Read Central Bicolano Deuteronomy 26 Bible Online

Deuteronomy 26 - Central Bicolano bible

Deuteronomy 26

¹“Kun masakop na nindo an daga na itinatao saindo nin Kagurangnan na saindong Dios, asin kun duman na kamo nag-eerok,

²an lambang saro saindo magkua kan enot na mga bunga kan saindong mga tinanom, ilaog nindo sa sarong basket, dangan darahon sa lugar na pagsasambahan sa Kagurangnan.

³Magduman kamo sa padi na naglilingkod sa panahon na iyan, asin sabihan nindo siyang, ‘Ipinapahayag nyamo sa Kagurangnan na samong Dios na yaon na kami digdi sa dagang ipinanuga niya sa samong mga ginikanan na itatao samo.’

⁴“Kukuahon saindo kan padi an basket asin ibubugtak niya iyan sa atubang kan altar nin Kagurangnan na saindong Dios.

⁵Dangan sasabihon nindo ini sa atubang nin Kagurangnan: ‘Sarong paralakaw na Arameo an sakong ama, na nagduman sa Egipto kaiba an saiyang pamilya tanganing mag-erok duman. Kadikit sana sinda na nagduman, alagad nagdakul sinda asin nagin sarong mapangyaring nasyon.

⁶Pinasakitan asin inapi kami kan mga Egipcio patin pinirit na magtrabaho siring sa mga oripon.

⁷Dangan nag-agrangay kami sa Kagurangnan, an Dios nin samong mga ginikanan. Dinangog niya kami asin nahiling niya an samong pagtios, kasakitan sagkod kaapihan.

⁸Huli kan saiyang dakulang kapangyarihan saka kosog, asin huli kan dakul na ngangalasan saka mangirhat na mga bagay na saiyang ginibo, ilinuwas niya kami sa Egipto.

⁹Dinara niya kami digdi dangan itinao samo an dagang ini na mayaman sa gabos na bagay.

¹⁰Kaya ngunyan, dinadara ko sa Kagurangnan an mga enot na bunga kan mga tinanom sa daga na itinao niya sako.’ “Pakasabi kaiyan, ibugtak nindo an basket sa atubang kan altar, dangan magsamba kamo sa Kagurangnan.

¹¹Magpasalamat kamo sa Kagurangnan na saindong Dios huli sa mga karahayan na itinao niya saindo asin sa saindong pamilya; magselebrar kamo kaiba an mga Levita sagkod an mga dayuhan na nakikihimanwa saindo.

¹²“Sa lambang ikatolong taon, itao nindo an himoloan—an ikasampolong parte kan saindong inani—sa mga Levita, mga dayuhan, mga ilo asin mga babaeng balo, tanganing sa lambang komunidad magkaigwa sinda kan pagkakan na saindang kaipuhan.

¹³Dangan magsabi kamo sa atubang nin Kagurangnan na saindong Dios, ‘Hinale ko na sa sakong harong an banal na himoloan, asin itinao ko na sa mga Levita, mga dayuhan, mga ilo asin mga babaeng balo siring sa ipinagboot mo; dai ko linapas an saimong mga togon saka dai ko liningawan an saimong mga pagboot manongod sa himoloan.

¹⁴Dai ako nagkakan nin ano man na himoloan kan ako nagmomondo; dai ko ilinuwas sa harong an arin man kaiyan kan ako bakong malinig; dai ko inatang an arin man kaiyan para sa mga gadan. Kinuyog taka, O Kagurangnan; sinunod ko an gabos mong pagboot manongod sa himoloan.

¹⁵Hale sa langit na saimong pinag-eerokan, dungawon mo asin bendisyonan an Israel na saimong banwaan saka an dagang ini na mayaman sa gabos na bagay, daga na itinao mo samuya siring sa ipinanuga mo sa samong mga ginikanan.’

¹⁶“Ngunyan na aldaw pinagbobotan kamo nin Kagurangnan, na saindong Dios, na kuyogon nindo an gabos niyang togon saka pagboot; kaya kuyogon nindo ini gabos sa bilog nindong puso.

¹⁷Ngunyan na aldaw, ipinahayag nindo na an Kagurangnan iyo an saindong Dios; nanuga kamo na kukuyogon nindo siya, na ootobon an gabos niyang togon, asin na gigibohon an gabos niyang pagboot.

¹⁸Ngunyan na aldaw inako kamo nin Kagurangnan bilang saiyang sadiring banwaan siring sa saiyang ipinanuga saindo. Ipinagboboot niya na kuyogon nindo an gabos niyang togon,

¹⁹tanganing gibohon niya kamong pinakadakula sa gabos na nasyon na saiyang linalang, asin magdadara kamo nin kaomawan saka onra sa saiyang ngaran. Kamo an magigin sadiring banwaan nin Kagurangnan na saindong Dios siring sa saiyang ipinanuga.”