Read Central Bicolano Joshua 3 Bible Online

Joshua 3 - Central Bicolano bible

Joshua 3

¹Sunod na aldaw, amay na nagbangon an mga Israelita. Naghale sinda sa Sittim asin nagpasiring sa Jordan. Nagkampo sinda digdi bago nagbalyo.

²Pakalihis nin tolong aldaw naglibot sa kampo an mga lider

³dangan nagsabi sa mga tawo, “Kun mahiling nindo an mga padi na dara an Kaban nin Tipan nin Kagurangnan na saindong Dios, tiriklopon na nindo an saindong mga tolda asin magsunod kamo sainda.

⁴Dai pa kamo nakadigdi kaidto, kaya sinda an matukdo saindo kan dalan. Alagad dai kamo magrani sa Kaban nin Tipan; magpahuri kamo nin mga sarong kilometro.”

⁵Sinabihan ni Josue an mga tawo, “Magrilinig kamo, huli ta sa aga magibo an Kagurangnan nin mga ngangalasan sa atubang nindo.”

⁶Dangan sinabihan niya an mga padi na pasanon an Kaban nin Tipan asin mag-enot sa mga tawo. Sinunod siya ninda.

⁷Nagtaram an Kagurangnan ki Josue, “Huli sa gigibohon ko ngunyan, an mga Israelita mapoon sa pagmidbid saimo bilang dakulang tawo, asin maaaraman ninda na kaibahan mo ako siring na inibahan ko si Moises kaidto.

⁸Sabihan mo an mga pading nagdadara kan Kaban nin Tipan na pag-abot ninda sa salog, maontok sinda sa tubig, harani sa pangpang.”

⁹Dangan sinabihan ni Josue an mga tawo, “Magdirigdi kamo asin dangoga nindo an itataram nin Kagurangnan na saindong Dios.

¹⁰Sa pagdangadang nindo, aalawon niya paluwas sa daga an mga Cananeo, Heteo, Heveo, Perezeo, Gergeseo, Amoreo asin Jebuseo. Saindong maaaraman na yaon sa tahaw nindo an buhay na Dios,

¹¹kun nagbabalyo na sa Jordan sa enotan nindo an Kaban nin Tipan kan Kagurangnan kan bilog na daga.

¹²Kaya pumili kamo nin doseng lalaki, saro sa lambang tribu nin Israel.

¹³Sa oras na magtungtong na sa tubig an mga padi na nagdadara kan Kaban nin Tipan nin Kagurangnan kan bilog na daga, maontok sa pagbulos an Salog nin Jordan, asin matambak sa sarong lugar an tubig na nagbubulos paibaba.”

¹⁴Tig-anihan kaidto, asin baha an salog. Kan maghale sa kampo an mga Israelita tanganing magbalyo sa Jordan, nagpaenotan sainda an mga padi na dara an Kaban nin Tipan. Pagtungtong kan mga padi sa salog,

¹⁶nag-ontok sa pagbulos an tubig asin nagtambak sa harayong lugar, duman sa Adam, an syudad na kataed kan Zaretan. Nag-ontok sa pagbulos paibaba an tubig na pasiring sa Gadan na Dagat, asin nakabalyo harani sa Jerico an mga tawo.

¹⁷Mantang naglalakaw sa mamarang daga an mga Israelita, dai naghale sa tahaw kan nagmarang salog an mga padi na nagpapasan kan Kaban nin Tipan sagkod na nakabalyo an gabos na tawo.