Read Central Bicolano Deuteronomy 28 Bible Online

Deuteronomy 28 - Central Bicolano bible

Deuteronomy 28

¹“Kun magkuyog kamo sa Kagurangnan na saindong Dios asin maimbod na mag-otob kan saiyang mga pagboot na itinatao ko saindo ngunyan na aldaw, gigibohon niya kamong pinakadakula sa gabos na nasyon sa daga.

²Kuyogon nindo an Kagurangnan na saindong Dios asin mapapasaindo an mga bendisyon na ini:

³“Bebendisyonan nin Kagurangnan an saindong mga banwa saka kaomahan.

⁴“Bebendisyonan nin Kagurangnan an saindong mga aki, mga ani asin mga hayop; papadakulon niya an saindong mga baka saka mga karnero.

⁵“Bebendisyonan nin Kagurangnan an saindong mga ani asin an pagkakan na aandamon nindo hale sa mga ini.

⁶“Bebendisyonan nin Kagurangnan an gabos nindong gibo.

⁷“Dadaogon nin Kagurangnan an saindong mga kaiwal na masalakay saindo. Masalakay sinda saindo hale sa sarong direksyon, alagad madulag sinda pasiring sa gabos na direksyon.

⁸“Bebendisyonan nin Kagurangnan na saindong Dios an saindong mga trabaho dangan papanoon niya nin inani an saindong mga harong-harong; bebendisyonan niya kamo sa daga na itatao niya saindo.

⁹“Kun kuyogon nindo an Kagurangnan na saindong Dios asin kun gibohon nindo an mga ipinagboboot niya, gigibohon niya kamong sadiri niyang banwaan siring sa saiyang ipinanuga.

¹⁰Dangan mahihiling kan gabos na tawo sa kinaban na pinili kamo nin Kagurangnan na magin saiyang sadiring banwaan, asin matatakot sinda saindo.

¹¹Papauswagon niya kamo sa daga na ipinanuga niya sa saindong mga ginikanan na itatao saindo. Papadakulon niya an saindong mga aki, mga hayop asin an mga bunga kan daga.

¹²Hale sa saiyang mayaman na sarayan sa langit, ipapadara niya an uran sa tamang panahon asin bebendisyonan niya an gabos nindong gibo. Kaya magpapautang kamo sa dakul na nasyon alagad dai kamo mangungutang.

¹³Gigibohon nin Kagurangnan na kamo an magin lider kan mga nasyon asin bakong parasunod. Padagos kamong mag-uuswag asin dai nanggad kamo madadaog kun maimbod na magkuyog kamo kan mga togon nin Kagurangnan na itinatao ko saindo ngunyan na aldaw.

¹⁴Dai nanggad kamo maglapas kan arin man sa mga sinabi ko ngunyan na aldaw, o magsamba saka maglingkod sa mga dios-dios.

¹⁵“Alagad kun magsombikal kamo sa Kagurangnan na saindong Dios, asin dai kamo magmaimbod sa pagkuyog kan gabos niyang togon saka pagboot na itinatao ko saindo ngunyan na aldaw, maabot saindo an mga maldisyon na ini:

¹⁶“Mamaldisyonon nin Kagurangnan an saindong mga banwaan saka kaomahan.

¹⁷“‘Mamaldisyonon nin Kagurangnan an saindong mga ani asin an pagkakan na aandamon nindo hale sa mga ini.

¹⁸“‘Mamaldisyonon nin Kagurangnan an saindong mga aki, mga ani sagkod mga hayop.

¹⁹“‘Mamaldisyonon nin Kagurangnan an gabos nindong gibo.

²⁰“Kun maggibo kamo nin maraot asin magtalikod kamo sa Kagurangnan, papadarahan niya kamo nin maldisyon, karibongan saka kasakitan sa gabos nindong gibo, sagkod na matunaw asin mapara tolos kamo.

²¹Papadarahan niya kamo nin mga peste sagkod na mayo nang matada saindo sa daga na saindong lalaogon dangan sasadirihon.

²²Hahampakon niya kamo nin mga nakakaolakit na helang, kalentura, paggatok kan hawak; mapadara siya nin labi-labing init sagkod bagyo na maraot kan saindong mga tinanom. Dai kamo oontokan kan mga iyan sagkod na dai kamo magadan.

²³Dai magkakaigwa nin uran kaya magigin matagas siring sa lansang an saindong daga.

²⁴Embes na uran, papadarahan kamo kan Kagurangnan nin dakul na alpog saka abo sagkod na kamo magadan.

