Read Central Bicolano Deuteronomy 16 Bible Online

Deuteronomy 16 - Central Bicolano bible

Deuteronomy 16

¹“Galangan nindo an Kagurangnan na saindong Dios sa pagselebrar kan Paskwa sa bulan nin Abib, huli ta sa bulan na iyan ilinigtas niya kamo sa Egipto.

²Magduman kamo sa lugar na pagsasambahan asin bunoon nindo duman an saro kan saindong mga karnero o baka para sa Paskwa, sa kaomawan nin Kagurangnan na saindong Dios.

³Sa pagkakan nindo kaiyan, dai kamo mag-andam nin tinapay na igwa nin lebadura. Sa laog nin pitong aldaw, magkakan kamo nin tinapay na mayo nin lebadura, siring kan ginibo nindo kan hidali kamong maghale sa Egipto. Kakanon nindo an tinapay na iyan, na aapodon tinapay nin kasakitan, tanganing sa bilog nindong pagkabuhay magiromdoman nindo an aldaw kan paghale nindo duman sa Egipto.

⁴Sa laog nin pitong aldaw, kaipuhan mayong mahiling na lebadura sa harong nin siisay man sa saindong daga; an karne kan hayop na binuno sa banggi kan enot na aldaw, kaipuhan kakanon gabos sa mismong bangging iyan.

⁵“Dai nindo pwedeng idolot an atang sa paskwa maski saen sa mga banwa na itatao saindo nin Kagurangnan na saindong Dios.

⁶Idolot nindo iyan sa lugar na pagsasambahan pagsolnop kan aldaw, sa parehong oras kan paghale nindo sa Egipto.

⁷Pakalakagaan nindo an karne dangan kakanon nindo sa lugar na pagsasambahan; dangan pagkaaga, magpuli kamo sa saindong harong.

⁸Sa masunod na anom na aldaw, magkakan kamo nin tinapay na mayo nin lebadura. Sa ikapitong aldaw, magtiripon kamo sa pagsamba sa Kagurangnan na saindong Dios. Sa aldaw na iyan dai kamo magtrabaho.

⁹“Sa panahon na magpoon kamo nin pag-ani, bumilang kamo nin pitong semana,

¹⁰dangan selebraron nindo an Pyesta nin Pag-ani sa pag-omaw sa Kagurangnan na saindong Dios, sa pagdolot saiya nin sarong boluntad na atang sosog sa bendisyon na itinao niya saindo.

¹¹Sa atubang nin Kagurangnan, mag-ogma kamo kaiba an saindong mga aki saka mga oripon, kaiba an mga Levita, mga dayuhan, mga ilo asin mga babaeng balo na nag-eerok sa saindong mga banwa. Gibohon nindo ini sa lugar na pagsasambahan.

¹²Kaipuhan kuyogon nindo an mga pagboot na ini; dai nindo paglingawan na kamo nagin mga oripon duman sa Egipto.

¹³“Pakaginik nindo kan saindong ani asin pakapugaa nindo kan saindong mga ubas, selebraron nindo an Pyesta nin mga Harong-harong sa laog nin pitong aldaw.

¹⁴Mag-ogma kamo kaiba an saindong mga aki saka mga oripon, kaiba an mga Levita, mga dayuhan, mga ilo, asin mga babaeng balo na nag-eerok sa saindong mga banwa.

¹⁵Galangan nindo an Kagurangnan na saindong Dios sa pagselebrar kan pyestang ini sa laog nin pitong aldaw duman sa lugar na pagsasambahan. Mag-ogma kamo huli ta bebendisyonan kamo nin Kagurangnan sa gabos nindong ani asin trabaho.

¹⁶“Tolong beses sa taon, matiripon sa atubang nin Kagurangnan an gabos na lalaki sa saindong nasyon duman sa lugar na pagsasambahan: sa Pyesta kan Paskwa, sa Pyesta nin Pag-ani, asin sa Pyesta nin mga Harong-harong. An lambang saro kaipuhan magdara nin regalo

¹⁷sosog sa saiyang kaya asin sosog sa bendisyon na itinao saiya nin Kagurangnan na saindong Dios.

¹⁸“Magbugtak kamo nin mga hukom asin iba pang opisyal sa lambang banwa na itinatao saindo nin Kagurangnan na saindong Dios. An mga lalaking ini iyo an mahukom sa mga tawo sa matanos na paagi.

¹⁹Kaipuhan magin matanos sinda asin dai magpaorog sa kiisay man sa saindang paghukom. Dai sinda dapat na mag-ako nin suhol, huli ta an suhol nakakabuta maski sa mga madonong asin nakakaraot kan mga matanos.

²⁰Magpakamatanos kamo tanganing masadirihan nindo an daga na itinatao saindo nin Kagurangnan na saindong Dios, asin padagos kamong mag-erok duman.

²¹“Kun maggibo kamo nin altar para sa Kagurangnan na saindong Dios, dai kamo magpatindog nin kahoy na tanda kan diosang si Asera sa kataed kaiyan.

²²Dai kamo magpatindog nin ano man na hariging gapo na ikinakaongis nin Kagurangnan.