Read Central Bicolano Joshua 15 Bible Online

Joshua 15 - Central Bicolano bible

Joshua 15

¹An mga pamilya kan tribu ni Juda nag-ako kan kahirasan na daga na ilinaladawan siring kaini: An daga minapasiring sa habagat sa pinakaporo kan kalangtadan nin Zin, sa pagdolonan kan Edom.

²An pagdolonan na ini sa habagat minapoon sa poro kan Gadan na Dagat,

³minapadagos sa Dalan nin Akrabim sagkod sa Zin. Minapasiring sa habagat kan Kades-barnea, dangan sa Hezron saka sa Addar; minaliko pasiring sa Karka,

⁴padagos sa Asmon, asin minasunod sa sapa na nasa pagdolonan nin Egipto dangan minatapos sa Dagat nin Mediteraneo. Iyo ini an pagdolonan sa habagat kan daga ni Juda.

⁵An pagdolonan kan daga sa sirangan iyo an Gadan na Dagat sagkod sa sadit na sapa na binubulosan kan Salog nin Jordan. An pagdolonan kan daga sa amihan minapoon sa sadit na sapa,

⁶padagos sa Bet-hogla, asin minaagi sa amihan kan Bet-Araba. Dangan minatukad sa Gapo ni Bohan (si Bohan sarong aki ni Ruben);

⁷hale sa Kapantayan nin Acor minapasiring sa Debir, dangan minaliko paamihan pasiring sa Gilgal, na kahampang kan Dalan nin Adummim sa habagat na parte kan kapantayan. An pagdolonan minaabot sa mga burabod nin En-semes, asin minatapos sa En-rogel;

⁸dangan minatukad sa may Kapantayan nin Hinnom, na nasa habagat kan bulod na pinatindogan kan Jerusalem, an Jebuseong syudad. Dangan minadagos an pagdolonan sa alitoktok kan bulod na nasa solnopan kan Kapantayan nin Hinnom, sa amihan na poro kan Kapantayan nin Refaim.

⁹Hale duman, minadagos iyan sa mga burabod nin Neftoa asin sa mga syudad na harani sa Bukid nin Efron. Dangan minaliko iyan pasiring sa Baala (o Kiriat-jearim),

¹⁰saen minalibot pasolnopan kan Baala pasiring sa mabulod na daga nin Edom, minaagi sa amihan na parte kan Bukid nin Jearim (o Kesalon), dangan minababa pasiring sa Bet-semes, asin minalampas sa Timna.

¹¹Dangan an pagdolonan minapasiring sa bulod sa amihan kan Ekron, minaliko pasiring sa Sikkeron, minaagi sa Bukid nin Baala, padagos sa Jamnia, sagkod sa Dagat nin Mediteraneo,

¹²na iyo an pagdolonan sa solnopan. Sa laog kan mga pagdolonan na ini nag-erok an mga pamilya kan tribu ni Juda.

¹³Siring sa ipinagboot nin Kagurangnan ki Josue, sarong parte kan daga ni Juda an itinao ki Caleb na aki ni Jefunne, na gikan sa tribu ni Juda. Napasaiya an Hebron, an syudad na sadiri ni Arba na ama ni Anak.

¹⁴Pinahale ni Caleb sa syudad an tolong aking lalaki ni Anak: si Sesai, Ahiman, asin Talmai.

¹⁵Hale duman, sinalakay niya an mga tawo na nag-erok sa Debir. (Kaidto an syudad na ini inapod Kiriat-sefer.)

¹⁶Nagsabi si Caleb, “Ipapakasal ko an aki kong si Acsa sa lalaking makakasakop kan Kiriat-sefer.”

¹⁷Si Otniel, na aki ni Kenaz na tugang ni Caleb, iyo an nakasakop kan syudad kaya ipinakasal ni Caleb si Acsa ki Otniel.

¹⁸Sa aldaw kan kasal, sinabihan ni Otniel si Acsa na maghagad sa saiyang ama nin sarong oma. Nagbaba si Acsa sa asnong nalulunadan niya kaya hinapot siya ni Caleb kun ano an kaipuhan.

¹⁹Nagsimbag si Acsa, “Boot kong magkaigwa nin mga burabod nin tubig. An dagang itinao mo sako yaon sa habagat na parte kan Canaan.” Kaya itinao saiya ni Caleb an mga burabod sa itaas asin sa ibaba.

