Read Central Bicolano Joshua 19 Bible Online

Joshua 19 - Central Bicolano bible

Joshua 19

¹An ikaduwang kahirasan iyo an para sa mga pamilya kan tribu ni Simeon. An teritoryo ninda sagkod sa daga na itinao sa tribu ni Juda.

²Sakop kaini an Beer-sheba, Sheba, Molada,

³Hazar-sual, Bala, Ezem,

⁴Eltolad, Betul, Horma,

⁵Ziklag, Bet-marcabot, Hazar-susa,

⁶Bet-lebaot, asin Saruhen: treseng syudad gabos, kaiba an mga banwa sa palibot kan mga iyan.

⁷Napasainda man an Ain, Rimmon, Eter, saka Asan: apat na syudad gabos, kaiba an mga banwa sa palibot kan mga iyan.

⁸Napasainda man an gabos na banwa sa palibot kan mga syudad na idto sagkod sa Baalat-beer (o Rama), sa habagat. Ini an dagang inako bilang kahirasan kan mga pamilya kan tribu ni Simeon.

⁹Huli ta an dagang inako ni Juda sobra sa saiyang kaipuhan, an ibang parte kan saindang daga itinao sa tribu ni Simeon.

¹⁰An ikatolong kahirasan iyo an para sa mga pamilya kan tribu ni Zabulon. An dagang inako ninda nakaabot sa Sarid.

¹¹Hale duman, an pagdolonan minapasiring sa solnopan, sa Mareal, minaduta sa Dabbeset asin sa sapa sa sirangan kan Jokneam.

¹²Sa ibong kan Sarid, minapasiring iyan sa sirangan, sa pagdolonan nin Kislot-tabor, dangan sa Daberat asin minatukad pasiring sa Jafia.

¹³Minadagos iyan sa sirangan, sa Gat-hefer asin sa Etkazin saka minaliko sa direksyon kan Nea pasiring sa Rimmon.

¹⁴Sa amihan, an pagdolonan minaliko pasiring sa Hannaton, asin minatapos sa Kapantayan nin Iftahel.

¹⁵Sakop kaiyan an Kattat, Nahalal, Simron, Idala, asin an Betlehem: doseng syudad gabos, kaiba an mga banwa sa palibot kan mga iyan.

¹⁶An mga syudad asin mga banwang ini nasa laog kan dagang itinao bilang pamana sa mga pamilya kan tribu ni Zabulon.

¹⁷An ikaapat na kahirasan iyo an para sa mga pamilya kan tribu ni Issakar.

¹⁸Sakop kan saindang daga an Jezreel, Kesullot, Sunem,

¹⁹Hafaraim, Sion, Anaharat,

²⁰Rabbit, Kision, Ebez,

²¹Remet, En-gannim, En-hadda, asin Bet-pazzez.

²²An pagdolonan minaduta man sa Tabor, Sahazuma, saka Bet-semes, asin sagkod sa Jordan. Sakop kaiyan an dyes y seis na syudad, kaiba an mga banwa sa palibot kan mga iyan.

²³An mga syudad asin an mga banwang sakop kan mga ini nasa dagang itinao bilang pamana sa mga pamilya kan tribu ni Issakar.

²⁴An ikalimang kahirasan iyo an para sa mga pamilya kan tribu ni Asher.

²⁵Sakop kan saindang daga an Helkat, Hale, Beten, Acsaf,

²⁶Allam-melec, Amad, saka an Misal. Sa solnopan, an pagdolonan kan daga minaduta sa Carmelo asin sa Sihor-libnat.

²⁷Pagliko pasiring sa sirangan, an pagdolonan minapasiring sa Bet-dagon, minaduta sa Zabulon asin sa Kapantayan nin Iftahel mantang pasiring sa Bet-emek saka sa Neiel. Minadagos iyan sa amihan pasiring sa Cabul,

²⁸Ebron, Rehob, Hammon, asin Kana, sagkod sa Sidon.

²⁹Dangan minaliko an pagdolonan pasiring sa Rama, sagkod sa pinapusog na syudad nin Tiro; dangan minaliko pasiring sa Hosa asin minatapos sa Dagat nin Mediteraneo. Sakop pa kan saindang daga an Mahalab, Aczib,

³⁰Umma, Afek, asin Rehob: beynte y dos na syudad gabos, kaiba an mga banwa sa palibot kan mga iyan.

³¹An mga syudad na ini asin an saindang mga banwa nasa dagang itinao bilang pamana sa mga pamilya kan tribu ni Asher.

³²An ikaanom na kahirasan iyo an para sa mga pamilya kan tribu ni Neftali.

³³An pagdolonan kan daga minapoon sa Helef pasiring sa kahoy na hamurawon na nasa Zaanannim, minadagos sa Adaminekeb saka sa Jamnia, sa Lakkum, asin sagkod sa Salog nin Jordan.

³⁴Dangan minaliko an pagdolonan pasiring sa solnopan, sa Aznot-tabor; hale duman minapasiring sa Hukkok, minaduta sa Zabulon sa habagat, sa Asher sa solnopan, asin sa Jordan sa sirangan.

³⁵An mga pinapusog na syudad iyo an Ziddim, Zer, Hammat, Rakkat, Kinneret,

³⁶Adama, Rama, Hazor,

³⁷Kedes, Edrei, En-hazor,

³⁸Yiron, Migdalel, Horem, Bet-anat, asin an Bet-semes: dyes y nuebeng syudad gabos, kaiba an mga banwa sa palibot kan mga iyan.

³⁹An mga syudad na ini asin an saindang mga banwa nasa dagang itinao bilang pamana sa mga pamilya kan tribu ni Neftali.

⁴⁰An ikapitong kahirasan iyo an para sa mga pamilya kan tribu ni Dan.

⁴¹Sakop kan saindang daga an Zora, Estaol, Ir-semes,

⁴²Saalabim, Aijalon, Itla,

⁴³Elon, Timna, Ekron,

⁴⁴Elteke, Gibbeton, Baalat,

⁴⁵Jehud, Beneberak, Gat-rimmon,

⁴⁶Mejarkon, asin Rakkon, siring man an daga sa palibot kan Jope.

⁴⁷Kan mawaraan nin daga an mga taga Dan nagduman sinda sa Lais asin sinalakay idto. Nasakop ninda idto, ginaradan an mga tawo, dangan sinadiri an daga. Nag-erok sinda duman asin rinibayan ninda an ngaran kan syudad nin Lais. Inapod nindang Dan, sunod sa ngaran ni Dan na saindang ginikanan.

⁴⁸An mga syudad na ini asin an saindang mga banwa nasa daga na itinao bilang pamana sa mga pamilya kan tribu ni Dan.

⁴⁹Kan matapos na ninda an paghiras kan daga, hinirasan ninda nin daga si Josue na aki ni Nun.

⁵⁰Siring sa ipinagboot nin Kagurangnan, itinao ninda saiya an syudad na saiyang hinagad: an Timnat-sera, na nasa mabulod na daga kan Efraim. Pinatindog giraray ni Josue an syudad asin nag-erok siya duman.

⁵¹An paghiras kan daga ginibo ni Eleazar na padi, ni Josue na aki ni Nun, asin kan mga lider kan mga pamilya kan mga tribu nin Israel sa paagi nin pagripa. Ginibo ninda ini sa Shilo, sa atubang nin Kagurangnan, sa may pintoan kan Tabernakulo. Sa paaging ini natapos ninda an paghiras kan daga.