Read Central Bicolano Joshua 2 Bible Online

Joshua 2 - Central Bicolano bible

Joshua 2

¹Hale sa kampo sa Sittim, nagpadara si Josue nin duwang espiya asin pinagbotan na hilom nindang siyasaton an Canaan, orog na an syudad kan Jerico. Pag-abot ninda sa syudad, nagdagos sinda sa harong nin sarong maraot na babae na an ngaran Rahab, tanganing duman makitorog.

²Naaraman kan hade nin Jerico na may nagkapirang Israelita na nag-abot sa syudad kan bangging idto tanganing magsiyasat kan daga.

³Kaya pinasabihan niya si Rahab, “Iluwas mo an mga lalaki na yaon sa saimong harong na nagdigdi tanganing siyasaton an bilog na daga!”

⁴“Totoo na may mga lalaking nagdigdi sa sakong harong,” an simbag ni Rahab, “alagad dai ko aram kun mga taga saen sinda. Nagharale sinda pagsolnop kan aldaw, bago sinerahan an trangkahan kan syudad. Dai ko sinda hinapot kun saen sinda maduman, alagad kun lalamagon nindo tolos sinda, maaabotan pa nindo sinda.” (An totoo, dinara ni Rahab sa atop an duwang espiya asin tinago sa irarom kan mga dagami na ibinugtak niya duman.)

⁷Kaya nagruluwas sa syudad an mga tawohan kan hade, dangan sinerahan an trangkahan. Hinanap ninda an mga Israelita sagkod sa dalan bago magbalyo sa Jordan.

⁸Bago nagkatorog an mga espiya, nagsakat sa atop si Rahab

⁹asin nagsabi sainda, “Naaaraman ko na itinao saindo nin Kagurangnan an dagang ini. Natatakot saindo an gabos na nag-eerok digdi.

¹⁰Nadangog mi kun paano pinamara nin Kagurangnan sa atubang nindo an Dagat na Pula kan maghale kamo sa Egipto. Nabaretaan mi man kun paano nindo ginadan si Sihon asin si Og, an duwang hadeng Amoreo na taga sirangan kan Jordan.

¹¹Pagkadangog mi kaini, nagkatarakot kami; nawaraan kami nin isog huli saindo. An Kagurangnan na saindong Dios, iyo an Dios sa langit asin sa daga.

¹²Magsumpa kamo sako ngunyan sa ngaran nin Kagurangnan, na maheherak kamo sa sakong pamilya siring kan ginibo ko saindo, dangan tawan nindo ako nin tanda na mapapaniwalaan ko kamo.

¹³Manuga kamo sako na ililigtas nindo an sakong ama, ina, mga tugang na lalaki saka babae, sagkod an saindang mga pamilya! Dai nindo kami ipagpagadan!”

¹⁴Nagsabi saiya an mga lalaki, “Gadanon logod kami nin Dios kun dai mi gibohon an samong sinasabi. Kun dai ka mag-osip sa kiisay man kan samong ginigibo, nanunuga kami, na magigin marahay an pagtratar mi saimo kun itao na samo nin Kagurangnan an dagang ini.”

¹⁵Nag-eerok si Rahab sa sarong harong na itinugdok sa kudal kan syudad, kaya an mga lalaki pinababa niya sa paagi nin sarong lubid na itinunton sa bintana.

¹⁶“Magpasiring kamo sa kabubuldan,” an olay niya sainda, “ta tibaad masabat kamo kan mga naglalamag saindo. Magtago kamo duman sa laog nin tolong aldaw sagkod na magbalik sinda; dangan magpadagos na kamo sa saindong paglakaw.”

¹⁷Sinabihan siya kan mga lalaki, “Ootobon mi an panuga na ipinagibo mo samo.

¹⁸Ini an gibohon mo. Pagsalakay mi sa saindong daga, igakod mo an pulang lubid na ini sa bintanang pinaagihan mo samo. Tiponon mo sa saimong harong an saimong ama, ina, mga tugang sagkod an bilog na pamilya kan saimong ama.

¹⁹Kun may magluwas sa saimong harong, dai kami mababasol kun siya magadan; sala niya iyan. Alagad kun may makulogan sa mga kairiba mo sa laog kan harong, kami an maninimbag kaiyan.

²⁰Alagad kun iosip mo sa iba ining ginigibo mi, dai kaipuhan na otobon mi an panuga na ipinagibo mo samo.”

²¹Nag-oyon si Rahab asin pinahale na niya an mga lalaki. Kan dai na sinda, iginakod niya sa bintana an pulang lubid.

²²Nagpasiring sa kabubuldan an mga espiya asin nagtago. Hinanap sinda kan mga tawohan kan hade sa laog nin tolong aldaw alagad dai sinda nakua, kaya nagbalik na an mga ini sa Jerico.

²³Dangan naglugsot sa kabubuldan an duwang espiya, nagbalyo sa salog asin nagbalik ki Josue. Inosip ninda saiya an gabos na nangyari sainda

²⁴dangan nagsabi, “Daing duwa-duwa na itinao na sato nin Kagurangnan an bilog na daga. Tarakot sato an gabos na tawo duman.”