Read Central Bicolano Joshua 5 Bible Online

Joshua 5 - Central Bicolano bible

Joshua 5

¹Nabaretaan kan gabos na hadeng Amoreo sa solnopan kan Jordan asin kan mga hadeng Cananeo sa tampi kan Dagat nin Mediteraneo, an ginibo nin Kagurangnan na pagpamara kan Jordan sagkod na makabalyo an bilog na banwaan nin Israel. Nagkatarakot sinda asin nawaraan nin isog huli sa mga Israelita.

²Tinaraman nin Kagurangnan si Josue, “Gumibo ka nin mga kutsilyong gapo asin sirkomsisyon mo an mga Israelita.”

³Sinunod ni Josue an ipinagboot nin Kagurangnan. Sinerkomsisyon niya an mga Israelita duman sa Gibeat-haaralot.

⁴Kan maghale sa Egipto an mga Israelita, an gabos na lalaki sinerkomsisyon na. Alagad sa laog kan kwarentang taon na paglakaw sa kalangtadan kan mga tawo, mayo nin sinerkomsisyon sa namundag na aking lalaki. Siring man, kan matapos na an panahon na iyan, nagkagaradan an gabos na lalaking paralaban na naghale sa Egipto, huli ta sinuhay ninda an Kagurangnan. Siring sa isinumpa nin Kagurangnan, dai sinda tinugotan na makahiling kan daga na mayaman sa gabos na bagay, daga na ipinanuga niya sa saindang mga ginikanan.

⁷An mga aking lalaki kan mga paralaban na ini dai pa sinerkomsisyon asin an bagong henerasyon na ini iyo an sinerkomsisyon ni Josue.

⁸Kan matapos na an pagsirkomsisyon, an bilog na Israel nag-erok sa saindang mga tolda sagkod na napila an saindang mga lugad.

⁹Nagtaram an Kagurangnan ki Josue, “Ngunyan hinale ko na sa saindo an kasosopgan kan pagigin oripon sa Egipto.” Kaya an lugar nginaranan Gilgal, na iyo an ngaran kaini sagkod ngunyan.

¹⁰Mantang nasa Gilgal an mga Israelita duman sa kapatagan na harani sa Jerico, nagselebrar sinda kan Paskwa sa banggi kan ikakatorseng aldaw kan bulan.

¹¹Kan sunod na aldaw nagkakan sinda kan pagkakan na hale sa Canaan: dinarang na trigo asin tinapay na mayo nin lebadura.

¹²Pakakakan ninda kan pagkakan na hale sa Canaan, dai na nag-uran nin manna asin dai na sinda nagkaigwa kaini. Kaya an pagkakan sa Canaan iyo na an nagin pagkakan ninda.

¹³Kan yaon si Josue sa harani kan Jerico, bigla siyang nakahiling nin sarong lalaki na nakatindog sa atubangan niya, na may kapot na espada. Dinolok siya ni Josue asin hinapot, “Kaapil ka nyamo o kaiwal?”

¹⁴“Bako ako maski arin sa sinabi mo,” an simbag kan lalaki. “Nagdigdi ako bilang pamayo kan hukbo nin Kagurangnan.” Nagdapa si Josue sa pagsamba asin nagsabi, “Sorogoon mo ako, kagurangnan. Ano an boot mong gibohon ko?”

¹⁵Nagsabi saiya an pamayo kan hukbo nin Kagurangnan, “Haleon mo an saimong mga sandalyas, huli ta banal an lugar na saimong natitindogan.” Ginibo ni Josue an ipinagboot saiya.