Read Central Bicolano Deuteronomy 17 Bible Online

Deuteronomy 17 - Central Bicolano bible

Deuteronomy 17

¹“Dai kamo magsakripisyo sa Kagurangnan na saindong Dios nin baka o karnero na igwa nin kaninan, huli ta ikinakaongis iyan nin Kagurangnan.

²“Halimbawa, sa saro kan saindong mga banwa, igwa nin lalaki o babae na nagkasala sa Kagurangnan asin naglapas kan saiyang tipan

³sa pagsamba asin paglingkod sa ibang mga dios o sa pagsamba sa aldaw, sa bulan o sa mga bitoon, na tumang sa pagboot nin Kagurangnan.

⁴Kun madangog nindo an siring na bareta, kaipuhan siyasaton nindo nin marahay. Kun totoo na nangyari an siring na karatan sa Israel,

⁵darahon nindo an tawong iyan sa luwas kan banwa asin gapoon nindo sagkod na magadan.

⁶Alagad gagadanon sana siya kun igwa nin duwa o tolo na magsaksi laban saiya; dai siya gagadanon kun saro sana an saksi.

⁷An mga saksi iyo an enot na magapo saiya dangan masunod an iba; sa siring na paagi, mahahale sa saindo an karatan na iyan.

⁸“Kun igwa nin mga kaso na dipisil hukoman kan mga hukom sa saindong mga banwa, arog baga kun siisay an tunay na kagsadiri, o mga kaso nin pangungulog asin nin paggadan o dai tinuyong paggadan, an mga ini darahon nindo duman sa lugar na pagsasambahan na pinili nin Kagurangnan na saindong Dios.

⁹Idolok nindo an kaso sa mga pading Levita asin sa hukom na namamahala sa panahon na iyan, dangan sinda an mahukom sa kaso.

¹⁰Matao sinda kan saindang desisyon asin kaipuhan gibohon nanggad nindo an sasabihon ninda.

¹¹Akoon nindo an saindang desisyon asin sunodon nindo an gabos na ipinapagibo ninda.

¹²Gagadanon an siisay man na mangahas na maglapas kan pagboot kan hukom o kan padi na naglilingkod sa atubang nin Kagurangnan. Sa siring na paagi, mahahale an karatan na iyan sa Israel.

¹³Madadangog ini kan gabos na tawo dangan matatakot sinda, asin mayo nang mangangahas na maggibo nin siring.

¹⁴“Pakatapos na masadirihan nindo an daga na itatao saindo nin Kagurangnan na saindong Dios asin mag-erok na kamo duman, dangan magdesisyon kamo na magkaigwa nin hade arog kan mga nasyon sa palibot nindo,

¹⁵pilion nindo bilang hade an tawo na iyo an pinili nin Kagurangnan na saindong Dios. Kaipuhan saro siya sa saindo; dai nindo paggibohon na hade an sarong dayuhan.

¹⁶An hade dai dapat magkaigwa nin dakul na kabayo para sa saiyang hukbo; dai siya dapat magpadara nin mga tawo tanganing magbakal nin mga kabayo sa Egipto, huli ta ipinangalad nin Kagurangnan an pagbalik duman kan saiyang banwaan.

¹⁷An hade dai dapat magkaigwa nin dakul na agom huli ta sinda an madara saiya na talikodan an Kagurangnan; dai siya dapat magpayaman sa plata asin sa bulawan.

¹⁸Kun hade na siya, kaipuhan magkaigwa siya nin kopya kan libro nin mga togon saka mga pagboot nin Dios, na kinopya sa orihinal na libro na nasa pangataman kan mga pading Levita.

¹⁹Kaipuhan danay na harani saiya an librong iyan, asin kaipuhan basahon niya iyan sa bilog niyang pagkabuhay tanganing makanood siyang maggalang sa Kagurangnan asin maimbod na magkuyog kan gabos na togon saka pagboot na nasa librong iyan.

²⁰Iyo ini an mapugol saiya sa pag-isip na mas marahay siya ki sa kapwa niya Israelita, asin sa paglapas kan mga pagboot nin Kagurangnan sa ano man na paagi. Dangan maghahade siya sa halawig na panahon asin an saiyang kapagarakian maghahade sa Israel sa dakul na henerasyon.