Read Central Bicolano Joshua 8 Bible Online

Joshua 8 - Central Bicolano bible

Joshua 8

¹Tinaraman nin Kagurangnan si Josue, “Darahon mo an gabos mong soldados asin magduman kamo sa Ai. Dai kamo matakot o manluya. Tatawan ko kamo nin kapangganahan laban sa hade kan Ai; mapapasaindo an saiyang mga nasasakopan, syudad asin daga.

²Gigibohon nindo sa Ai asin sa saiyang hade an ginibo nindo sa Jerico saka sa saiyang hade; alagad ngunyan pwede nindong kuahon an saindang mga pagsadiri asin mga hayop. Mag-andam kamo sa biglang pagsalakay sa syudad hale sa likodan.”

³Kaya nag-andam si Josue tanganing magduman sa Ai kaiba an gabos niyang soldados. Nagpili siya nin treynta mil na maiisog na soldados asin pinalakaw niya sinda pagkabanggi.

⁴Pinagbotan niya sinda, “Magtago kamo sa likodan kan syudad, dai kamo magharayo; magin andam kamo sa pagsalakay ano man na oras.

⁵Ako asin an sakong mga kairiba an marani sa syudad. Pagluwas kan mga taga Ai sa pakilaban samuya, madulag kami sainda, siring sa enot nyatong ginibo.

⁶Lalamagon ninda kami sagkod na mapaharayo mi sinda. Maghohona sinda na nagdudulag kami siring kan enot na nangyari.

⁷Dangan maluwas kamo sa saindong pinagtatagoan asin sasakopon nindo an syudad. Itatao iyan saindo nin Kagurangnan na saindong Dios.

⁸Pakatapos nindong masakop an syudad, suloon nindo iyan, siring sa ipinagboot nin Kagurangnan. Iyan an mga pagboot ko saindo.”

⁹Kaya pinalakaw sinda ni Josue asin nagduman sinda sa lugar na saindang pagtatagoan asin naghalat duman, sa solnopan kan Ai, sa pagultanan kan Ai saka Betel. Alagad sa laog kan kampo nagpalihis kan banggi si Josue.

¹⁰Amay na nagbangon si Josue asin tinipon an mga soldados. Dangan pinangenotan niya sinda sagkod an mga lider nin Israel pasiring sa Ai.

¹¹Nagduman sinda sa pangenot na trangkahan kan syudad asin nagkampo sa amihan kan Ai. Sarong kapantayan an nasa pagultanan ninda asin an Ai.

¹²Linaen niya an may limang ribong lalaki asin pinatago sa solnopan kan syudad, sa pagultanan kan Ai saka Betel.

¹³Pinamugtak ninda para sa gera an mga soldados na an nangongorog na kosog nakakampo sa amihan kan syudad asin an ibang soldados nasa solnopan. Naagahan si Josue duman sa kapantayan.

¹⁴Kan mahiling kan hade nin Ai an mga soldados ni Josue, naghidali siya asin an gabos niyang soldados sa pagduman sa Kapantayan nin Jordan tanganing labanan an mga Israelita; dai niya aram na sasalakayon sinda hale sa likodan.

¹⁵Nagsagin-sagin na nagdudulag si Josue asin an saiyang mga tawohan dangan nagdalagan sinda pasiring sa kalangtadan.

¹⁶Pinagbotan an gabos na lalaki sa syudad na lamagon sinda, asin mantang linalamag ninda an mga Israelita, orog na naghaharayo sinda sa syudad.

¹⁷Naglamag sa mga Israelita an gabos na lalaki sa Ai, asin nawalat na bukas asin mayong bantay an syudad.

¹⁸Dangan tinaraman nin Kagurangnan si Josue, “Ituro mo sa Ai an saimong garod; itinatao ko iyan saimo.” Ginibo ni Josue an itinaram saiya,

¹⁹asin pakaitaasan niya kan saiyang kamot, nagruluwas tolos an mga soldados na nagtarago, naglaog sa syudad asin sinakop idto. Hidali nindang sinulo an syudad.

²⁰Kan magsalingoy an mga taga Ai, nahiling ninda an aso na nag-iitaas. Dai na sindang madudulagan, huli ta an mga Israelita na nagdurulag pasiring sa desyerto nagbaralik gabos tanganing labanan sinda.

²¹Kan mahiling ni Josue asin kan saiyang mga soldados na sakop na kan iba nindang kairiba an syudad saka nagkakalayo na ini, nagbaralik sinda asin ginaradan an mga taga Ai.

²²An mga Israelitang nasa syudad nagruluwas tanganing tabangan sinda. Kaya napalibotan nanggad kan mga Israelita an mga taga Ai. Nagadan gabos an mga taga Ai asin dai nin nakadulag o nakaligtas maski saro sainda.

²³Alagad dinakop ninda an hade kan Ai asin dinara ki Josue.

²⁴Ginaradan kan mga Israelita an gabos na kaiwal duman sa kalangtadan na pinaglamagan sainda. Dangan nagbalik sinda sa Ai asin ginaradan an mga tawo duman.

²⁵Padagos na itinuro ni Josue an saiyang garod asin dai niya ibinaba sagkod na dai nagadan an mga tawo duman. An gabos na taga Ai nagadan kan aldaw na idto—mga dose mil na lalaki asin babae.

²⁷Kinurua kan mga Israelita para sa saindang sadiri an mga hayop saka an mga rogaring na sinamsam ninda sa Ai siring sa itinaram nin Kagurangnan ki Josue.

²⁸Sinulo ni Josue an Ai asin binayaan na mayong kamugtakan; siring an kamugtakan kaiyan sagkod ngunyan.

²⁹Binitay niya sa kahoy an hade kan Ai asin binayaan duman an bangkay sagkod sa hapon. Pagsolnop kan aldaw, ipinababa niya an bangkay asin ipinatapok sa may trangkahan kan syudad. An bangkay tinambakan ninda nin mga gapo na mahihiling pa duman sagkod ngunyan.

³⁰Dangan nagpatindog si Josue nin sarong altar sa Bukid nin Ebal para sa Kagurangnan, an Dios nin Israel.

³¹Ginibo niya ini siring sa ipinagboot ni Moises sa mga Israelita, siring sa sinasabi sa Katogonan ni Moises: “sarong altar na gibo sa gapo na dai sinapsapan nin lansang na kasangkapan.” Sa ibabaw kan altar na idto nagdolot sinda sa Kagurangnan nin mga tinutong na atang asin mga dolot para sa katoninongan.

³²Sa lugar na idto, sa atubang kan mga Israelita, inukit ni Josue sa mga gapo an katogonan na sinurat ni Moises.

³³An mga Israelita, kairiba an saindang mga lider, an mga opisyal, an mga hukom, asin an mga dayuhan na nakikihimanwa sainda, nagtirindog sa mag-ibong kan Kaban nin Tipan nin Kagurangnan, nakaatubang sa mga pading Levita na nagdadara kaiyan. An kabanga kan mga tawo nakatalikod sa Bukid nin Gerizim, asin an kabanga nakatalikod sa Bukid nin Ebal. Arog kaini an pagboot ni Moises na gibohon ninda pag-abot kan panahon na maako na sinda kan bendisyon.

³⁴Dangan makosog na binasa ni Josue an bilog na Togon, kaiba an mga bendisyon asin mga maldisyon, sosog sa pakasurat sa libro kan Katogonan.

³⁵An lambang pagboot ni Moises binasa ni Josue sa bilog na katiriponan, kaiba an kababaehan asin kaakian, siring man an mga dayuhan na nag-eerok sa kaibahan ninda.