²⁵“Ipapadaog kamo nin Kagurangnan sa saindong mga kaiwal. Masalakay kamo sainda hale sa sarong direksyon, alagad madulag kamo pasiring sa gabos na direksyon; mangalas an gabos na tawo sa daga kun mahiling ninda an nangyari saindo.

²⁶Kun garadan na kamo, an saindong mga bangkay kakakanon kan mga gamgam asin mga lalaw na hayop, asin mayong maalaw sainda.

²⁷An Kagurangnan mapadara saindo nin mga pigsa arog kan ipinadara niya sa mga Egipcio. An saindong kublit mapapano nin mga gatok asin duldul na sobra an gatol, asin dai kamo mararahay.

²⁸Hahampakon kamo nin Kagurangnan sa paagi nin pagkabua, pagkabuta asin pagkaribong.

²⁹Sa liwanag nin kaodtohan, makapkap kamo siring sa sarong buta. Dai kamo mauswag sa ano man na trabaho nindo. Padagos kamong aapihon saka hahabonan asin mayo nin siisay man na matabang saindo.

³⁰“Magkakaigwa kamo nin katratong babae, alagad iba an maagom saiya. Mapatugdok kamo nin harong, alagad dai kamo maerok diyan. Matanom kamo nin ubas, alagad dai nindo mananamitan an mga bunga kaiyan.

³¹Bubunoon an saindong mga baka sa atubang nindo, alagad dai nindo mananamitan an karne kaiyan. Sa atubang nindo, guguyodon sa harayo an saindong mga asno dangan dai na ibabalik saindo. An saindong mga karnero itatao sa saindong mga kaiwal, asin mayo nin siisay man na matabang saindo.

³²Sa atubang nindo, itatao sa mga dayuhan an saindong mga aking lalaki saka babae, alagad mayo kamong magiginibo tanganing tabangan sinda. Aroaldaw mapapagal an saindong mga mata sa paghalat sainda alagad dai sinda mabalik.

³³Kukuahon nin sarong dayuhan na nasyon an gabos na bunga kan saindong daga asin kan saindong kapagalan; dangan padagos kamong aapihon asin pag-oorihan.

³⁴Mabubua kamo huli kan saindong mga pagtios.

³⁵Papanoon nin Kagurangnan an saindong mga bitis nin makukulog asin dai nabobolong na gatok; mapapano nin gatok an saindong hawak, magpoon sa bitis sagkod sa payo.

³⁶“Kamo asin an saindong hade dadarahon nin Kagurangnan sa sarong dayuhan na daga, na dai pa nindo naaraman ni kan saindong mga ginikanan. Duman malingkod kamo sa mga dios-dios na gibo sa kahoy saka gapo.

³⁷Sa mga daga na pagdadarahan saindo nin Kagurangnan, pagngangalasan kamo, pag-oolay-olayan asin pagngingisihan.

³⁸“Dakul na banhi an itatanom nindo alagad kadikit sana an saindong aanihon, huli ta kakakanon kan mga doron an saindong mga tinanom.

³⁹Matanom kamo asin maataman nin mga ubas, alagad dai kamo makakakua nin bunga o makakainom nin arak hale diyan, huli ta kakakanon kan mga ulod an mga balagon.

⁴⁰Magkakaigwa kamo nin mga kahoy na oliba sa bilog nindong daga, alagad dai kamo magkakaigwa nin lana nin oliba, huli ta magtatarakdag an mga bunga kaiyan.

⁴¹Magkakaigwa kamo nin mga aking lalaki saka babae alagad dai sinda mapapasaindo huli ta mabibihag sinda sa gera.

⁴²Kakakanon kan mga doron an gabos nindong kahoy sagkod tinanom.

⁴³“Orog na magluluya an kapangyarihan nindo, mantang orog na magkokosog an kapangyarihan kan mga dayuhan na nag-eerok sa kaibahan nindo.

⁴⁴Mautang kamo sainda, alagad mayo kamong ipapautang sainda; sa kataposan, sinda an magigin mga lider nindo asin kamo an magigin mga parasunod ninda.

⁴⁵“Maabot saindo an mga maldisyon na ini asin magdadanay iyan saindo sagkod na kamo magadan, huli ta dai kamo nagkuyog sa Kagurangnan na saindong Dios, asin dai kamo nag-otob kan saiyang mga togon saka pagboot.

⁴⁶An mga padusang ini an magigin tanda kan paghukom nin Dios sa saindo asin sa saindong kapagarakian sagkod lamang.

⁴⁷Benendisyonan kamo nin Kagurangnan sa gabos na bagay, alagad dai kamo naglingkod saiya sa maogma asin magayagayang puso.

