Read Central Bicolano Joshua 7 Bible Online

Joshua 7 - Central Bicolano bible

Joshua 7

¹Alagad dai nasunod an pagboot nin Kagurangnan sa Israel na dai magkua sa Jerico kan mga bagay na susuloon. Sarong lalaki na an ngaran Acan an naglapas kan pagboot na ini, kaya naanggot an Kagurangnan sa mga Israelita. (Si Acan iyo an aki ni Carmi asin makoapo ni Zabdi kan kamaganakan ni Zera kan tribu ni Juda.)

²Nagsugo si Josue nin nagkapirang lalaki hale sa Jerico tanganing siyasaton an Ai, sarong syudad sa sirangan kan Betel asin harani sa Bet-aven. Kan magibo ninda ini

³nagbalik sinda ki Josue asin nag-osip, “Dai kaipuhan an gabos na tawo sa pagsalakay kan Ai. Magpadara ka sana nin mga duwa o tolong ribong lalaki. Dai mo ipagpadara an bilog na hukbo tanganing makilaban huli ta bako man dakula an syudad.”

⁴Kaya mga tolong ribong Israelita sana an nagsalakay sa Ai, alagad napiritan sindang magsibog.

⁵Linamag sinda kan mga taga Ai magpoon sa trangkahan kan syudad sagkod sa Shebarim asin ginadan an mga treynta y seis sainda sa dalan palugsot sa bulod. Kaya nagluya an boot kan mga Israelita asin natakot sinda.

⁶Sa dakulang kamondoan ginisi ni Josue asin kan mga lider nin Israel an saindang mga gubing. Nagdapa sinda sa daga sa atubangan kan Kaban nin Tipan nin Kagurangnan sagkod sa banggi asin binugtakan ninda nin abo an saindang payo.

⁷Dangan nagsabi si Josue, “O Kagurangnan Dios tano ta ibinalyo mo pa kami sa Jordan? Tanganing itao sa mga Amoreo? Tanganing tunawon kami? Tano ta dai mo na sana kami pinabayaan na mag-erok sa ibong kan Jordan?

⁸O Kagurangnan, ano an sasabihon ko ngunyan na nagdulag sa kaiwal an Israel?

⁹Mababaretaan ini kan mga Cananeo asin kan iba pang nag-eerok sa daga. Papalibotan ninda kami asin gagadanon an lambang saro samo. Ano an gigibohon mo para sa saimong dakulang ngaran?”

¹⁰Nagtaram an Kagurangnan ki Josue, “Magtindog ka! Ano ta nakadapa kang arog kaiyan?

¹¹Nagkasala an Israel! Linapas ninda an sakong tipan na ipinagboot ko sainda. Nagkua sinda kan mga bagay na ipinagboot kong suloon. Hinabon ninda iyan, nagputik manongod kaiyan, asin tinago kaiba kan saindang mga kagamitan.

¹²Ini an dahelan kun tano ta dai kaya kan mga Israelita na atubangon an mga kaiwal. Nagdulag sinda sa mga kaiwal huli ta kabilang sinda ngunyan sa mga susuloon! Dai ko na kamo iibahan sagkod na dai nindo tinunaw an mga bagay na sinabi kong dai nindo pagkuahon!

¹³Tindog! Pakabanala an mga tawo asin sabihan mo sinda na magpakabanal para sa aga huli ta ako, an Kagurangnan Dios nin Israel, mataram kaini, ‘Israel, sa saindong mga pagsadiri igwa nin mga bagay na ipinagboot kong suloon. Dai kamo makakaatubang sa saindong mga kaiwal sagkod na dai nahahale saindo an mga bagay na iyan!’

¹⁴Kaya sabihan mo sinda na sa aga madolok sinda sako sosog sa saindang mga tribu. An tribung pilion ko madolok sako sosog sa saindang mga kamaganakan. An kamaganakan na pilion ko madolok sako sosog sa saindang pamilya. An pamilya na pilion ko saro-saro na madolok sako.

¹⁵An siisay man na pilion ko asin makuahan kan mga bagay na ipinagboot kong suloon iyo an tututongon, kaiba an saiyang pamilya sagkod an gabos niyang pagsadiri, huli ta dinarahan niya nin dakulang kasosopgan an Israel asin linapas niya an sakong tipan.”

¹⁶Kaya sunod na aldaw, amay na nagbangon si Josue dangan pinadolok an bilog na Israel sosog sa saindang tribu, asin napili an tribu ni Juda.

¹⁷Pinadolok niya an tribu ni Juda sosog sa saindang mga kamaganakan, asin napili an kamaganakan ni Zera. Dangan pinadolok niya an kamaganakan ni Zera sosog sa saindang pamilya, asin napili an pamilya ni Zabdi.

¹⁸Saro-sarong pinadolok ni Josue an pamilya ni Zabdi asin napili si Acan na aki ni Carmi asin makoapo ni Zabdi.

¹⁹Sinabihan ni Josue si Acan, “Aki ko, isabi mo an totoo digdi sa atubangan nin Kagurangnan, an Dios nin Israel. Ituga mo sako kun ano an ginibo mo. Dai ka magputik sako.”

²⁰Nagsimbag si Acan, “Totoong nagkasala ako sa Kagurangnan, an Dios nin Israel, asin ini an sakong ginibo:

²¹Sa mga bagay na samong nasamsam, may nahiling akong magayon na gubing na gibo sa Babilonia, mga duwang kilo nin plata asin sarong barang bulawan na sobra sa kabangang kilo an timbang. Nagustohan ko nin marahay an mga ini kaya kinua ko. Makukua nindo an mga iyan na nakalubong sa daga sa laog kan sakong tolda, na nasa irarom an plata.”

²²Kaya nagsugo si Josue nin nagkapirang lalaki na nagdalagan pasiring sa tolda ni Acan; an mga bagay na susuloon nakua ninda duman kaiba an plata na susuloon.

²³Ilinuwas ninda an mga ini sa tolda, dinara ki Josue asin sa mga Israelita dangan ibinugtak sa atubangan nin Kagurangnan.

²⁴Si Acan, an plata, an gubing asin an bara nin bulawan dinara ni Josue asin kan mga Israelita sa Kapantayan nin Acor. Dinara man ninda an mga aki ni Acan, an saiyang mga baka, asno, sagkod an mga karnero, an saiyang tolda asin an gabos niyang pagsadiri.

²⁵Nagsabi si Josue, “Tano ta dinarahan mo kami nin kasakitan? Ngunyan ika an papasakitan nin Kagurangnan! Kaya ginapo ninda si Acan sagkod na magadan; ginapo man ninda asin sinulo an saiyang pamilya sagkod pagsadiri

²⁶dangan tinambonan nin gapo. Yaon pa ngunyan an dakulang tambak nin gapo. Kaya sagkod ngunyan, an lugar inapod Kapantayan nin Acor. Dangan nahale an kaanggotan nin Kagurangnan.