Read Central Bicolano Deuteronomy 2 Bible Online

Deuteronomy 2 - Central Bicolano bible

Deuteronomy 2

¹nagbalik kita sa desyerto, pasiring sa Dagat na Pula, sosog sa pagboot nin Kagurangnan, asin nagparalibot kita sa halawig na panahon sa mabulod na daga nin Edom.

²“Dangan nagtaram sako an Kagurangnan

³na haloy na kitang nagparalibot sa mabulod na dagang ini, kaya dapat na magduman kita sa amihan.

⁴Nagboot siya na sabihan ko kamong: ‘Aagihan nindo an Edom, an daga na pinag-eerokan kan kapagarakian ni Esau na mga kadugo nindo. Matatakot sinda saindo alagad

⁵dai nindo sinda kalabanon huli ta dai ko itatao saindo maski sarong pye kwadrado kan saindang daga. Itinao ko na an Edom sa kapagarakian ni Esau.

⁶Pwede kamong magbakal nin pagkakan asin inomon sa sainda.’

⁷“Benendisyonan kamo nin Kagurangnan na saindong Dios sa gabos nindong gibo. Inataman niya kamo sa saindong pagparalibot sa desyerto asin inibahan niya kamo sa laog nin kwarentang taon; dai kamo nagkulang nin ano man.

⁸“Kaya inagihan ta an Edom na pinag-eerokan kan kapagarakian ni Esau, asin nagpadagos kita sa paglakaw. Binayaan ta an dalan pasiring sa Elat asin an pasiring sa Ezion-geber, dangan nagliko kita asin nagpasiring sa kalangtadan nin Moab.

⁹Nagtaram sako an Kagurangnan, ‘Dai nindo pagribokon o kalabanon an mga Moabita, na kapagarakian ni Lot, huli ta itinao ko na sainda an daga nin Ar, asin dai ko kamo tatawan maski sarong pedaso kan saindang daga.’” (

¹⁰An nag-erok sa Ar kaidto iyo an mga Emim. Dakul sinda nin marahay asin darakula arog sa mga Anakim, na saro man na rasa nin mga higante.

¹¹Arog kan mga Anakim, inapod man sindang Refaim, alagad Emim an apod sainda kan mga Moabita.

¹²Nag-erok man sa Edom an mga Horeo; alagad dinaog sinda dangan ginadan kan kapagarakian ni Esau. Rinumpag kaini an saindang nasyon dangan duman na nag-erok sa lugar ninda, arog kan ginibo kan mga Israelita duman sa daga na itinao sainda nin Kagurangnan.)

¹³“Dangan nagbalyo kita sa Salog nin Zered siring sa ipinagboot sato nin Kagurangnan.

¹⁴Iyo idto an ikatreynta y otsong taon pakahale ta sa Kades-barnea. Gadan na gabos an mga lalaking parapakilaban sa kapagarakian na idto, siring sa itinaram nin Kagurangnan.

¹⁵Kinalaban sinda nin Kagurangnan sagkod na magadan sinda gabos.

¹⁶“Kan gadan na sinda gabos,

¹⁷nagtaram sako an Kagurangnan,

¹⁸‘Aagihan nindo an Ar ngunyan na aldaw, asin lalagbason nindo an daga nin Moab.

¹⁹Harani na kamo kaiyan sa daga kan mga Ammonita, na kapagarakian ni Lot. Dai nindo sinda pagribokon o kalabanon, huli ta maski sarong pedaso kan saindang daga dai ko itatao saindo; itinao ko na iyan sainda.’” (

²⁰Dating nag-erok duman an mga Refaim, na inapod Zamsummim kan mga Ammonita.

²¹Dakul sindang marahay asin darakula arog sa mga Anakim. Alagad ginadan sinda nin Kagurangnan tanganing an mga Ammonita iyo na an mag-erok sa lugar ninda.

²²Arog man kaini an ginibo nin Kagurangnan para sa kapagarakian ni Esau kan an mga ini magduman sa Edom. Pinahale nin Kagurangnan an mga Horeo asin pinaerok sa lugar ninda an kapagarakian ni Esau na yaon duman sagkod ngunyan.

²³An nag-erok kaidto sa baybayon kan Mediteraneo sagkod sa Gaza iyo an mga Avvim; pinahale sinda kan mga taga Creta, na iyo an nag-erok sa lugar ninda.)

²⁴“Pakaagi ta sa Moab, nagtaram sato an Kagurangnan, ‘Magduman kamo sa ibong kan Salog nin Arnon. Itatao ko saindo si Sihon, an Amoreong hade nin Hesbon, sagkod an saiyang daga. Salakayon nindo siya asin poonan na nindong sakopon an saiyang daga.

²⁵Magpoon ngunyan na aldaw, gigibohon kong katakotan kamo kan gabos na tawo sa kinaban. Magtatarakig sa takot an siisay man na makadangog kan saindong ngaran.’

²⁶“Kaya hale sa desyerto nin Kedemot, nagpadara ako ki Hadeng Sihon kan mensaheng ini nin katoninongan:

²⁷‘Tugotan mo kaming mag-agi sa saimong daga. Sososogon mi nanggad sana an dalan.

²⁸Babayadan mi an samong makakakan asin maiinom; tugotan mo sana kaming mag-agi sa saimong daga,

²⁹sagkod na makabalyo kami sa Salog nin Jordan asin makaabot sa daga na itinatao samo nin Kagurangnan na samong Dios. Tinugotan kaming mag-agi sa Edom kan kapagarakian ni Esau, asin sa Ar kan mga Moabita.’

³⁰“Alagad dai kita tinugotan ni Sihon na hade nin Hesbon. Pinatagas nin Dios an saiyang puso tanganing madaog ta siya asin makua an saiyang daga, na sakop ta sagkod ngunyan.

³¹“Dangan nagtaram sako an Kagurangnan, ‘Pinonan ko nang itao saindo si Sihon sagkod an saiyang daga; sakopon nindo asin sadirihon an saiyang daga.’

³²Nagluwas si Sihon kaiba an gabos niyang tawohan tanganing makilaban sato duman sa Jahaz.

³³Alagad itinao siya nin Kagurangnan sa satong mga kamot, asin ginadan ta siya, an saiyang mga aki sagkod an gabos niyang tawohan.

³⁴Satuyang sinakop saka rinaot an gabos na banwa; ginadan ta an gabos na lalaki, babae sagkod mga aki. Mayo kitang binuhay maski saro.

³⁵Sinamsam ta an mga hayop asin mga pagrogaring.

³⁶Tinugotan kita nin Kagurangnan na sakopon an gabos na banwa magpoon sa Aroer na nasa tampi kan Kapantayan nin Arnon, asin an syudad na nasa kapantayan na ini, sagkod sa Gilead. Dai nakaolang sato an mga makosog na kudal kan arin man na banwa.

³⁷Alagad dai kita nagrani sa daga kan mga Ammonita o sa mga pangpang kan Salog nin Jabbok o sa mga mabulod na daga o sa arin man na lugar na ipinangalad nin Kagurangnan na satong Dios.