⁴⁸Huli kaiyan, paglilingkodan nindo an mga kaiwal na ipapadara saindo nin Kagurangnan. Magugutom kamo, mapapaha, magigin huba, asin magkukulang sa gabos na bagay; aapihon kamo nin makuri kan Kagurangnan sagkod na kamo magadan.

⁴⁹Hale sa poro kan kinaban, ipapadara nin Kagurangnan laban saindo an sarong nasyon, na an lengwahe dai nindo masasabotan. Siring sa sarong agila, sasakloton kamo kan saindong mga kaiwal.

⁵⁰Magigin maringis sinda asin dai maheherak sa kiisay man saindo, aki man o gurang.

⁵¹Kakakanon ninda an saindong mga hayop asin an mga bunga kan saindong daga sagkod na magadan kamo sa gutom. Dai kamo ninda tatadaan nin ani, arak, lana, baka o karnero; magagadan kamo gabos.

⁵²Sasalakayon ninda an gabos na banwa na itatao saindo nin Kagurangnan na saindong Dios, sagkod na magkagaraba an haralangkaw asin makokosog na kudal na saindong sinasarigan.

⁵³“Sa panahon na sinasakop na kamo kan saindong mga kaiwal, magigin makuri an saindong gutom, kaya kakakanon nindo maski an mga aki na itinao saindo nin Kagurangnan na saindong Dios.

⁵⁴Magigin maimot maski an pinakamaboot saka pinakamarahay na lalaki; dai niya hihirasan nin pagkakan an saiyang tugang, agom o an natatada niyang mga aki.

⁵⁵Dai niya sinda hihirasan kan saiyang kinakakan na laman kan saiyang aki, huli ta mayo siyang makakakan, sa panahon na sinasakop kan mga kaiwal an saindong mga banwa.

⁵⁶Maski an pinakamaboot saka pinakadelikadong babae, na dai pa nangahas magtungtong sa daga, magigin maimot sa saiyang agom sagkod mga aki;

⁵⁷dai niya sinda hihirasan kan patago niyang kinakakan na bagong mamundag niyang aki asin inulonan kaiyan, huli sa makuring gutom sa panahon na sinasakop kan saindong mga kaiwal an saindong mga banwa.

⁵⁸“Kun bako kamong maimbod sa pagkuyog kan mga togon na nasusurat sa librong ini, asin kun dai kamo matakot sa ngaran nin Kagurangnan na saindong Dios,

⁵⁹kamo sagkod an saindong mga kapagarakian papadarahan niya nin mga helang na dai mabobolong asin mga peste na mayong kataposan.

⁶⁰Ipapadara niya giraray saindo an gabos na helang sa Egipto na natakotan nindo, asin dai kamo mararahay.

⁶¹Papadarahan pa niya kamo kan gabos na helang saka kasakitan na dai nasusurat sa librong ini nin mga pagboot nin Dios, asin magagadan kamo.

⁶²Maski magdakul kamo siring sa mga bitoon sa langit, dikit sana an matatada saindo, huli ta dai nindo kinuyog an Kagurangnan na saindong Dios.

⁶³Kun gurano nagin maogma an Kagurangnan sa pagpauswag asin pagpadakul saindo, siring man an saiyang magigin kaogmahan sa pagraot saka pagtunaw saindo; gagaboton niya kamo duman sa daga na saindong lalaogon dangan sasadirihon.

⁶⁴“Iwawarak kamo nin Kagurangnan sa gabos na nasyon, sa gabos na poro nin daga; malingkod kamo duman sa mga dios-dios na gibo sa kahoy saka gapo, mga dios-dios na dai pa nindo sinamba ni kan saindong mga ginikanan.

⁶⁵Mayo kamong makukuang katoninongan sa mga nasyon na iyan; mayo nin lugar na pwede nindong apodon na sadiri nindo. Papadarahan niya kamo nin kahandalan, kapurisawan asin kawaran nin paglaom.

⁶⁶An saindong buhay magigin danay na nasa pag-alaman; aldaw-banggi, aabotan kamo nin takot, asin dai kamo makakasiguro kan saindong buhay.

⁶⁷Magkakaigwa nin takot an saindong puso huli sa mga bagay na saindong mahihiling. Pagkaaga masabi kamo, ‘Magbanggi na logod!’ asin pagkabanggi masabi kamo, ‘Mag-aga na logod!’

⁶⁸Lunad nin mga barko, ibabalik kamo nin Kagurangnan sa Egipto, maski ngani nangako na siya na dai na kamo ibabalik duman. Ipapabakal nindo duman sa saindong mga kaiwal an saindong sadiri bilang mga oripon alagad mayo nin mabakal saindo.”