Read Central Bicolano Deuteronomy 5 Bible Online

Deuteronomy 5 - Central Bicolano bible

Deuteronomy 5

¹Tinipon ni Moises an bilog na Israel asin sinabihan, “Banwaan nin Israel, dangoga nindo an mga togon asin mga pagboot na itatao ko saindo ngunyan na aldaw. Saboton asin kuyogon nanggad nindo an mga iyan.

²Duman sa Bukid nin Sinai, nakipagtipan an Kagurangnan na satong Dios

³bako sana sa satong mga magurang kundi sa satuya gabos na nabubuhay ngunyan.

⁴Duman sa bukid, hampangan na nagtaram saindo an Kagurangnan hale sa naglalaad na kalayo.

⁵Mantang nagtataram siya, nagtindog ako sa pagultanan nindo asin nin Kagurangnan tanganing ipahayag saindo an saiyang itinaram, huli ta natakot kamo sa kalayo dangan dai kamo nagtukad sa bukid. “Nagtaram an Kagurangnan,

⁶‘Ako an Kagurangnan na saindong Dios na nagdara saindo sa luwas kan harong nin kaoripnan.

⁷“‘Dai kamo nin ibang dios na sasambahon kundi ako sana.

⁸“‘Dai kamo maggibo nin ladawan kan anoman na nasa langit o nasa daga o nasa tubig sa irarom kan daga.

⁹Dai kamo magduko sa mga dios-dios o magsamba sa sainda, huli ta ako, an Kagurangnan na saindong Dios, sarong maimon na Dios. Pinapadusahan ko an mga naoongis sako pati an saindang mga aki sagkod sa ikatolo saka sa ikaapat na henerasyon.

¹⁰Alagad ipinapahiling ko an danay kong pagkamoot sa ribo-ribong henerasyon kan mga namomoot sa sako asin nag-ootob kan sakong mga togon.

¹¹“‘Dai nindo paggamiton an sakong ngaran nin basang lamang, huli ta ako, an Kagurangnan na saindong Dios, an mapadusa sa kiisay man na magbasang-basang kan sakong ngaran.

¹²“‘Giromdoma nindo an Sabbath asin pakabanala nindo iyan, siring na ako, an Kagurangnan na saindong Dios, iyo an nagboot saindo.

¹³Igwa kamo nin anom na aldaw tanganing gibohon an saindong mga trabaho,

¹⁴alagad an ikapitong aldaw, sarong aldaw na pahingalo na talaan para sako. Sa aldaw na iyan, mayo nin siisay man saindo na magtrabaho—kamo, an saindong mga aki, an saindong mga oripon, an saindong mga hayop o an mga dayuhan na nag-eerok sa saindong banwa. Arog sa saindo, kaipuhan magpahingalo man an saindong mga oripon na lalaki saka babae.

¹⁵Giromdoma nindo na mga oripon kamo duman sa Egipto, asin ako, an Kagurangnan na saindong Dios, an nagligtas saindo huli kan sakong dakulang kapangyarihan saka kosog. Kaya ipinagboboot ko saindo na giromdomon nindo an Sabbath.

¹⁶“‘Galangan nindo an saindong ama asin ina, siring na ako, an Kagurangnan na saindong Dios, an nagboboot sa saindo, tanganing maghalawig an saindong buhay asin mapakarahay kamo duman sa daga na itinatao ko saindo.

¹⁷“‘Dai kamo maggadan.

¹⁸“‘Dai kamo magdorog sa bako nindong agom.

¹⁹“‘Dai kamo maghabon.

²⁰“‘Dai kamo magsaksi nin putik laban sa saindong kapwa.

²¹“‘Dai kamo maara sa agom nin ibang lalaki; dai kamo maara sa saiyang harong, sa saiyang daga, sa saiyang mga oripon, sa saiyang mga baka, mga asno o sa ano man na pagsadiri niya.’

²²“Iyo ini an mga pagboot na itinao saindo nin Kagurangnan kan magtiripon kamo sa atubang kan bukid, kan magtaram siya sa makosog na tingog hale sa kalayo, hale sa panganoron sagkod sa mahibog na kadikloman; mayo na siyang idinagdag. Dangan isinurat niya an mga ini sa duwang tablang gapo asin itinao sako.

²³“Kan nadangog nindo an tingog hale sa kadikloman, mantang nagkakalayo an bukid, nagdolok sako an mga lider asin an mga namamayo kan mga tribu,

²⁴dangan nagsabi, ‘Ipinahiling sato nin Kagurangnan na satuyang Dios an saiyang kadakulaan asin kamurawayan kan nadangog ta siyang magtaram hale sa kalayo! Satuyang nahiling ngunyan na aldaw na an Dios nagtaram sa tawo asin an tawo padagos na nabuhay.

²⁵Alagad tano ta mapagadan kita? Tututongon kita kan makatakot na kalayong iyan. Magagadan nanggad kita kun madangog pa nyatong magtaram an Kagurangnan na satuyang Dios.

²⁶Huli ta siisay an tawong padagos nang nabuhay arog sato, pakatapos na madangog niyang magtaram hale sa kalayo an buhay na Dios?

²⁷Magduman ka, Moises, asin dangogon mo an gabos na itataram nin Kagurangnan na satuyang Dios; dangan magbalik ka asin iosip mo samo an saiyang itinaram. An gabos samuyang dadangogon asin kukuyogon.’

²⁸“Kan nadangog ini nin Kagurangnan, nagtaram siya sako, ‘Nadangog ko an sinabi kan mga tawong ini, asin tama sinda.

²⁹Padagos logod sindang matakot sako asin mag-otob kan sakuyang mga togon tanganing mapakarahay sinda asin an saindang kapagarakian sagkod pa man!

³⁰Magbalik ka dangan papulion mo sinda sa saindang mga tolda.

³¹Maghilig ka dangan magbalik digdi, asin itatao ko saimo an gabos kong togon saka pagboot. Itukdo mo iyan sa mga tawo tanganing otobon ninda duman sa daga na itinatao ko sainda.’

³²“Banwaan nin Israel, otobon nanggad nindo an gabos na ipinagboot saindo nin Kagurangnan na saindong Dios. Dai kamo maglapas kan arin man sa saiyang mga togon.

³³Kuyogon nindo gabos an mga iyan tanganing mabuhay asin mapakarahay kamo patin maghalawig an saindong buhay duman sa daga na masasadirihan nindo.