Read Central Bicolano Joshua 12 Bible Online

Joshua 12 - Central Bicolano bible

Joshua 12

¹Nasakop na kan mga Israelita an daga sa sirangan kan Jordan asin duman na sinda nag-erok. An dagang idto minapoon sa Kapantayan nin Arnon sagkod sa Kapantayan nin Jordan asin sa Bukid nin Hermon sa amihan. Duwang hade an nadaog ninda.

²An saro iyo si Sihon, an hadeng Amoreo na nag-erok sa Hesbon. Sakop kan saiyang kahadean iyo an kabanga kan Gilead: magpoon sa Aroer (sa gilid kan Kapantayan nin Arnon) asin magpoon sa syudad na nasa tahaw kan nasabing kapantayan sagkod sa Salog nin Jabbok sa pagdolonan nin Ammon;

³sakop pa kan saiyang kahadean an Kapantayan nin Jordan magpoon sa Danaw nin Galilea na nasa timog kan Bet-jesimot (sa sirangan kan Gadan na Dagat) sagkod sa pamitisan kan Bukid nin Pisga.

⁴Nadaog man kan mga Israelita si Hadeng Og kan Basan, saro sa mga natada sa rasa kan Refaim; nag-erok siya sa Astarot asin sa Edrei.

⁵Sakop kan saiyang kahadean an Bukid nin Hermon, Saleca, an bilog na Basan sagkod sa pagdolonan kan Gesur saka Maaca, asin an kabanga kan Gilead, sagkod sa teritoryo ni Hadeng Sihon kan Hesbon.

⁶An duwang hadeng ini dinaog ni Moises asin kan mga Israelita. An saindang daga itinao ni Moises, na sorogoon nin Kagurangnan, sa mga tribu ni Ruben, ni Gad asin sa kabanga kan tribu ni Manases, bilang pagsadiri ninda.

⁷Dinaog ni Josue asin kan mga Israelita an gabos na hade sa solnopan kan Salog nin Jordan magpoon sa Baal-gad na nasa Kapantayan nin Lebanon sagkod sa Bukid nin Halak sa habagat, harani sa Edom. An dagang idto binaranga ni Josue sa mga tribu kan Israel tanganing magin pagsadiri ninda sagkod lamang.

⁸An dagang idto iyo an kabubuldan, an mga kababan sa solnopan, an Kapantayan nin Jordan, asin an kababan duman, an mga tukadon sa sirangan, sagkod sa habagat na parte kan Canaan. Iyo idto an dagang dating pinag-eerokan kan mga Heteo, Amoreo, Cananeo, Perezeo, Heveo, asin Jebuseo.

⁹Dinaog kan mga Israelita an mga hade kan mga syudad na ini: Jerico, Ai (harani sa Betel),

¹⁰Jerusalem, Hebron,

¹¹Jarmut, Lakis,

¹²Eglon, Gezer,

¹³Debir, Geder,

¹⁴Horma, Arad,

¹⁵Libna, Adullam,

¹⁶Makkeda, Betel,

¹⁷Tappua, Hefer,

¹⁸Afek, Lasaron,

¹⁹Madon, Hazor,

²⁰Simron-meron, Acsaf,

²¹Taanac, Megido,

²²Kedes, Jokneam (sa Carmelo),

²³Dor (sa baybayon), Goiim (sa Galilea),

²⁴asin Tirza—treynta y unong hade gabos.