²⁰Ini an kahirasan na daga kan mga pamilya kan tribu ni Juda.

²¹An mga syudad na nasa porong habagat na sadiri ninda, idtong nasa harani kan pagdolonan nin Edom iyo an Kabzeel, Eder, Jagur,

²²Kina, Dimona, Adada,

²³Kedes, Hazor, Itnan,

²⁴Zif, Telem, Bealot,

²⁵Hazor-hadatta, Keriot-hezron (o Hazor),

²⁶Amam, Sema, Molada,

²⁷Hazar-gadda, Hesmon, Bet-pelet,

²⁸Hazar-sual, Beer-sheba, Biziotia,

²⁹Baala, Iim, Ezem,

³⁰Eltolad, Kesil, Horma,

³¹Ziklag, Madmanna, Sansanna,

³²Lebaot, Silhim, Ain, saka Rimmon; beynte y nuebeng syudad gabos, kaiba an mga banwa sa palibot kan mga iyan.

³³An mga syudad sa kababan iyo an Estaol, Zora, Asna,

³⁴Zanoa, Engannim, Tappua, Enam,

³⁵Jarmut, Adullam, Soco, Azeka,

³⁶Saaraim, Aditaim, Gedera, asin Gederotaim: katorseng syudad gabos, kaiba an mga banwa sa palibot kan mga iyan.

³⁷Kairiba pa kan mga ini iyo an Zenan, Hadasa, Migdalgad,

³⁸Dilean, Mizpa, Jokteel,

³⁹Lakis, Bozkat, Eglon,

⁴⁰Cabbon, Lamam, Kitlis,

⁴¹Gederot, Bet-dagon, Naama, asin Makkeda: dyes y seis na syudad gabos, kaiba an mga banwa sa palibot kan mga iyan.

⁴²Kairiba pa kan mga ini iyo an Libna, Eter, Asan,

⁴³Ifta, Asna, Nezib,

⁴⁴Keila, Aczib, asin Maresa: siyam na syudad gabos, kaiba an mga banwa sa palibot kan mga iyan.

⁴⁵Kaiba man an Ekron, dangan an mga banwa saka an mga baryo kaiyan,

⁴⁶asin an gabos na syudad saka mga banwa na harani sa Asdod, magpoon sa Ekron sagkod sa Dagat nin Mediteraneo.

⁴⁷Kairiba man an Asdod saka Gaza, dangan an mga banwa asin an mga baryo na abot sa sapa na nasa pagdolonan kan Egipto sagkod sa baybayon kan dagat nin Mediteraneo.

⁴⁸Sa mga syudad sa mabulod na daga, kairiba an Samir, Jattir, Soco,

⁴⁹Danna, Kiriat-sefer (o Debir),

⁵⁰Anab, Estemoa, Anim,

⁵¹Gosen, Holon, asin Gilo: onseng syudad gabos, kaiba an mga banwa sa palibot kan mga iyan.

⁵²Kairiba pa kan mga ini iyo an Arab, Duma, Esan,

⁵³Janim, Bet-tappua, Afeka,

⁵⁴Humta, Hebron, asin Zior: siyam na syudad gabos, kaiba an mga banwa sa palibot kan mga iyan.

⁵⁵Kairiba man an Maon, Carmelo, Zif, Jutta,

⁵⁶Jezreel, Jokdeam, Zanoa,

⁵⁷Kain, Gibea, asin Timna: sampolong syudad gabos, kaiba an mga banwa sa palibot kan mga iyan.

⁵⁸Kairiba pa an Halhul, Bet-zur, Gedor,

⁵⁹Maarat, Bet-anot, asin Eltekon: anom na syudad gabos, kaiba an mga banwa sa palibot kan mga iyan.

⁶⁰Kairiba man an Kiriat-baal (o Kiriat-jearim) asin an Rabba: duwang syudad, kaiba an mga banwa sa palibot kan mga iyan.

⁶¹Sa kalangtadan, nakaiba an Bet-araba, Middin, Secaca,

⁶²Nibsan, an Syudad nin Asin, saka an Engedi: anom na syudad gabos, kaiba an mga banwa sa palibot kan mga iyan.

⁶³Alagad dai napahale kan banwaan nin Juda an mga Jebuseo na nag-eerok sa Jerusalem. Sagkod ngunyan duman sinda nag-erok kaiba an mga tawo na gikan sa tribu ni Juda.