Read Central Bicolano Deuteronomy 27 Bible Online

Deuteronomy 27 - Central Bicolano bible

Deuteronomy 27

¹Dangan kaiba an mga lider nin Israel nagsabi si Moises sa mga tawo, “Kuyogon nindo an gabos na pagboot na itinatao ko saindo ngunyan na aldaw.

²Sa aldaw na makabalyo kamo sa Salog nin Jordan asin makalaog sa daga na itinatao saindo nin Kagurangnan na saindong Dios, magtambak kamo nin mga darakulang gapo, na saindong sesementohon sa palibot,

³asin duman nindo isusurat an gabos na togon saka katukdoan. Kun makalaog na nindo an daga na ipinanuga nin Kagurangnan, an Dios kan saindong mga ginikanan, daga na mayaman sa gabos na bagay,

⁴asin nasa ibong na kamo kan Jordan, tambakon nindo an mga gapong iyan sa Bukid nin Ebal siring sa itinutukdo ko saindo ngunyan, dangan saindong sementohon.

⁵Magtugdok kamo duman nin altar na gibo sa gapo na dai ginamitan nin ano man na lansang na pantabas.

⁶Huli ta an arin man na altar na itugdok nindo para sa Kagurangnan na saindong Dios, kaipuhan gibo sa mga gapo na dai tinabas. Diyan nindo idodolot an mga tinutong na atang sa Kagurangnan na saindong Dios.

⁷Diyan nindo dadarahon saka kakakanon an mga atang para sa katoninongan, asin mag-oogma kamo sa atubang nin Kagurangnan na saindong Dios.

⁸Sa mga gapo na sinemento, isurat nindo nin malinaw an gabos na togon nin Dios.”

⁹Dangan kaiba an mga pading Levita, nagsabi sa mga tawo si Moises, “Banwaan nin Israel, mag-alo kamo asin magdangog sako. Ngunyan na aldaw, kamo nagin banwaan nin Kagurangnan na saindong Dios;

¹⁰kaya kuyogon nindo siya asin otobon an gabos niyang togon saka pagboot na itinatao ko saindo ngunyan.”

¹¹Dangan sinabihan ni Moises an banwaan nin Israel,

¹²“Pakabalyo nindo sa Jordan, mantang benebendisyonan an mga tawo, matindog sa Bukid nin Gerizim an mga tribu ni Simeon, Levi, Juda, Issakar, Jose asin Benjamin.

¹³Mantang sinasambit an mga maldisyon, matindog sa Bukid nin Ebal an mga tribu ni Ruben, Gad, Asher, Zabulon, Dan, asin Neftali.

¹⁴Sa makosog na tingog, masabi sa banwaan an mga Levita:

¹⁵“‘Maldisyonon an siisay man na maggibo nin ladawan na gapo, kahoy o metal, asin hilom na magsamba kaiyan; ikinakaongis nin Kagurangnan an pagsamba sa mga dios-dios.’ “Dangan an bilog na banwaan masimbag, ‘Amen!’

¹⁶“‘Maldisyonon an siisay man na dai maggalang sa saiyang ama saka ina.’ “Dangan an bilog na banwaan masimbag, ‘Amen!’

¹⁷“‘Maldisyonon an siisay man na maghiro kan muhon sa daga kan saiyang kataed.’ “Dangan an bilog na banwaan masimbag, ‘Amen!’

¹⁸“‘Maldisyonon an siisay man na magkabit sa sarong buta pasiring sa salang dalan.’ “Dangan an bilog na banwaan masimbag, ‘Amen!’

¹⁹“‘Maldisyonon an siisay man na magbiko kan katanosan nin sarong nakikihimanwa, ilo, asin babaeng balo.’ “Dangan an bilog na banwaan masimbag, ‘Amen!’

²⁰“‘Maldisyonon an siisay man na magsopog sa saiyang ama huli sa pagdorog sa arin man sa mga agom kan saiyang ama.’ “Dangan an bilog na banwaan masimbag, ‘Amen!’

²¹“‘Maldisyonon an siisay man na magdorog sa arin man na hayop.’ “Dangan an bilog na banwaan masimbag, ‘Amen!’

²²“‘Maldisyonon an siisay man na magdorog sa saiyang tugang na babae, magin siya tugang niya sa ama o sa ina.’ “Dangan an bilog na banwaan masimbag, ‘Amen!’

²³“‘Maldisyonon an siisay man na magdorog sa saiyang panugangan na babae.’ “Dangan an bilog na banwaan masimbag, ‘Amen!’

²⁴“‘Maldisyonon an siisay man na hilom na gumadan sa saiyang kapwa.’ “Dangan an bilog na banwaan masimbag, ‘Amen!’

²⁵“‘Maldisyonon an siisay man na mag-ako nin kwarta tanganing gadanon an sarong tawong mayong sala.’ “Dangan an bilog na banwaan masimbag, ‘Amen!’

²⁶“‘Maldisyonon an siisay man na dai magkuyog kan gabos na togon saka katukdoan nin Dios.’ “Dangan an bilog na banwaan masimbag, ‘Amen!’