Read Central Bicolano Deuteronomy 14 Bible Online

Deuteronomy 14 - Central Bicolano bible

Deuteronomy 14

¹“Kamo an banwaan nin Kagurangnan na saindong Dios. Kaya kun kamo magmondo para sa gadan, dai nindo paglugadan an saindong hawak o pag-arisan an saindong angog siring kan ginigibo nin iba.

²Huli ta kamo sarong banwaan na banal para sa Kagurangnan na saindong Dios, asin pinili niya kamo na magin sadiring banwaan hale sa gabos na banwaan sa bilog na daga.

³“Dai kamo magkakan nin ano man na ipinahayag nin Kagurangnan na bakong malinig.

⁴Ini an mga hayop na pwede nindong kakanon: baka, karnero, kanding,

⁵usa, lalaw na karnero, lalaw na kanding sagkod an mga kaagid kaiyan.

⁶Pwede nindong kakanon an ano man na hayop na baak an mga kuku asin minasapa kan saindang pagkakan.

⁷Alagad dai nindo pwedeng kakanon an mga minasunod: an kamelyo, an kuneho, asin an liebre. Ibilang nindo an mga iyan sa mga maating hayop; minasapa sinda kan saindang pagkakan alagad bakong baak an saindang kuku.

⁸Dai kamo magkakan nin orig; ibilang nindo iyan sa mga maating hayop; baak an mga kuku kaiyan alagad dai minasapa kan saiyang pagkakan. Dai kamo magkakan kan karne o magduta sa gadan na orig.

⁹“Sa mga nasa katubigan, pwede nindong kakanon an mga sira na igwa nin parikpik asin kiskis;

¹⁰alagad an mayo nin parikpik asin kiskis dai nindo pwedeng kakanon; ibilang nindong maati an mga iyan.

¹¹“Pwede nindong kakanon an arin man na malinig na gamgam.

¹²Alagad iyo ini an dai nindo pwedeng kakanon: an agila, an bwitre, an agilang dagat;

¹³an asor, an halkon, sagkod an gabos na klase nin milano;

¹⁴an gabos na klase nin uwak;

¹⁵an abestro, an kuwaw, an gabiota, sagkod an gabos na klase nin lawin;

¹⁶an gabos na klase nin kuwaw; an cisne,

¹⁷an pelikano, an bwitre asin an somormuho;

¹⁸an gabos na klase nin talaod; an abudilya asin an paniki.

¹⁹“Maati an gabos na insekto na igwa nin pakpak; dai nindo pagkakanon an mga iyan.

²⁰Pwede nindong kakanon an mga malinig na insekto.

²¹“Dai kamo magkakan kan arin man na hayop na nagadan sa natural na paagi, huli ta kamo sarong banwaan na banal para sa Kagurangnan na saindong Dios. An hayop pwede nindong ipakakan sa mga dayuhan na nakikihimanwa sa saindo, o ipabakal sa ibang mga dayuhan. “Dai nindo paglutoon an ogbon na karnero o kanding sa gatas nin saiyang ina.

²²“Laenon nindo an himoloan—an ikasampolong kabtang kan gabos na bunga kan saindong kaomahan sa taon-taon.

²³Dangan magduman kamo sa lugar na pagsasambahan na pinili nin Kagurangnan na saindong Dios; duman sa atubang niya, kakanon nindo an mga himoloan kan saindong ani, kan saindong arak saka lana, asin kan matua kan saindong mga hayop. Gibohon nindo ini tanganing makanood kamong danay na matakot sa Kagurangnan na saindong Dios.

²⁴Kun an lugar na pagsasambahan harayo sa saindong harong, kaya dai nindo madadara duman an himoloan kan mga produkto na iwinaras saindo nin Kagurangnan, ini an gibohon nindo:

²⁵ipabakal nindo an himoloan, asin an kabakalan kaiyan darahon nindo sa lugar na pagsasambahan.

²⁶Gastohon nindo iyan sa ano man na boot nindo—sa baka, sa karnero, sa arak o sa maisog na inomon—dangan duman sa atubang nin Kagurangnan na saindong Dios, magkakan asin mag-ogma kamo sa kaibahan kan saindong pamilya.

²⁷“Dai nindo pagpabayaan an mga Levita na nag-eerok sa saindong mga banwa, huli ta mayo sinda nin pagsadiri.

²⁸Pakatapos nin lambang tolong taon, darahon nindo an himoloan kan gabos nindong produkto asin tiponon nindo iyan sa saindong mga banwa.

²⁹An kakanon na iyan iyo an para sa mga Levita, huli ta dai sinda nin pagsadiri, asin para sa mga dayuhan, para sa mga ilo saka mga babaeng balo na nag-eerok sa saindong mga banwa. Maabot sinda asin makua kan gabos na kaipuhan ninda. Gibohon nindo ini asin bebendisyonan kamo nin Kagurangnan na saindong Dios sa gabos nindong ginigibo.