Read Central Bicolano Joshua 13 Bible Online

Joshua 13 - Central Bicolano bible

Joshua 13

¹Gurang nang marahay si Josue. Tinaraman siya nin Kagurangnan, “Gurang ka nang marahay alagad dakula pa an daga na sasakopon:

²an bilog na teritoryo nin Filistia asin Gesur,

³siring man an bilog na teritoryo nin Avvim sa parteng habagat. (An daga poon sa sapa nin Sihor, sa pagdolonan nin Egipto, sagkod sa pagdolonan nin Ekron sa parteng amihan ibinilang na sadiri kan mga Cananeo; an mga hade kan mga Filisteo nag-eerok sa Gaza, Asdod, Askelon, Gat, saka Ekron.)

⁴Yaon pa an bilog na daga kan mga Cananeo, asin an Meara na sadiri kan mga Sidoneo, sagkod sa Afek sa pagdolonan kan mga Amoreo;

⁵an daga kan mga Gibalita; an bilog na Lebanon sa sirangan, magpoon sa Baal-gad sa habagat kan Bukid nin Hermon, sagkod sa Dalan nin Hamat.

⁶Kabilang digdi an gabos na teritoryo kan mga Sidoneo na nag-eerok sa mabulod na daga sa pagultanan kan Kabukidan nin Lebanon asin Misrefot-maim. Papahaleon ko an mga tawong ini sa pagdangadang kan mga Israelita. Kaipuhan hirason mo an daga sa mga Israelita siring sa ipinagboot kong gibohon mo.

⁷Kaya ngani bangaon mo an dagang ini tanganing masadirihan kan siyam na tribu asin kan kabanga kan tribu ni Manases.”

⁸An mga tribu ni Ruben, Gad asin an kabanga kan tribu ni Manases nag-ako na kan dagang itinao sainda ni Moises na sorogoon nin Kagurangnan; yaon an dagang ini sa sirangan kan Salog nin Jordan.

⁹An teritoryo ninda minaabot sa Aroer (na nasa gilid kan Kapantayan nin Arnon) asin an syudad na nasa tahaw kan kapantayan na ini saka an gabos na kapatagan sa bukid na minapoon sa Medeba sagkod sa Dibon;

¹⁰sagkod an gabos na syudad ni Sihon, an hade kan mga Amoreo, na naghade sa Hesbon, sagkod sa pagdolonan nin Ammon;

¹¹kaiba an Gilead saka an mga rehiyon nin Gesur asin Maaca; an bilog na Bukid nin Hermon sagkod an bilog na Basan pasiring sa Saleca.

¹²Sakop man kan teritoryo ninda an kahadean ni Og, an natada sa mga Refaim, na naghade sa Astarot asin Edrei. Dinaog ni Moises an mga tawong ini asin pinahale sa saindang daga.

¹³Alagad dai pinahale kan mga Israelita an mga taga Gesur saka Maaca; sagkod ngunyan nag-eerok sinda sa Israel.

¹⁴Dai tinawan ni Moises nin daga an tribu ni Levi. Bilang saindang pamana, maako sinda nin kahirasan sa mga dolot na tinututong sa altar para sa Kagurangnan, an Dios nin Israel, siring sa itinaram nin Kagurangnan ki Moises.

¹⁵Hinirasan ni Moises kan daga an mga pamilya kan tribu ni Ruben bilang saindang pagsadiri.

¹⁶An saindang teritoryo abot sa Aroer (na nasa gilid kan Kapantayan nin Arnon) asin an syudad na nasa tahaw kan kapantayan na idto saka an gabos na kapatagan sa bukid sa palibot kan Medeba.

¹⁷Sakop kan teritoryo ninda an Hesbon saka an gabos na syudad sa kapatagan sa bukid: an Dibon, Bamot-baal, Bet-baal-meon,

¹⁸Jahaz, Kedemot, Mefaat,

¹⁹Kiriat-haim, asin an Sibma. Sakop man ninda an Zeret-sahar na nasa bulod kan kapantayan,

²⁰an Bet-peor, an mga tukadon kan Bukid nin Pisga, asin an Bet-jesimot;

²¹an gabos na syudad sa kapatagan sa bukid asin an bilog na kahadean kan Amoreong hade na si Sihon na naghade sa Hesbon. Nadaog ni Moises si Sihon, siring man an mga namamayo kan Midian: si Evi, Rekem, Zur, Hur sagkod si Reba. Sinda an namayo sa daga para ki Hadeng Sihon.

²²Kaiba sa mga ginadan kan mga Israelita iyo an parahula na si Balaam na aki ni Beor.

²³An Salog nin Jordan iyo an pagdolonan kan tribu ni Ruben sa parteng solnopan. Iyo ini an mga syudad saka mga banwa na itinao bilang pamana sa mga pamilya kan tribu ni Ruben.

²⁴Hinirasan man ni Moises kan daga an mga pamilya kan tribu ni Gad bilang saindang pagsadiri.

²⁵Sakop kan saindang teritoryo an Jazer asin an gabos na syudad kan Gilead, an kabanga kan daga nin Ammon sagkod sa Aroer, na nasa sirangan kan Rabba.

²⁶Magpoon sa Hesbon, an saindang daga minaabot sa Ramat-mizpe saka sa Betonim, poon sa Mahanaim sagkod sa pagdolonan kan Lodebar.

²⁷Sa Kapantayan nin Jordan, kahirasan ninda an Bet-haran, Bet-nimra, Sukkot, asin an Safon, an natadang kabtang kan kahadean ni Hadeng Sihon kan Hesbon. An pagdolonan ninda sa parteng solnopan minapoon sa Salog nin Jordan sagkod sa Danaw nin Galilea.

²⁸Iyo ini an mga syudad asin mga banwa na itinao bilang pamana sa mga pamilya kan tribu ni Gad.

²⁹Hinirasan ni Moises kan daga an mga pamilya kan kabanga kan tribu ni Manases bilang saindang pagsadiri.

³⁰An saindang kahirasan abot sa Mahanaim asin kaiba an Basan—an bilog na kahadean ni Og, na hade kan Basan, siring man an sesentang baryo nin Jair sa Basan.

³¹Napasainda an kabanga kan Gilead, siring man an Astarot saka Edrei, an duwang pangenot na syudad kan kahadean ni Og sa Basan. Ini gabos itinao sa kabanga kan mga pamilyang gikan ki Makir na aki ni Manases.

³²Siring kaini an pagkabanga ni Moises kan daga sa sirangan nin Jerico asin nin Salog nin Jordan kan siya yaon duman sa Kapantayan nin Moab.

³³Alagad an tribu ni Levi dai tinawan ni Moises nin daga. Sinabihan niya sinda na an saindang pamana iyo an Kagurangnan, an Dios nin Israel.