Read Central Bicolano Deuteronomy 15 Bible Online

Deuteronomy 15 - Central Bicolano bible

Deuteronomy 15

¹“Sa kataposan nin lambang ikapitong taon, patawadon nindo an gabos na utang kan mga nagkakautang saindo.

²Siring kaini an paggibo kaiyan. An lambang may pautang sa kapwa niya Israelita, mapatawad kan pautang niya; dai na niya iyan dapat singilon; an Kagurangnan mismo an nagpahayag na pinatawad na an utang.

³Pwede nindong singilon an utang nin sarong dayuhan; alagad dai nindo pagsingilon an ano man na utang kan kapwa nindo Israelita.

⁴“Mayo nin magigin dukha sa saindo huli ta bebendisyonan kamo nin Kagurangnan na saindong Dios sa daga na itinatao niya saindo,

⁵kun kuyogon nindo siya asin otobon an gabos na ipinagboboot ko saindo ngunyan.

⁶Bebendisyonan kamo nin Kagurangnan siring sa saiyang ipinanuga. Magpapautang kamo nin kwarta sa dakul na nasyon, alagad dai kamo mautang sa kiisay man; masasakopan nindo an dakul na nasyon, alagad mayong nasyon na masakop saindo.

⁷“Kun magkaigwa nin sarong dukhang Israelita sa arin man na banwa sa daga na itinatao saindo nin Kagurangnan na saindong Dios, hare kamo pagmaimot asin pagsayuma sa pagtabang saiya.

⁸Maherak kamo saiya dangan pautangon nindo siya kan gabos niyang kaipuhan.

⁹Dai nindo siya pagsayumahan sa dahelan na harani na an taon nin pagpatawad kan mga utang. Dai nindo pagtugotan na makalaog sa saindong isip an siring karaot na kaisipan. Kun dai nindo siya pautangon, mareklamo siya sa Kagurangnan laban sa saindo asin makokondenar kamo.

¹⁰Magmatinao kamo nin tudok sa puso asin bebendisyonan kamo nin Kagurangnan sa gabos nindong ginigibo.

¹¹Danay na magkakaigwa nin mga dukhang Israelita sa saindong daga, kaya pinagbobotan ko kamo na magin matinao sainda.

¹²“Kun ipabakal saindo an sarong tugang mong Hebreyo, lalaki man o babae, malingkod siya saindo sa laog nin anom na taon.

¹³Sa ikapitong taon, talingkasan nindo siya; dai nindo siya pagpahaleon na mayo nin darang ano man.

¹⁴Tudok sa puso na tawan nindo siya kan ano man na bendisyon na iwinaras saindo nin Kagurangnan—mga karnero, trigo saka arak.

¹⁵Giromdoma nindo na mga oripon man kamo kaidto duman sa Egipto, asin tinalingkasan kamo nin Kagurangnan na saindong Dios; kaya ngunyan itinatao ko saindo ining pagboot.

¹⁶“Alagad kun habo nang maghale an saindong oripon huli ta namotan na niya kamo saka an saindong pamilya, dangan marahay an saiyang kamugtakan sa kaibahan nindo,

¹⁷kaipuhan darahon nindo siya sa pintoan kan saindong harong asin duman labotan nindo an saiyang talinga; dangan magigin oripon nindo siya sagkod na siya buhay. Arog man kaiyan an gibohon nindo sa saindong babaeng oripon.

¹⁸Dai kamo maanggot kun talingkasan na nindo an saindong oripon; kun pag-isipon, naglingkod na siya saindo sa laog nin anom na taon, sa kabanga sana kan kantidad na itatandan kuta nindo sa sarong oripon na parapatandan. Gibohon nindo ini asin bebendisyonan kamo nin Kagurangnan na saindong Dios sa gabos nindong ginigibo.

¹⁹“Konsagrahon nindo para sa Kagurangnan na saindong Dios an gabos na matuang lalaking baka asin karnero; dai nindo paggamiton sa trabaho an arin man sa mga bakang iyan, asin dai man nindo pagguntingan an arin man sa mga karnerong iyan.

²⁰Taon-taon, an mga iyan kakakanon nindo sagkod kan saindong pamilya duman sa lugar na pagsasambahan, sa atubang nin Kagurangnan.

²¹Alagad kun an mga iyan igwa nin kaninan, kun pilay o buta o igwa nin grabeng kaninan, dai nindo iyan iatang sa Kagurangnan na saindong Dios.

²²Pwede nindong kakanon an siring na mga hayop sa saindong harong. Kamo gabos, malinig man o bako, pwedeng magkakan kaiyan siring kan pagkakan nindo sa usa o sa kaagid kaiyan.

²³Alagad dai nindo pagkakanon an dugo kaiyan, kundi iula nindo iyan sa daga siring sa tubig.