Read Central Bicolano Deuteronomy 24 Bible Online

Deuteronomy 24 - Central Bicolano bible

Deuteronomy 24

¹“Kun magpakasal an sarong lalaki sa sarong babae dangan maisipan niyang suhayan an babae huli ta nakakua siya nin kasosopgan saiya, magibo siya nin kasuratan nin pagsuhay, na itatao niya sa saiyang agom dangan papahaleon niya ini sa saiyang harong.

²Halimbawa magpaagom giraray sa ibang lalaki an babaeng sinuhayan,

³asin maisipan kan lalaki na suhayan man siya. Magibo man an lalaki nin kasuratan nin pagsuhay, itatao sa babae dangan papahaleon niya. O halimbawa magadan an ikaduwang agom kan babae,

⁴ibibilang nang maati an babae; dai na siya pwedeng agomon giraray kan enot niyang agom. Ikakaongis nin Kagurangnan kun agomon niya giraray an babae. Dai nindo paggibohon an siring na karatan sa daga na itatao saindo nin Kagurangnan na saindong Dios.

⁵“Kun bagong kasalon an sarong lalaki, dai siya dapat pagpalaogon sa hukbo o pagtawan nin ano man na trabaho publiko; papabayaan ngona siya sa harong sa laog nin sarong taon, tanganing mag-ogma siya kaiba kan saiyang agom.

⁶“Kun magpautang kamo nin ano man sa saindong kapwa, dai nindo pagkuahon an gilingan kan nag-utang bilang sangra, huli ta hahalean nindo an saiyang pamilya kan kagamitan sa pag-andam kan saindang pagkakan tanganing mabuhay.

⁷“An siisay man na mangidnap nin kapwa Israelita tanganing oriponon o tanganing ipabakal bilang oripon, kaipuhan gadanon. Sa siring na paagi, mahahale saindo an karatan na ini.

⁸“Kun magkahelang kamo nin nakakatakot na helang sa kublit, kaipuhan otobon nindo an hatol kan mga pading Levita; sunodon nindo an mga katukdoan na itinao ko sainda.

⁹Giromdoma nindo an ginibo nin Kagurangnan na saindong Dios ki Miriam kan nagbabaklay kamo hale sa Egipto.

¹⁰“Kun magpautang kamo sa saindong kapwa, dai kamo maglaog sa saiyang harong sa pagkua kan isasangra niya saindo.

¹¹Maghalat kamo sa luwas asin pabayaan nindong siya an magtao kaiyan saindo.

¹²Kun tamong an sangra saindo kan sarong dukha, dai nindo iyan pagpaagahan saindo;

¹³kaipuhan ibalik nindo iyan saiya sa lambang pagsolnop kan aldaw tanganing magamit niya sa saiyang pagkatorog. Dangan magpapasalamat siya saindo asin mawiwilihan kamo nin Kagurangnan na saindong Dios.

¹⁴“Dai nindo pag-apihon an sarong dukha asin daing sukat na sorogoon na parapatandan, magin siya Israelita o nakikihimanwa sa saro kan saindong mga banwa.

¹⁵Aroaldaw, bago magsolnop an aldaw, tandanan nindo siya para sa trabaho sa aldaw na iyan, huli ta siya dukha asin iyan an saiyang pinaglalaoman. Kun dai nindo siya bayadan, maagrangay siya sa Kagurangnan laban saindo asin magkakasala kamo.

¹⁶“An mga magurang dai dapat paggadanon huli sa kasalan kan saindang mga aki; an mga aki dai dapat paggadanon huli sa kasalan kan saindang mga magurang. An sarong tawo gagadanon huli sa kasalan na siya nanggad an nakaginibo.

¹⁷“Dai nindo paghalean nin katanosan an mga dayuhan asin an mga ilo; dai nindo pagkuahon bilang sangra sa utang an gubing nin sarong babaeng balo.

¹⁸Giromdoma na nagin oripon man kamo sa Egipto, asin ilinigtas kamo nin Kagurangnan na saindong Dios kaya itinatao ko saindo ining pagboot.

¹⁹“Kun sa pagtipon nindo kan saindong ani, nalingawan nindo sa oma an sarong ginuygoy na trigo, dai na nindo idto pagbalikan. Pabayaan na nindo idto sa mga dayuhan, mga ilo asin mga babaeng balo tanganing bendisyonan kamo nin Kagurangnan na saindong Dios sa gabos nindong gibo.

²⁰Kun ginunoan na nindo nin makasarong beses an saindong mga oliba, dai na nindo pagbalikan an natada; pabayaan na nindo idto sa mga dayuhan, mga ilo asin mga babaeng balo.

²¹Kun ginunoan na nindo nin makasarong beses an saindong ubasan, dai na nindo pagbalikan an natada; pabayaan na nindo idto sa mga dayuhan, mga ilo asin mga babaeng balo.

²²Dai nindo paglingawan na nagin oripon man kamo sa Egipto kaya itinatao ko saindo ining pagboot.