Read Central Bicolano Deuteronomy 30 Bible Online

Deuteronomy 30 - Central Bicolano bible

Deuteronomy 30

¹“Itinao ko saindo ngunyan an pagpipilian: sarong bendisyon asin sarong maldisyon. Kun mangyari na saindo an mga bagay na ini asin kun mag-erok na kamo sa mga nasyon na winarakan saindo nin Kagurangnan, magigiromdoman nindo ining pagpipilian na itinao ko saindo.

²Kun kamo asin an saindong mga kapagarakian magbalik sa Kagurangnan na saindong Dios, asin kun kuyogon nindo sa bilog nindong puso an mga pagboot na itinatao ko saindo ngunyan,

³ibabalik saindo nin Kagurangnan an marahay na palad saka maheherak siya saindo. Titiponon niya giraray kamo hale sa mga nasyon na pinagwarakan niya saindo.

⁴Maski nagkawararak kamo sa pinakaharayong parte kan daga, titiponon kamo nin Kagurangnan na saindong Dios asin ibabalik,

⁵tanganing masadirihan giraray nindo an daga na sadiri kaidto kan saindong mga ginikanan. Gigibohon niya kamong mas mauswag saka mas dakul ki sa saindong mga ginikanan.

⁶Babagohon nin Kagurangnan an saindong puso asin an puso kan saindong mga kapagarakian tanganing mamotan nindo siya sa bilog nindong puso, tanganing padagos kamong mabuhay.

⁷Ipapadara nin Kagurangnan an mga maldisyon na ini sa saindong mga kaiwal na naongis asin nag-api saindo.

⁸Kukuyogon giraray nindo siya saka ootobon an gabos niyang togon na itinatao ko saindo ngunyan.

⁹Papauswagon kamo nin Kagurangnan sa gabos nindong gibo; papadakulon niya an saindong mga aki, mga hayop, sagkod mga bunga kan saindong daga. Maoogma siya sa pagpauswag saindo, siring na naogma siya sa pagpauswag kan saidong mga ginikanan,

¹⁰alagad kaipuhan kuyogon nindo siya dangan otobon an gabos niyang togon saka pagboot na nasusurat sa librong ini nin mga katukdoan. Kaipuhan magbalik kamo sa Kagurangnan na saindong Dios sa bilog nindong puso.

¹¹“Bako man dipisil an pag-otob asin pagsabot kan mga togon na itinatao ko saindo ngunyan na aldaw.

¹²Bako man iyan nasa langit, kaya dai kamo pwedeng magsabi, ‘Siisay daw an masakat asin makua kaiyan para samo, tanganing samong madangog dangan magibo?’

¹³Bako man iyan nasa ibong kan dagat, kaya dai kamo pwedeng magsabi, ‘Siisay daw an mabalyo kan dagat asin makua kaiyan para samo, tanganing samong madangog dangan magibo?’

¹⁴Alagad an tataramon nasa saindo; nasa saindong ngoso asin puso tanganing kuyogon nindo.

¹⁵“Pinapapili ko kamo ngunyan na aldaw: sa marahay o sa maraot, sa buhay o sa kagadanan.

¹⁶Kun kuyogon nindo an mga togon nin Kagurangnan na saindong Dios, na itinatao ko saindo ngunyan na aldaw, kun kamotan nindo siya, kuyogon siya, asin otobon an gabos niyang togon, dangan mag-uuswag kamo asin magigin sarong dakulang nasyon. Bebendisyonan niya kamo sa daga na saindong lalaogon asin sasadirihon.

¹⁷Alagad kun magtalikod asin magbinongog-bongog kamo saiya dangan madagka na magsamba sa ibang mga dios-dios,

¹⁸sinasabihan ko kamo ngunyan na magagadan kamo. Dai maghahalawig an saindong buhay duman sa ibong kan Jordan, sa daga na saindong lalaogon saka sasadirihon.

¹⁹Pinapapili ko kamo ngunyan: sa buhay o sa kagadanan, sa bendisyon nin Dios o sa maldisyon niya. Inaapodan ko ngunyan an langit saka an daga na magsaksi sa gigibohon nindong pagpili. Pilion nindo an buhay, tanganing mabuhay kamo asin an saindong mga kapagarakian.

²⁰Kamotan nindo an Kagurangnan na saindong Dios, kuyogon siya, asin magmaimbod saiya, tanganing maghalawig an saindong buhay sagkod an buhay kan saindong mga kapagarakian duman sa daga na ipinanuga nin Kagurangnan na itatao sa saindong mga ginikanan na si Abraham, si Isaac asin si Jacob.”