Read Central Bicolano Deuteronomy 12 Bible Online

Deuteronomy 12 - Central Bicolano bible

Deuteronomy 12

¹“Uya an mga pagboot na kukuyogon nindo sa bilog nindong pagkabuhay duman sa daga na itinatao saindo nin Kagurangnan, an Dios kan saindong mga ginikanan. Dangoga nindo an mga ini!

²Sa daga na saindong sasakopon, gabaon nindo an gabos na lugar na pinagsasambahan kan mga tawo sa saindang mga dios-dios: sa kabukidan, sa kabubuldan asin sa lindong nin mga kahoy.

³Gabaon nindo an saindang mga altar asin ronoton an saindang mga banal na hariging gapo. Suloon nindo an mga simbolo kan saindang diosang si Asera asin patokon nindo an saindang mga dios-dios tanganing dai na nanggad pagsambahon an mga iyan sa mga lugar na idto.

⁴“Dai nindo pagsambahon an Kagurangnan na saindong Dios siring kan pagsamba kan mga tawong iyan sa saindang mga dios-dios.

⁵Hale sa gabos na daga kan saindong tribu, mapili an Kagurangnan na saindong Dios nin sarong lugar na pagtitiriponan kan mga tawo sa pagsamba saiya.

⁶Duman nindo idodolot an saindong mga tinutong na atang asin an iba pang mga sakripisyo, an saindong mga himoloan saka mga dolot, an saindong mga panugang regalo, an saindong mga boluntad na dolot sagkod an mga matua kan saindong mga baka asin mga karnero.

⁷Duman, sa atubang nin Kagurangnan na saindong Dios, makakan kamo saka an saindong mga pamilya, asin ipag-oogma nindo an gabos na naginibo nindo na benendisyonan nin Kagurangnan na saindong Dios.

⁸“Pag-abot kan panahon na iyan, dai na nindo ipagpadagos an pinagparagibo nindo digdi. Sagkod ngunyan, kamo gabos nagsasamba sa paagi na magustohan nindo,

⁹huli ta dai pa kamo nakakalaog sa daga na itinatao saindo nin Kagurangnan na saindong Dios, saen mag-eerok kamo nin matoninong.

¹⁰Pakabalyo nindo sa Salog nin Jordan, ipapasakop niya saindo an daga asin mag-eerok kamo duman. Ililigtas niya kamo sa saindong mga kaiwal asin mabubuhay kamo nin matoninong.

¹¹Mapili an Kagurangnan nin saro sanang lugar na pagsasambahan saiya asin duman nindo dadarahon an gabos na ipinagboot ko saindo: an saindong mga tinutong na atang asin iba pang mga sakripisyo, an saindong mga himoloan saka mga dolot, asin an saindong mga panugang regalo sa Kagurangnan.

¹²Mag-ogma kamo sa atubang niya, kaiba an saindong mga aki, mga oripon sagkod an mga Levita na nag-eerok sa saindong mga banwaan; giromdomon nindo na an mga Levita mayo nin sadiring daga.

¹³Dai kamo magdolot kan saindong mga atang maski saen na lugar na saindong mapili,

¹⁴kundi duman sana sa lugar na pipilion nin Kagurangnan hale sa gabos na daga kan saindong mga tribu. Duman nanggad sana nindo idolot an saindong mga tinutong na atang asin duman nindo gibohon an gabos na ipinagboboot ko saindo.

¹⁵“Alagad pwede kamong magbuno saka magkakan kan saindong mga hayop saen man kamo mag-erok. Pwede nindong kakanon an gusto nindo sosog sa bendisyon na iwinaras saindo nin Kagurangnan. Kamo gabos, malinig man o bako, pwedeng magkakan kaiyan arog kan pagkakan nindo kan karne nin usa o nin kaagid kaiyan.

¹⁶Alagad dai nanggad kamo magkakan kan saindang dugo kundi iula nindo iyan sa daga siring sa tubig.

¹⁷Dai nindo pagkakanon sa saindong mga pinag-eerokan an ano man na idinolot nindo sa Kagurangnan, siring man an mga himoloan kan saindong ani, kan saindong arak o kan saindong lana, an mga matua kan saindong mga baka saka mga karnero, an saindong mga panugang regalo sa Kagurangnan, an saindong mga boluntad na dolot sagkod an iba pa nindong mga sakripisyo.

¹⁸Alagad kakakanon nindo iyan asin kan saindong mga aki, kaiba an saindong mga oripon saka an mga Levita na nag-eerok sa saindong mga banwaan, duman nanggad sana sa atubang nin Kagurangnan na saindong Dios, sa lugar na saiyang pinili. Duman mag-oogma kamo, huli kan gabos na saindong naginibo.

¹⁹Dai nanggad nindo pagpabayaan an mga Levita mantang nag-eerok kamo sa saindong daga.

²⁰“Kun padakulaon na nin Kagurangnan na saindong Dios an saindong teritoryo siring sa ipinanuga niya, pwede kamong magkakan nin karne maski anong oras.

²¹Kun harayong marahay sa saindo an lugar na pagsasambahan, kun boot nindo, pwede kamong magbuno kan arin man sa saindong baka saka karnero na itinao saindo nin Kagurangnan, dangan kakanon nindo iyan sa saindong harong siring sa sinabi ko saindo.

²²An siisay man, malinig man o bako, pwedeng magkakan kan karneng iyan siring kan pagkakan nindo kan karne nin usa o nin kaagid kaiyan.

²³Alagad dai kamo magkakan nin karne na igwa pa nin dugo, huli ta an buhay yaon sa dugo; dai nanggad nindo pagkakanon an dugo kaiba kan karne.

²⁴Dai nindo paggibohon na pagkakan an dugo; iula nindo iyan sa daga arog sa tubig.

²⁵Kun kuyogon nindo an pagboot na ini, maoogma an Kagurangnan asin mapapakarahay kamo sagkod an saindong kapagarakian.

²⁶Darahon nindo sa lugar na pagsasambahan an saindong mga dolot asin an saindong mga panugang regalo sa Kagurangnan.

²⁷Idolot nindo duman sa altar nin Kagurangnan na saindong Dios an saindong mga tinutong na atang, sagkod an iba pang mga sakripisyo na an karne saindong kakakanon asin an dugo saindong iuula sa ibabaw kan altar.

²⁸Kuyogon nindo an gabos na ipinagboboot ko saindo, tanganing mapakarahay kamo asin an saindong kapagarakian sagkod pa man, huli sa paggibo nindo nin marahay asin nin matanos sa atubang nin Kagurangnan na saindong Dios.

²⁹“Rurumpagon nin Kagurangnan na saindong Dios an mga nasyon mantang sinasakop nindo an saindang daga, asin iyan saindong masasadirihan dangan pag-eerokan.

³⁰Pakatapos na rumpagon sinda nin Kagurangnan, dai nanggad nindo pag-arogon an saindang mga gawe nin pagsamba, huli ta iyan an magadan saindo. Dai nindo pagsiyasaton kun paano an pagsamba ninda sa saindang mga dios-dios, tanganing maarog man nindo.

³¹Dai nindo pagsambahon an Kagurangnan na saindong Dios siring kan pagsamba ninda sa saindang mga dios-dios, huli ta sa saindang pagsamba, minagibo sinda nin mangirhat na mga bagay na ikinakaongis nin Kagurangnan. Maski an saindang mga aki tinututong ninda sa saindang mga altar.

³²“Giboha nindo an gabos na ipinagboboot ko; dai nindo iyan pagdagdagan o pag-inaan nin ano man.