Read Central Bicolano Deuteronomy 3 Bible Online

Deuteronomy 3 - Central Bicolano bible

Deuteronomy 3

¹“Dangan nagtukad kita pasiring sa Basan; nagluwas si Hadeng Og kaiba an gabos niyang tawohan tanganing makilaban sato duman sa Edrei.

²Alagad nagtaram sako an Kagurangnan, ‘Dai ka matakot saiya; itatao ko siya sa saimong kamot, an saiyang mga tawohan sagkod an bilog niyang daga. Giboha saiya an ginibo mo ki Sihon na hade kan mga Amoreo na nag-erok sa Hesbon.’

³“Kaya itinao man nin Kagurangnan sa satong mga kamot si Hadeng Og asin an saiyang mga tawohan; ginadan ta sinda gabos.

⁴Sa oras man sanang idto, sinakop ta an gabos niyang banwa; mayo kitang itinada maski saro. Sesenta gabos an mga banwa na sinakop ta—an bilog na rehiyon nin Argob na sakop ni Hadeng Og nin Basan.

⁵An mga banwa na ini pinakosog kan mga haralangkaw na kudal, mga trangkahan saka mga barat kaini; asin igwa pa nin dakul na baryo na mayo nin kudal.

⁶Rinaot ta ini gabos saka ginadan an gabos na lalaki, babae sagkod aki, arog kan ginibo ta sa mga banwa na sadiri ni Hadeng Sihon kan Hesbon.

⁷Sinamsam ta an mga hayop asin mga rogaring.

⁸“Sa oras na idto, inagaw ta sa duwang hadeng Amoreo an daga sa sirangan kan Salog nin Jordan, magpoon sa Salog nin Arnon sagkod sa Bukid nin Hermon. (

⁹Sirion an apod kan mga taga Sidon sa Bukid nin Hermon, mantang Senir an apod kaini kan mga Amoreo.)

¹⁰Inagaw nyato an gabos na daga ni Hadeng Og nin Basan: an mga syudad sa kapatagan kan bukid, an mga rehiyon nin Gilead asin Basan, sagkod an mga harayong banwa nin Saleca asin Edrei sa sirangan.” (

¹¹An hadeng si Og iyo an natada sa mga Refaim. An saiyang kabaong, na gibo sa lansang, igwa nin sukol na haros duwang metro an lakbang asin apat na metro an laba sosog sa kinaugalean na sukol. Yaon pa ini sagkod ngunyan sa syudad nin Rabba sa daga kan mga Ammonita.)

¹²“Kan masadirihan ta na an daga, itinao ko sa mga tribu ni Ruben asin Gad an teritoryo na nasa amihan kan banwa nin Aroer, harani sa Salog nin Arnon, asin an kabtang kan mabulod na daga nin Gilead, kaiba an mga banwa duman.

¹³Itinao ko sa kabanga kan tribu ni Manases an natadang kabtang kan Gilead, asin an bilog na Basan, na pinaghadean ni Og, na iyo an bilog na rehiyon nin Argob.” (An Basan iyo an inapod na daga kan mga Refaim.

¹⁴Si Jair, kan tribu ni Manases, iyo an nagkua kan bilog na rehiyon nin Argob, na iyo an Basan, sagkod sa pagdolonan kan Gesur asin Maaca. Nginaranan niya an mga lugar na ini sunod sa saiyang ngaran, kaya sagkod ngunyan an mga baryo na ini inaapod Havvot-jair.)

¹⁵“Itinao ko an Gilead ki Makir kan tribu ni Manases,

¹⁶asin an teritoryo magpoon sa Gilead sagkod sa Salog nin Arnon itinao ko sa mga tribu ni Ruben saka ni Gad. An pagdolonan ninda sa timog iyo an Salog nin Arnon, asin sa amihan iyo an Salog nin Jabbok. Digdi man minapoon an daga kan mga Ammonita.

¹⁷Sa solnopan, an saindang teritoryo sagkod sa Salog nin Jordan, magpoon sa Danaw nin Galilea sa parteng amihan, sagkod sa Gadan na Dagat sa parteng timog saka sa Bukid nin Pisga sa parteng sirangan.

¹⁸“Sinabihan ko sinda kaidto, ‘Itinao saindo nin Kagurangnan na satong Dios ining daga tanganing saindong sakopon. Ngunyan tawan nindo nin armas an saindong mga parapakilaban asin ipadara nindo sa ibong kan Jordan, tanganing mangenot sa ibang mga tribu nin Israel asin tabangan sinda sa pagsakop kan saindang daga.

¹⁹An saindong mga agom, mga aki sagkod mga hayop—aram kong dakul an ataman nindong mga hayop—iyo sana an mawawalat sa mga syudad na itinao ko saindo.

²⁰Tabangan nindo an saindong kapwa Israelita sagkod na masakop ninda an daga na itinatao sainda nin Kagurangnan duman sa solnopan kan Jordan, asin sagkod na tugotan sinda nin Kagurangnan na mag-erok duman nin matoninong, arog kan ginibo niya digdi para saindo. Pakatapos, magpuli na kamo digdi sa daga na itinao ko saindo.’

²¹“Dangan sinabihan ko si Josue: ‘Nahiling mo an ginibo nin Kagurangnan na saimong Dios sa duwang hadeng si Sihon asin si Og; arog man kaiyan an saiyang gigibohon sa kiisay man na kagsadiri kan daga na saimong sasalakayon.

²²Dai ka matakot sa sainda, huli ta makikilaban para saimo an Kagurangnan na saimong Dios.’

²³“Nakimaherak ako kaidto sa Kagurangnan,

²⁴‘O Kagurangnan Dios, aram kong an ipinahiling mo sako iyo pa sana an kapinonan kan mga darakula asin makangangalas na mga bagay na gigibohon mo. Mayo nin dios sa langit asin sa daga na makakagibo kan mga ginibo mo.

²⁵O Kagurangnan, tugotan mo akong makabalyo sa Salog nin Jordan asin mahiling an matubang na daga duman, an magayon na kabubuldan asin an kabukidan nin Lebanon.’

²⁶“Alagad huli saindo, naanggot sakuya an Kagurangnan asin dai niya ako dinangog. Nagtaram siya sako, ‘Ontok diyan! Dai mo na pagsambiton sakuya an bagay na iyan.

²⁷Magduman ka sa alitoktok kan Bukid nin Pisga asin mangalagkalag ka sa amihan, sa habagat, sa sirangan, asin sa solnopan. Maanan mo nin marahay an saimong mahihiling huli ta dai ka nanggad makakabalyo sa Jordan.

²⁸Itukdo mo ki Josue an gigibohon niya asin pakosogon mo an saiyang boot, huli ta siya an mangengenot sa mga tawo sa pagsakop kan daga na saimong mahihiling.’

²⁹“Kaya nag-ontok kita sa kapantayan na kahampang kan Bet-peor.”