa parteng sirangan sagkod sa Dagat nin Mediteraneo sa parteng solnopan.

²⁵Saen man kamo magduman sa dagang idto, gigibohon nin Kagurangnan na saindong Dios na matakot saindo an mga tawo, siring sa ipinanuga niya, asin mayo nin siisay man na makakapugol saindo.

²⁶“Ngunyan na aldaw magpili kamo sa duwang ini: sarong bendisyon o sarong maldisyon—

²⁷sarong bendisyon kun kuyogon nindo an mga pagboot nin Kagurangnan na saindong Dios na itinatao ko saindo ngunyan;

²⁸alagad sarong maldisyon kun talikodan nindo an mga pagboot na ini asin magsamba kamo sa mga dios-dios na dai pa nindo sinamba kaidto.

²⁹Kun darahon na kamo nin Kagurangnan duman sa daga na masasadirihan nindo, sambiton nindo an bendisyon duman sa Bukid nin Gerizim, asin an maldisyon duman sa Bukid nin Ebal. (

³⁰An duwang bukid na ini yaon sa solnopan kan Jordan, sa daga kan mga Cananeo na nag-eerok sa kapantayan kan Jordan. An mga bukid na ini nasa parteng solnopan, harani sa sagradong mga kahoy nin More, kataed kan Gilgal.)

³¹Madali na nindong balyohon an Salog nin Jordan asin sakopon an dagang itinatao saindo nin Kagurangnan na saindong Dios. Kun masadirihan na nindo an daga asin mag-erok na kamo duman,

³²kuyogon nanggad nindo an mga pagboot na itinatao ko saindo ngunyan na aldaw.